لەوانەیە ئەو پرسیارە لە جێگەی خۆیدا بێت، كە خەڵك دەپرسێت: بۆچی بە تەنیا پارتی پێداگری لە هەڵبژاردن دەكات و حزبەكانی دیكەی بەشداربوو لە پەرلەمان و حكومەت لە هەڵبژاردن دەترسن؟ دیارە وەڵامدانەوەی راستەوخۆ بۆ ئەم پرسیارە لە جێگەی خۆیدا نابێت، لەبەر ئەوەی پارتی دیموكراتی كوردستانیش وەك هەر لایەنێكی سیاسی لەم كوردستانە، بەشێكە لە پرۆسەی سیاسی و بەتەنیا خۆی پرۆسەی سیاسی ئاراستە ناكات، هەر بۆیە ئەو بەروارەشی بۆ هەڵبژاردن دیاریكراوە، بڕیارێكە دوای راوێژكردنی هەموو حزبە سیاسییەكان لەگەڵ حكومەت، ئەوجا حكومەت بڕیاری هەڵبژاردنی داوە و كۆمسیۆنی باڵای سەربەخۆی هەڵبژاردن و راپرسی لە كوردستانیشدا، رۆژی 30ی ئەیلوولی بۆ هەڵبژاردنەكانی پەرلەمانی كوردستان دیاریكردووە، بەڵام جیاوازیی نێوان پارتی و كۆی لایەنە سیاسییەكانی دیكە لەو خاڵەدا بەرجەستە دەبێت، كە پارتی وەك حزبێكی بەرپرسیار مامەڵە لەگەڵ كۆمسیۆنی باڵای هەڵبژاردن دەكات، كە نوێنەری هەموو لایەنە سیاسییەكانی تێدایە و پابەندە بەو بڕیار و رێنماییانەی كە ئەو كۆمسیۆنە سەربەخۆیە دەریدەكات، بەڵام لایەنەكانی دیكە لەگەڵ ئەوەی خۆیان بەشێكن لە بڕیاردانی هەڵبژاردن و ئەندامیشیان لە كۆمسیۆنی باڵای هەڵبژارندا هەیە، كاتێك دەزانن ئەم هەڵبژاردنە لە بەرژەوەندیی حزبی خۆیاندا نییە، ئەوا پەنا بۆ بڕوبیانوو دەبەن و دەیانویست بە هەر نرخێك بێت، ئەم هەڵبژاردنە دوابخەن، ئەمە لەكاتێكدا پارتی دیموكراتی كوردستان هیچ كێشەی لەگەڵ ئەوەدا نەبوو، كە حزبەكان لە كاتی وتووێژكردنیان لەسەر بەرواری رۆژی هەڵبژاردن، هەر بەروارێكی دیكەیان دیاری بكردایە، بەڵام كاتێك بەروارێك بۆ هەڵبژاردن دیاری دەكرێت و هەندێك لایەنی سیاسی بۆ ئامانجی حزبی خۆیان دەیانەوێت یاری بەو بەروارە بكەن، ئەوا پارتی دیموكراتی كوردستان وەك لایەنێكی سەرەكی لە پرۆسەی سیاسیی كورستاندا مافی خۆیەتی پێداگری لەسەر ئەو بەروارە بكات و شكۆی هەرێمی كوردستان بپارێزێت.
كێشەی سەرەكیی حزبە سیاسییەكان (بێجگە لە پارتی دیموكراتی كوردستان) لەلایەك رێژەی نزمیی بەشداریی هاووڵاتییانە، بەتایبەتی لەو زۆنەی كە پاشاگەردانیی حزبەكان جۆرێك لە بێ متمانەیی لە نێوان هاووڵاتیان و ئەو حزبانە دروست كردووە، لەلایەكی دیكە ئاستی بەرزیی رێژەی بەشداریی هاووڵاتیانە لەو پارێزگایانەی كە زۆربەی زۆری دەنگەكانی بۆ پارتی دیموكراتی كوردستان دەچێت، لەم حاڵەتەشدا كە كوردستان بریتییە لە یەك بازنەی هەڵبژاردن، ئەوا بە حیسابی ئەو حزبە سیاسییانەی خۆیان بە نەیاری پارتی دەزانن، نزیكەی نیوەی دەنگەكان بۆ پارتی دەڕوات و حزبەكانی دیكەش بە هەموویان دەبنە خاوەنی نیوەكەی دیكە.
پرسیاری دیكەی گرنگ ئەوەیە، ئایا ئەو مەزندەیەی حزبەكانی نەیاری پارتی دەیكەن، دەچێتە خانەی پڕوپاگەندەی سیاسی بۆ خۆدزینەوە لە هەڵبژاردن، یان تا رادەیەكی زۆر راستیشی لە خۆیدا حەشارداوە؟ بێگومان وەڵامی راستگۆیانە بۆ ئەم پرسیارە ئەوەیە: ترسی ئەو حزبانە لە هەڵكشانی دەنگەكانی پارتی دیموكراتی كوردستان گەیشتۆتە ئەو ئاستەی كە نەتوانن راستییەكان بشارنەوە، بۆیە دەكرێت بڵێین، ئەوەی حزبەكانی نەیاری پارتی لەسەر ئاستی بەرزی بەشداریی دەنگدەری پارتی و ئاستی نزمی بەشداریی حزبەكانی دیكە دەیڵێن، بە رێژەیەكی زۆر بەرز راستە، زیاد لەمەش پارتی دیموكراتی كوردستان كاری جددی لەسەر ئەوە دەكات كە رێژەی بەشداریی دەنگدەرانی بە ئاستێك بەرز بكاتەوە، كە هەموو دەنگدەرێكی پارتی لەسەر سندوقی دەنگدان ئامادە بێت و ئەم كارەش بۆ پارتی نەك هەر كارێكی قورس نییە، بەڵكو كارێكی ئاسانە، هۆكاری ئەم ئاسانییەش ئەوەیە كە ئاستی متمانە لە نێوان پارتی و دەنگدەرەكانی لەوپەڕی بەرزیدایە و گەیشتوونەتە ئەو قەناعەتەی كە پارتی بەڵێنی بریقەدار بە هیچ لایەنێك نادات و ئەوەی بیڵێت، وەك خۆی جێبەجێی دەكات، هەروەك چۆن بەڵێنی دا بەرگری لە شكۆی هەرێمی كوردستان و مانەوەی بكات، بە خوێنی ئاڵی پێشمەرگەكانی ئەو بەڵێنەی جێبەجێ كرد و نەیهێشت كوردستان داگیر بكرێتەوە.

بەڵام لەبەرامبەر ئەمەدا ئەگەر بپرسین: ئایا حزبەكانی دیكە دەتوانن ئاستی نزمی بەشداریی دەنگدەرانیان بەرز بكەنەوە؟ دیارە باشترین وەڵام بۆ ئەم پرسیارە ترسی ئەو حزبانەیە لە ئەنجامدانی هەڵبژاردن، لەمەش زیاتر، ئەو پاشاگەردانییەی ئەو حزبانە لە زۆنی هەمەڕەنگ دروستیان كردووە، نەك هەر ناتوانن متمانە لەنێوان خۆیان و دەنگدەرەكانیان دروست بكەنەوە، بەڵكو ئەو پاشاگەردانییە بۆتە هۆكاری ئەوەی رۆژانە ئەو حزبانە خۆیان پەرت ببن و نەتوانن یەكڕیزیی حزبەكەی خۆشیان بپارێزن.
ئێستا كە بەرەو هەڵبژاردنێكی چارەنووسساز هەنگاو هەڵدەگرین، ئاستی بەرزی بەشداریی دەنگدەرانی پارتی، بەدیهێنانی ئەو ئامانجەیە كە پارتی لە بەرنامەكەیدا ئاماژەی پێكردووە و ئاستی نزمی بەشداریی دەنگدەرانی حزبەكانی دیكەش دیسان ئاماژەیەكی موژدەبەخشە كە خەڵكی كوردستان هیوا دەخوازێت پاشاگەردانیی سیاسی و ئیرهابی فیكری بۆ هەتاهەتایە كۆتایی بێت.