مارتن هایدگەر لە كتێبی (پرسیار لە شت - السۆال عن الشیء) ئەوەمان پێ دەڵێت: هەموو (شتێك - Thing) جێگەی پرسیارە، ئەوجا ئەو (شتە) ئەستێرەیەكی ئاسمان، یان چیایەك، یان دارێك، یان بەردێك بێت، ئەمە وەك (شتە) ماددییەكان، بەڵام شتە مەعنەوییەكانیش وەك دەركردنی بڕیارێك، دامەزراندنی پارتێك، دامەزراوەیەك و...هتد، ئەوانیش جێگەی پرسیارن.
وەڵامی ئەو پرسیارانەش كە لە هەر (شت)ێك دەكرێت، پەیوەستە بە ئاستی تێگەیشتنی ئەو كەسەی وەڵامی ئەو پرسیارە دەداتەوە، یان بایەخی ئەو شتە لای ئەو كەسەی وەڵامەكە دەداتەوە. هەر بۆ نموونە، كاتێك شوانێك ئێواران مەڕەكانی دێنێتەوە، لای ئەو رۆژ ئاوا دەبێت، بەیانییش كاتێك رۆژ هەڵدێتەوە، مەڕەكانی دووبارە دەباتە دەرەوە، كەواتە ئەگەر بپرسین: (رۆژ) لای ئەو شوانە چییە؟ ئەوا بێگومان رۆژ، لای شوانەكە ئەو بازنە درەوشاوە نیومەتریەیە كە ئێواران ئاوا دەبێت و بەیانیان هەڵدێتەوە، بەڵام ئەگەر هەمان پرسیار لە زانایەكی فیزیای گەردوونی بكەین و، پێی بڵێین: (رۆژ چییە؟) ئەوا پێمان دەڵێت: رۆژ ئەستێرەیەكە لە زەوی گەورەترە و لە جێگەی خۆی ناجووڵێت و زەوی و چەند ئەستێرەیەكی دیكە بە دەوریدا دەسووڕێنەوە. لێرەدا ئەگەر لە خۆمان بپرسین: ئایا (رۆژ) ئەوەیە كە شوانەكە پێمان دەڵێت، یان ئەوەیە كە زانا فیزیا گەردوونییەكە پێمان دەڵێت؟ بێگومان، نە لە وەڵامی شوانەكە و نە لە وەڵامی زانا فیزیا گەردوونییەكەوە، ئێمە تێناگەیەنن، رۆژ وەك (شتێك) چییە، بۆیە كاتێك پرسیار لە رۆژ دەكەین، وەك ئەستێرەیەك، یان شتێك كە خۆی چییە، ئەوا هەمان پرسیاری ئەمانوئیل كانت لە سەر ئەقڵ دروست دەبێتەوە، كە (رەخنە لە ئەقڵی پەتی) دەگرێت، بۆیە دەكرێت ئەو پرسیارەش لە ناونیشانی كتێبەكەی كانت بكەین، (ئایا ئەقڵی پەتی چییە؟) و ئایا لە وەڵامی ئەم پرسیارە دەكرێت بڵێین: (ئەقڵی پەتی) میتافیزكە؟
ئەگەر لەسەر ئەم میتۆدە و لە 72هەمین ساڵیادی دامەزرانی پارتی دیموكراتی كوردستاندا، ئێمەش پرسیار لە خۆمان و لە تەواوی خەڵكی كوردستان بكەین، بەوەی (ئایا پارتی چییە؟). بێگومان هەر یەكێك وەڵامی ئەم پرسیارە بداتەوە، كۆمەڵێك لاپەڕە بە پارتییەوە هەڵدەواسێت و لەو لاپەڕانەدا باسی پارتی دەكات، بەڵام پرسیاری گرنگ لێرەدا ئەوەیە: ئەگەر ئەم لاپەڕانە لە پارتی بكەینەوە و جارێكی دیكە بە چەمكی پارتی لە ناو فیكری مستەفا بارزانی (ئەقڵی پەتیی مستەفا بارزانی) هەڵبواسینەوە، ئایا ئەوەی ئێمە نووسیومانە دەبێتە مانا و مەغزای چەمكی (پارتی) لەناو فیكری مستەفا بارزانی-دا؟


چەمكی (پارتی)
لەناو فیكری مستەفا بارزانی-دا


ئەمانوئیل كانت، (فیكر)ی پێش پراكتیزەكردن بە (ئەقڵی پەتی _العقل المحض) پێناسە دەكات، بۆیە لە كاتی پراكتیزەكردنی ئەو فیكرەدا، رەخنە لە ئەقڵی پەتی دەگرێت، ئەمەش بەو مانایەی مەرج نییە ئەوەی بیری لێ دەكەیتەوە و پلانی بۆ دادەنێیت، بە هەمان ئەو وێنایە جێبەجێ بكرێت كە تۆ پێشتر بیرت لێ كردووەتەوە، هەروەها مەرجیش نییە كاتێك هەر خۆت ئەو فیكرەی پێشتری خۆت جێبەجێ دەكەیت، بە هەمان شێوە جێبەجێی بكەیت كە پێشتر بیرت لێ كردووەتەوە، كانت ئەمەشی ناو لێناوە: (رەخنەگرتن لە ئەقڵی پراكتیكی).
ئەگەر لەسەر ئەم بنەمایە، پێش ئەوەی باسی چۆنیەتی دامەزراندنی پارتی دیموكراتی كوردستان بكەین، دیارە (پارتی) وەك چەمك و فیكر لەناو ئەقڵی پەتیی مستەفا بارزانی-دا نەك هەر بوونی هەبووە، بەڵكو ئەم (پارت)ـە دامەزراویشەوە و ئەرك و ئامانجەكانیشی بۆ دیاریكراوە، هەر بۆیە مستەفا بارزانی داوای جێبەجێكردنی ئەو فیكرە دەكات كە پێشتر خۆی بیری لێ كردووەتەوە. كەواتە ئەگەر ئاراستەی پرسیارمان لە چەمكی (پارتی) بێت، وەك ئەوەی لە فیكری مستەفا بارزانی بوونی هەبووە، پێش ئەوەی هەنگاو بۆ دامەزراندنی هەڵگیرابێت، ئەوا ئەو پرسیارەی ئێمە نابێتە پرسیارێكی مێژوویی بۆ (پارتی)، بەڵكو دەبێتە پرسیارێك بۆ چەمكی (پارتی) لە حاڵەتی بێدەنگیدا و ئەو بێدەنگییە دەشكێنن و ماناو مەغزای چەمكی (پارتی) لەو بەدەنگهێنانەوەیە بەرهەم دەهێنێتەوە.
گەڕانەوە بۆ چەمكی (پارتی) لە حاڵەتی بێدەنگیدا، مانای ئەوە نییە مێژوو لەناو بێدەنگیی پارتیدا ئامادەیی نەبووە، بەڵكو خودی بێدەنگییەكە بناخەی بوونیەتی و لەگەڵ بەدەنگهێنانەوەی ئەو بێدەنییگە دیسان پرسیارێكی دیكەی مێژوویی لە پارتی دەكرێت، بەڵام مێژوویی بە چ مانایەك؟ بێگومان (مێژوویی) بەو مانایەی لە سەرەتای مێژووی دروستبوونی ئەم فیكرەوە بۆ دامەزراندنی (پارتی) و هەتا ئێستاش ئەو مێژووە درێژەی هەیە، بۆیە كاتێك بەم شێوازە چەمكی (پارتی) وەك فیكر و پێش دامەزراندنی دەخوێنینەوە، ئەوا دەرگای رەخنەگرتن لە ئەقڵی خۆمان لەسەر ئاستەكانی (ئەقڵی پەتی، ئەقڵی پراكتیكی، شێوازی حوكمدان) دەكرێتەوە و ناچاردەبین جارێكی دیكە بگەڕێینەوە سەر ئەو بناخە ئەخلاقییەی كە لەناو فیكری مستەفا بارزانی، چەمكی پارتی پێناسە دەكاتەوە.

لێرەوە ئەگەر لە ناو فیكری مستەفا بارزانی-دا ئەو پرسیارە بكەین: ئایا پارتی چییە؟ یان ئەگەر پرسیارەكە بە شێوەیەكی دیكە بكەین و بڵێین: ئایا زەروورەتی پارتی لە فیكری مستەفا بارزانی-دا بۆ بزووتنەوەی رزگاریخوازیی كوردستان چی بووە؟ ئەگەر بۆ وەڵامدانەوەی ئەم پرسیارە پەنا بۆ چەند گوتەیەكی بەڕێز مسعود بارزانی بەرین، كە خۆی پەروەردەی فیكری بارزانییە، دیارە لە چەندین بۆنەدا و بە چەند وشەیەك وەڵامی ئەو پرسیارەی داوەتەوە (ئایا پارتی چییە؟) لای ئەو پارتی بریتییە لە (رەوینەوەی نائومێدی و دەركەوتنی ئومێد بۆ نەتەوەیەك)، هەروەها لە ساڵی 1993یش دوای ئەوەی پارتی لەگەڵ حزبی یەكگرتن یەكیان گرت، بەڕێز مسعود بارزانی لە سلێمانی گوتی: «تەنیا ناوی پارتی وەك خۆی بمێنێت، هیچ كێشەیەك لەسەر پلە و پۆست دروست نابێت..»، بێگومان ئەم گوتانەی بەڕێز مسعود بارزانی، پێناسەیەكی بەرزە بۆ زەروورەتی دامەزراندنی پارتی دیموكراتی كوردستان، بەڵام میتۆدی ئەم نووسینە پێناسەكەی مسعود بارزانی-یش بۆ (پارتی) دەكاتە جێگەی پرسیار و دەپرسێت: ئایا رەوینەوەی نائومێدی و دەركەوتنی ئومێد بۆ نەتەوەیەك لە ناو فیكری مستەفا بارزانی-دا بە چ شێوەیەك بە پارتی جێبەجێ دەكرێت؟ یان ئایا بۆ گرنگە ناوی (پارتی) وەك خۆی بمێنێت؟

پێش ئەوەی هەوڵێك بۆ وەڵامدانەوەی ئەم پرسیارە بخەینەگەڕ، دەبێت پێشوەختە ئەو راستییە لەبەر چاو بگرین، كە پارتی وەك حزب ناتوانێت چوارچێوەیەك بە سەر فیكری مستەفا بارزانی-دا فەرز بكات، بەڵكو فیكری بارزانی دەبێتە چوارچێوەیەك و چەمكی پارتی پێناسە دەكات، لەمەش زیاتر رەهەندەكانی فیكری بارزانی بە سەر پێناسەی پارتیدا فەرزدەكرێت، ئەم فەرزكردنەش بەو مانایەی كە دەبێت پارتی بەو شێوەیە بێت كە بارزانی مستەفا بیری لێ كردووەتەوە، نەك ئێمە بێین وەك هەر حزبێكی ئاسایی و خاوەن ئایدیۆلۆژیای جیاواز، مامەڵە لەگەڵ پارتی بكەین.


هەموو ئەو كەسایەتییانەی وەك (جۆرج واشنتۆن، گاندی، ماندیلا، دیگۆل، تەنانەت چەرچلیش و...هتد) كە لە ناو نەتەوەی خۆیان بوون بە رابەر و كاریزمای نیشتمانێك، لەبری ئەوەی هەوڵیاندابێت حزب دابمەزرێنن و نەتەوەكەی خۆیان بەش بەش بكەن، هەموو هەوڵێكیان داوە، جیاوازیی نێوان ئایدیۆلۆژیەتە جیاوازەكان پێكەوە ئاشت بكەنەوە، هەوڵیانداوە جیاوازی نێوان ئایین و نەتەوە جیاوازەكان پێكەوە ئاشت بكەنەوە و ناسنامەیەكی نیشتمانی هەموویان پێكەوە كۆبكاتەوە. ئەوجا ئەگەر لەسەر ئەم بنەمایە، مستەفا بارزانی وەك رابەری نەتەوەیەك و كارێزمای نیشتمانێك وەربگرین و لە خۆمان بپرسین: ئایا مستەفا بارزانی پێویستی بەوە بووە حزبێك دروست بكات، بۆ ئەوەی ببێتە سەرۆكی حزب؟ بێگومان مێژوو سەربەرزانە وەڵامی ئەم پرسیارە دەداتەوە و بە دەنگی بەرز دەڵێت: چەندین ساڵ پێش ئەوەی پارتی دیموكراتی كوردستان دابمەزرێت، مستەفا بارزانی رێبەرایەتی شۆڕشی كوردستانی كردووە و هەموو نەتەوە و ئایینە جیاوازەكانی كوردستان پشتگیرییان كردووە، حكومەتی پاشایەتی عێراقیش وەك رێبەری شەرعیی كوردستان دانوستاندنی لەسەر مافەكانی گەلی كوردستان لەگەڵ كردووە. هەروەها پێش ئەوەی پارتی دیموكراتی كوردستان دابمەزرێت، مستەفا بارزانی سنووری نێوان بەشەكانی كوردستانی نەهێشت و چوو بە هانای كۆماری كوردستانەوە و بوو بە سەربازی پارێزەری كۆماری كوردستان.
كەواتە دیسان دەبێت ئەو پرسیارە لەخۆمان بكەینەوە، كە مستەفا بارزانی پێویستی بە حزب نەبووە، ئەی بۆچی پارتی دیموكراتی كوردستانی دامەزراند؟ وەڵامدانەوەی ئەم پرسیارە ناچارمان دەكات، بە شێوەیەكی ئارەزوومەندانە ئەو مەرجانە قبووڵ بكەین كە فیكری مستەفا بارزانی بە سەر چەمك و پێناسەی پارتیدا فەرزی دەكات، ئەم فەرزكردنە پێناسەی پارتی لە چەمكی حزبی تەقلیدی و باوی ئەو سەردەمە دەردەهێنێت و پارتێكی تازە دروست دەكات، كە بەهیچ شێوەیەك ناتوانین نە بیكەین بە عەرەبی و پێی بڵێین: (حزب)، نە دەشتوانین بیكەن بە ئینگلیزی و پێی بڵێین: (Party)، دیارە لە مێژووی ئەدەبیاتی سیاسیی پارتی دیموكراتی كوردستان-یشدا، زۆر جاران لەسەر لاپەڕەی رۆژنامەی «التاخی»، نووسراوە: «الپارتی»، لە ئێستاشدا ئەو توێژەرە بیانییانەی كە تایبەتمەندن لەسەر پرسی سیاسیی كوردستان هەر وشەی (Party) بە مانا كوردییەكەی بۆ پارتی دیموكراتی كوردستان بەكار دەهێنن.
گرنگترین جیاوازی لە پێناسەی پارتی لە فیكری بارزانی-دا، لەگەڵ پێناسە باوەكانی هەموو حزبەكانی ئەو سەردەمەی پارتی تێیدا دامەزراوەو ئەوانەشی دوای دامەزراندنی پارتی و هەتا ئێستا دامەزراون، ئەوەیە، هەر گرووپێك كۆبووبێتەوە بۆ ئەوەی حزبێكی سیاسی دروست بكات، پێش هەموو شت لە بەیانی دامەزراندنیدا ئاماژەی بەوە كردووە كە پێویستە خەڵك هۆشیار بكرێتەوە و جۆش بدرێت بۆ خەبات بۆ ئەوەی شۆڕش بكەن و سەركەوتن بەدەست بهێنن، یان هەر لە بەیانی دامەزراندنەكەیدا كۆمەڵێك تایبەتمەندی بۆ حزبەكەی دروست كردووە، بۆ ئەوەی لە حزبەكانی دیكە خۆی جیا بكاتەوە، بەڵام ئەگەر سەیری پێناسەی چەمكی پارتی بكەین لە فیكری مستەفا بارزانی-داو دەبینین هیچ كام لەو تایبەتمەندییانە نابینینەوە كە ئەو حزبانەی لەسەر دروست كراوە، لێرەدا بەچەند خاڵێك ئاماژەی پێ دەكەین:

1. لە فیكری مستەفا بارزانی-دا خەڵكی كوردستان هۆشیارە و ژێردەستەیی قبووڵ ناكات، ئەمەش راستیەكی مێژووییە، لەبەر ئەوەی مستەفا بارزانی پێش ئەوەی پارتی دابمەزرێنێت، رێبەرایەتی شۆڕشی كوردستانی كردووە لە شۆڕشی دووەمی بارزان و خەڵكی كوردستانیش بە جیاوازیی نەتەوە و ئایینەوە پشتگیرییان لێ كردووە.
2. لە فیكری مستەفا بارزانی-دا، پارتی هیچ تایبەتمەندییەكی رەگەزپەرستی و ناوچەگەری و توندڕۆیی ئایینی و ئایدیۆلۆژیی نییە و لەگەڵ هیچ نەتەوە و ئایین و ئایدیۆلۆژیەتیكی جیاوازیشدا هاودژی دروست ناكات، بەڵكو بەپێچەوانەوە هەموو ئەو جیاوازییانە پێكەوە ئاشت دەكاتەوە و پێكەوە ژیان و لێبووردەیی لە نێوانیاندا دروست دەكات.

3. لە فیكری بارزانی-دا، دوای پشتیوانیی خوا، ئیرادەی میللەت شۆڕش بەرپا دەكات، پارتی تەنیا كاری ئەوەیە ببێتە چوارچێوەیەك بۆ ئەوەی ئەو ئیرادە زیندووە بۆ بەدیهێنانی ئامانجە هاوبەشەكان یەكگرتوو بێت.
لێرەوە ئەگەر لەبەر رۆشنایی ئەو خاڵانەی ئاماژەمان پێكردن، كە پارتی لە هەر حزبێكی دیكە جیا دەكاتەوە، ئەو پرسیارە دروست دەبێت كە: ئایا مستەفا بارزانی وەك هەر رێبەر و كاریزمایەكی نەتەوەكانی جیهان، حزبێكی سیاسی تەقلیدی دروست كرد، یان چوارچێوەیەكی دروستكرد بۆ ئەوەی رێگە لە دابەشبوونی نەتەوە و نیشتمان بگرێت و هەموو بۆچوون و ئایین و نەتەوە جیاوازەكانی پێكەوە ئاشت كردەوە؟ بێگومان ئەگەر لەناو مێژووی رێبەرایەتیی مستەفا بارزانی بۆ بزووتنەوەی رزگاریخوازیی كوردستان بە دوای وەڵامی ئەم پرسیارەدا بگەڕێین، ئەوا ئەم مێژووە پێمان دەڵێت: پارتی نەك هەر وەك حزبە سیاسییەكانی سەردەمی خۆی و ئەوانەی ئێستاش هەن، كاری نەكردووە، بەڵكو پارتی چ لە سەردەمی مستەفا بارزانی و چ ئێستا لە سەردەمی مسعود بارزانی، ئەگەر وەك كاردانەوەش وەك حزبە سیاسییەكانی دیكە رەفتاری كردبێت، ئەوا جێگەی رەخنەی مستەفا بارزانی و مسعود بارزانی بووە و رێگە نەدراوە كە (پارتی) وەك حزبەكانی دیكە سیاسەتی تەسكی حزبایەتی پیادە بكات.

لەم راستەوە ئەگەر بگەڕێینەوە سەر ئەو گوتانەی بەڕێز مسعود بارزانی كە ئەم نووسینە خستیە ژێر پرسیارەوە، دووبارە ئەو پرسیارە بكەینەوە، (چۆن پارتی دەبێتە هۆی رەوینەوەی نائومێدی و دەركەوتنی ئومێد بۆ نەتەوەیەك؟) یان (بۆچی دەبێت ناوی پارتی هەر (پارتی) بێت و هیچ گۆڕانكارییەكی بەسەردا نەیەت؟) ئەوا ئەم نووسینە بە دووبارە گەڕانەوەی بۆ پێناسەی چەمكی (پارتی) لە فیكری بارزانی-دا و پێش دامەزراندنی پارتی، دەتوانێت بە شێوەیەك لە شێوەیەكان لە مانا و مەغزای ئەو گوتانەی مسعود بارزانی نزیك ببێتەوە و بڵێت: پارتی كاتێك دەبێتە ئامرازی رەوینەوەی نائومێدی و دەركەوتنی ئومێد بۆ نەتەوەیەك، كە شانۆیەك بێت بۆ نمایشكردن و یەكگرتوویی ئیرادەی نەتەوەیەكی هۆشیار و ئازادیخواز، هەروەها نابێت ناوی پارتی بگۆڕێت بۆ (حزب یان Party) لەبەر ئەوەی (حزب و Party) ئاماژەن بۆ گرووپ و دەستە و تاقمێك كە نوێنەرایەتی چینێك، یان توێژێك، یان نەتەوەیەك دەكات، ئەمەش واتە نەتەوە لەناو خۆیدا دابەش دەكات، بەڵام پارتی نوێنەرایەتی گەلێك دەكات كە گەلی كوردستانە و نەتەوە و نیشتمان پێكەوە كۆدەكاتەوە، پێش ئەوەی داكۆكی لە مافەكانی كورد بكات، داكۆكی لە مافەكانی كلد و ئاشووری و توركمان و ئەرمەن و تەواوی نەتەوەكانی دیكەی كوردستان دەكات، پێش ئەوەی داكۆكی لە مافی موسڵمانەكان بكات، بەو حیسابەی زۆرینەی خەڵكی كوردستان موسڵمانن، داكۆكی لە مافی تەواوی ئایینە جیاوازەكانی كوردستان دەكات، ئەم تایبەتمەندییانە بێجگە لە پارتی لە ناو هیچ حزبێكی دیكەی رۆژهەڵاتی و رۆژئاوایی نییە، بۆیە دەبێت ناوی پارتی هەر (پارتی) بێت و نابێت هیچ گۆڕانكارییەكی بەسەردا بێت.


پارتی وەك پڕۆژەیەك بۆ دامەزراندنی دەوڵەت و رزگاركردنی كۆمەڵگە لە پاشاگەردانیی سیاسی


ئەگەر خوێندنەوەی مێژوو بۆ میتۆدی ئەم نووسینە لە میتۆدی قوتابی و مامۆستاوە بگۆڕێن بۆ میتۆدی دادوەر و شاهید، ئەوا دەتوانین مێژوو بكەینە شاهیدی ئەو تێزانەی لەم نووسینەدا دەخرێنەوەڕوو.
جیاوازیی میتۆدی قۆتابی و مامۆستا لەگەڵ میتۆدی دادوەر و شاهید بۆ خوێندنەوەی مێژوو، لەو خاڵەوە سەرچاوە دەگرێت، ئەگەر تۆ مێژوو بكەیت بە مامۆستای خۆت، ئەوا ئەو مێژووە هەرچییەكی پێ گوتی، دەبێت گوێی لێ بگریت، بەبێ ئەوەی بزانیت كام رووداو راستە، یان كام رووداو هەڵەیە، هەر بۆیە لەم حاڵەتەدا تۆ ئاگاداری مێژوویت، بەڵام ئەم ئاگاداربوونە خزمەتی نووسینەكەت ناكات، بەڵام كاتێك نووسەر خۆی دەكاتە دادوەر و مێژوو دەكات بە شاهید، ئەوا نووسەر وەك دادوەر گوێ لە شاهید دەگرێت، بەڵام گوێگرتنی دادوەرەكە وەك گوێگرتنی قوتابییەكە نییە، دادوەر دەیەوێت راستییەكان لە شاهید وەربگرێت.

ئەگەر لەسەر ئەم بنەمایە هەڵوەستەیەك لەسەر ناونیشانی دووەمی ئەم راپۆرتە بكەینەوە كە پرسیارێكە و دەڵێت: بۆچی مستەفا بارزانی لە كۆماری كوردستانەوە داوای دامەزراندنی پارتی كرد، نەك لە سلێمانییەوە؟ هەروەها ئەگەر سەیری ناونیشانی ئەو بەشەش بكەین كە نووسراوە: (پارتی وەك پڕۆژەیەك بۆ دامەزراندنی دەوڵەت و رزگاركردنی كۆمەڵگە لە پاشاگەردانیی سیاسی)، لێرەشەوە جارێكی دیكە هەم پرسیارەكەی یەكەم و هەمیش ناونیشانەكەی دووەم بكەینەوە جێگەی پرسیارێكی دیكە و لە خۆمان بپرسینەوە: ئایا دەتوانین مێژوو بكەینە شاهیدێكی راستگۆ بۆ وەڵامدانەوەی پرسیارەكەمان (بۆچی مستەفا بارزانی لە مەهابادەوە داوای دامەزراندنی پارتی كرد، نەك لە سلێمانییەوە؟). یان ئایا دەتوانین مێژوو بكەینە شاهیدێكی راستگۆ بۆ سەلماندنی ئەو ناونیشانەی نووسراوە: (پارتی پڕۆژەیەك بۆ دامەزراندنی دەوڵەت و رزگاركردنی كۆمەڵگە لە پاشاگەردانیی سیاسی).

بێگومان ئەگەر توانیمان لە چوارچێوەی ئەم نووسینەدا مێژوو بكەینە شاهێدێكی راستگۆ، ئەوا هەم ئەمانەتی مێژوومان پاراستووە، هەمیش ئەو بڕیارەی لەسەر رووداوەكان دەیدەین، بڕیارێكی دادپەروەرانە دەبێت، بەڵام بەپێچەوانەوە هەم خیانەت لە مێژوو دەكەین و هەمیش ئەو بڕیارانەی لە سەر رووداوەكان دەیدەین، دەبێتە جێگەی گاڵتەجاڕی خوێنەر.

لەم راستەوە و پێش ئەوەی بێینە سەر شەن و كەوی پرسیارەكەمان و سەلماندنی ناونیشانە لاوەكییەكەی ئەم بابەتە، دەبێت ئەوە بەبیری خوێنەر بهێنینەوە، ئەم نووسینە مامەڵە لەگەڵ چەمكی (پارتی) لەناو فیكری مستەفا بارزانی دەكات، واتە چەمكی (پارتی) وەك پڕۆژەیەكی بیرلێكراوە پێش دامەزراندنی، ئەوجا ئەگەر لەم خاڵەوە بگەڕێین بۆ وەڵامی پرسیارەكە (بۆچی مستەفا بارزانی لە مەهابادەوە داوای دامەزراندنی پارتی كرد، نەك لە سلێمانییەوە؟) ئەوا مێژوو وەك شاهید دوو حاڵەتی جیاوازی بیركردنەوەی مستەفا بارزانی-مان بۆ دەگێڕێتەوە كە لە دوو سەردەم و شوێنی جیاواز و بەمجۆرە بووە:
مێژوو وەك شاهید پێمان دەڵێت: مستەفا بارزانی لە ساڵانی 1942-1943 یەكێك بووە لەو كەسایەتییە شۆڕشگێڕانەی كە حكومەتی پاشایەتی دووری خستبووەوە بۆ سلێمانی، ئەو كات مستەفا بارزانی بیری لەوە دەكردەوە، چۆن شۆڕشێكی سەرتاسەری لە باشووری كوردستاندا بەرپا بكات، وەك شیخ مەحموودی شێخ كاوەی حەفیدزادە لە دیمانەیەكی گوڵاندا بۆی باس كردووین، مستەفا بارزانی لە پرسی گەڕانەوەی بۆ بارزان و هەڵگیرسانەوەی شۆڕشێكی سەرتاسەری شێخ مەحموودی حەفید ئاگادار دەكاتەوە و بە تێروتەسەلییش لەگەڵ شێخ لەتیفی حەفید باسی دەكات، بۆ ئەم پرسەش جیا لەوەی لەلایەن شیخ لەتیفی حەفیدەوە هەموو ئامادەباشییەك پیشان دەدرێت بۆ هاوكاریی مستەفا بارزانی، لە هەمانكاتدا لەلایەن حزبی هیوا و ئەفسەرانی ئازادیخوازەوە پشتگیری دەكرێت.

ئەمە تائێرە شاهیدی مێژووە بۆ بڕیاری مستەفا بارزانی بۆ هەڵگیرساندنی شۆڕش، بەڵام پرسیارەكەی ئێمە ئەوەیە: بۆچی بۆ هەڵگیرساندنی ئەم شۆڕشە بیری لە دامەزراندنی حزبێكی سیاسی، یان پارتی نەكردەوە؟ ئێستا ئەگەر لەم پرسیارەش پرسیارێكی دیكە دروست بكەین و بپرسین: ئایا لە بیركردنەوەی مستەفا بارزانی-دا پارتێكی سیاسی بۆ شۆڕش زەروور نەبووە؟ ئەگەر لەم پرسیارەش پرسیارێكی دیكە دروست بكەین، دەكرێت بپرسین: ئایا چۆن ئەو شۆڕشە رێكخراوە و سەركردایەتیی ئەو شۆڕشە چۆن كراوە؟ دیارە لە وەڵامی ئەم هەموو پرسیارەدا، دیسان مێژوو دەبێتەوە بە شاهیدێكی راستگۆ و پێمان دەڵێت: چەمكی پارتی لە فیكری مستەفا بارزانی-دا، دامەزراندنی ئەو حزبە سیاسییە نییە كە گرووپێك كۆببنەوە دایبمەزرێنن و رایبگەیەنن، بەڵكو چەمكی پارتی چوارچێوەیەك بووە كە ئیرادەی گەلی كوردستان تێیدا یەكگرتوو بێت، ئەم چوارچێوەیەش پێویستی بە رەخساندنی زەمینە هەبووە، ئەم زەمینەیەش لە ناو شۆڕشی بارزاندا دروست بوو، بە خۆڕسكی لیژنەی ئازادی بۆ سەركردایەتیی شۆڕش هاتەئاراوە، ئەندامانی لیژنەی ئازادییش بۆ سەركردایەتیی شۆڕشی بارزان، خەڵكی هەموو ناوچەكانی ئەم بەشەی كوردستان بوون، ئەمەش واتە پێناسەی چەمكی پارتی لە فیكری مستەفا بارزانی-دا بریتی بووە لە چەمكی ئازادی، چۆنیش ئازاد دەببین، یان دەگەینە ئازادی، ئەوا چوارچێوەی لیژنەی ئازادی پێمان دەڵێت كە پێویستە ناوچەگەری و حزبایەتی و جیاوازیی نێوان چینەكان و كێشەی نێوان ئاغا و دەرەبەگ و جووتیار چارەسەرێكی بۆ بدۆزرێتەوە، كەواتە مێژوو وەك شاهید پێمان دەڵێت: مستەفا بارزانی ئەو كاتەی لە سلێمانییەوە بڕیاری داوە بگەڕێتەوە بۆ بارزان و شۆڕش بەرپا بكات، زۆر باش ئەو راستییەی زانیوە كە شۆڕش بە حزبێكی سیاسی هەڵناگیرسێت، كە نوێنەرایەتی گرووپێك، یان تەنیا نەتەوەو ئایینێك، یان چینێكی دیاریكراو بكات، بەڵكو شۆڕش كاتێك دروست دەبێت و بەردەوامی دەبێت، كە خودی شۆڕشەكە ببێتە چوارچێوەیەك و هەموو ئیرادەی گەل و نەتەوە كۆبكاتەوە، ئەوكات مستەفا بارزانی بیری لەوە كردووەتەوە ئەو چوارچێوەیە دروست بكات كە لە شۆڕشی بارزاندا دروستی كرد، بۆیە بیری لە دامەزراندنی پارتی وەك حزبێكی سیاسی نەكردووەتەوە.

بەڵام ئەگەر سەیری داواكەی مستەفا بارزانی بكەین كە لە دوای راگەیاندنی كۆماری كوردستانەوە داوای دامەزراندنی پارتی دەكات و سەیری ئەو سەركردایەتییە بكەین كە بۆ ئەم پارتە هەڵیبژاردووە، ئەوا مێژوو وەك شاهید پێمان دەڵێت: مانای چەمكی پارتی لە فیكری مستەفا بارزانی-دا لە چەمكی ئازادییەوە دەگۆڕێت بۆ پڕۆژەی دامەزراندنی دەوڵەت و پاراستنی ئەو دەوڵەتەش، ئەگەر لەسەر ئەم پرسەش پرسیارێكی دیكە لە مێژوو بەگشتی بكەین و بیكەینە شاهید بۆ میكانیزمی دامەزراندنی دەوڵەت و پاراستنی ئەو دەوڵەتە، ئەوا مێژوو بەمجۆرە شاهیدی لەسەر شێوازی دامەزراندنی دەوڵەت و پاراستنی ئەو دەوڵەتە دەدات و پێمان دەڵێت:
- هەر نەتەوە و گەلێك ئامانجی دامەزراندنی دەوڵەت بێت، دەبێت پێش هەموو شتێك چوارچێوەیەك دروست بكات بۆ ئەوەی حزبایەتیی تەسك و پاشاگەردانیی سیاسی كۆتایی پێ بهێنێت.

- دەبێت ئەو دەوڵەتە ببێتە چوارچێوەیەك بۆ یەكگرتنی ئیرادەی هەموو تاكەكانی نەتەوە، كە ئەم یەكگرتنە دروست بوو، پارێزگاریكردن لە دەوڵەتەكە ئاسان دەبێت.
ئەگەر لەسەر بنەمای ئەم شاهیدییەی مێژوو، سەیری ئەو ئەزموونە گەورەیە بكەین كە مستەفا بارزانی بڕیاری چوونی خۆی و پێشمەرگەكانی بۆ پاراستنی كۆماری كوردستان دا، ئەوا دەبینین لە بیركردنەوەی مستەفا بارزانی-دا، دامەزراندنی دەوڵەت و پاراستنی دەوڵەت بووەتە پڕۆژەیەك كە ئیرادەی گەلی كوردستان توانای جێبەجێكردنی ئەم پڕۆژەیەی هەیە، بۆیە لە كۆماری كوردستانەوە كاتێك لە ژێر ناوی دامەزراندنی پارتی داوای دامەزراندنی پارتی دیموكراتی كوردستان دەكات، ئەوا ئەرك و ئامانجی ئەم پارتە بریتی بووە لە:
- نەهێشتنی پاشاگەردانیی سیاسی و نەهێشتنی بیركردنەوەی تەسكی حزبایەتی و كۆكردنەوەی ئیرادەی نیشتمانی و نەتەوەیی لە چوارچێوەیەكدا كە ئەویش پارتی دیموكراتی كوردستان بووە.
- رێكخستنی ئەم ئیرادە نیشتمانی و نەتەوەییە بۆ دامەزراندنی دەوڵەتی كوردستان و پاراستنی ئەم دەوڵەتە.
لێرەوە ئەگەر جارێكی دیكە ئەم ئەرك و ئامانجانە كە بەرەنجامی شاهیدیی مێژوون، دووبارە بخەینەوە ژێر پرسیار و دیسان بپرسین: دوای رووخانی كۆماری كوردستان و چوونی مستەفا بارزانی بۆ یەكێتی سۆڤیەتی پێشوو، ئایا چەمكی پارتی لە فیكری مستەفا بارزانی-دا هەر هەمان ئەرك و ئامانجی هەبووە؟

بۆ وەڵامی ئەم پرسیارەش دیسان هەر پێویستمان بە شاهیدیی مێژوو هەیە، مێژوو وەك شاهید پێمان دەڵێت:
- دوای ئەوەی مستەفا بارزانی بە ئاوارەیی چووە یەكێتی سۆڤیەت، ئەزموونێكی دیكەی بۆ دروست بوو، بەوەی كە تەسلیمبوون بە ئەمری واقیعی داگیركاری بوونی نییە، بۆیە كاتێك نەتەوە شكستێكی بە سەردێت، دەبێت هەوڵبدات باشتر و بەهێزتر لە جاران هەستێتەوە، هەر بۆیە مێژوو وەك شاهید پێمان دەڵێت: مستەفا بارزانی لە باكۆ بەرنامەی بۆ بزووتنەوەی رزگاریخوازیی كوردستان بەو جۆرە داڕشت كە ئامانجی ئیعلانكردنی جمهوورییەتی كوردستانی گەورەیە.
- لەسەر ئاستی دیپلۆماتی بۆ زەمینەسازكردن بۆ ئەم ئامانجە، ئەو دەیزانی لە سەردەمی شەڕی سارد، سۆڤیەتی پێشوو و رۆژئاوا ناتوانن پشتگیری دەوڵەتی سەربەخۆی كوردستان بكەن، بۆیە وەك رێبەرێكی نیشتمانی و دڵسۆز بۆ نەتەوەكەی پشتگیری لە كۆنگرەی بانكۆك بۆ دامەزراندنی دەوڵەتانی جیهانی سێیەم كرد، ئەو دەوڵەتانەی كە تازە لە كۆلۆنیاڵی رزگاریان ببوو، ئەمەش مانای ئەوەیە مستەفا بارزانی هەوڵیداوە كوردستان وەك نیشتمانێكی كۆڵۆنیاڵی پیشانی سیاسەتی جیهانی بدات و، لە چوارچێوەی كۆتاییهاتنی سەردەمی ئیمپریالیزمدا، شەرعییەت بۆ دامەزراندنی دەوڵەتی كوردستان مسۆگەر بكات و پشتیوانیی دەوڵەتانی جیهانی سێهەم بۆ دەوڵەتی كوردستان دابین بكات.
ئەگەر لێرەوە بێینە ناو رووداوەكانی گەڕانەوەی مستەفا بارزانی لە 6ی ئۆكتۆبەری 1958 بۆ عێراق، ئەو پرسیارە لەو رووداوە بكەین، ئەگەر چەمكی پارتی لە فیكری مستەفا بارزانی-دا پڕۆژەی دامەزراندنی دەوڵەتە، بۆچی لە سۆڤییەت گەڕایەوە، كە هێشتا كوردستان هەلی دامەزراندنی دەوڵەتی بۆ هەڵنەكەوتبوو؟

بۆ وەڵامدانەوەی ئەم پرسیارەش، ئەمجارە مێژوو وەك شاهید خۆی پرسیارێك ئاراستەی ئەو پرسیارە دەكات و لێمان دەپرسێت: مستەفا بارزانی لەسەر چ بنەمایەك لە سۆڤیەتەوە گەڕایەوە بۆ عێراق؟ بێگومان هەر مێژوو وەك شاهید پێمان دەڵێت، دوای رووخانی رژێمی پاشایەتی بە رێگەی كودەتا لەلایەن پۆلێك ئەفسەری عێراقییەوە بە سەرۆكایەتی عەبدولكەریم قاسم، خەڵكی عێراق لە كوردستانیشەوە، ئەو كودەتایەیان وەك شۆڕش سەیر كرد، نەك تەنیا كودەتا، ئەمەش لەبەر ئەوە بوو، كودەتاكەی عەبدولكەریم قاسم تەنیا گۆڕینی دەموچاوێك نەبوو، بە دەموچاوێكی دیكە، بەڵكو شۆڕشێك بوو لە بیركردنەوەی عەرەبی عێراق بەرامبەر بە مافەكانی گەلی كوردستان و ناسنامەی نیشتمانێك كە كوردستانە و راشكاوانە لەو دەستوورە كاتییەی دوای شۆڕشی 14 ی تەموزی 1958 نووسراوەتەوە، هاتووە كە عێراق نیشتمانی هاوبەشی كورد و عەرەبە، ئەمەش مانای ئەوەیە مستەفا بارزانی لەسەر ئەو بنەمایە گەڕاوەتەوە كە گەلی كوردستان بە خاوەنی نیشتمانێكی هاوبەش دەكرێت، ئەم دوو نەتەوەیە پێكەوە ئەم نیشتمانە هاوبەشە بەڕێوە دەبەن. هەر بۆیەشە دوای ئەوەی عەبدولكەریم قاسم لە ژێر كاریگەریی فیكری شۆڤێنی عەرەبی لە دەستوورە كاتییەكە پاشگەز بووەوە، گەلی كوردستان شۆڕشی ئەیلوولیان هەڵگیرساند و مستەفا بارزانی رێبەرایەتیی ئەو شۆڕشەی كرد، هەتا لە ئاداری 1970 رێككەوتنی ئاداری بۆ مافی ئۆتۆنومی لە كوردستان لەگەڵ رژێمی پێشووی بەعس ئیمزا كرد.
بەڵام پرسیاری دیكە ئەوەیە: ئایا پارتی لە پڕۆژەی دەوڵەتەوە نەگۆڕا بۆ پڕۆژەی ئۆتۆنۆمی؟ وەڵامی ئەم پرسیارەش مێژوو وەك شاهید دەیداتەوە و دەڵێت: ئەگەر یەكێك بە وردی تەواوی بڕگەكانی رێككەوتنی ئادار بخوێنێتەوە كە دوای چوار ساڵ رژێمی بەعس لێی پاشگەز بووەوە، ئەوا بە راشكاوی دەگاتە ئەو قەناعەتەی كە رێككەوتنی ئادار هەنگاوی یەكەم و دانانی بەردی بناخەی دەوڵەتی كوردستانە، لەبەر ئەم هۆكارانە:
- ئەگەر رێككەوتنی ئادار جێبەجێ بكرایە، سنووری باشووری كوردستان دیاری دەكرا و حكومەتی عێراق دانی بە سنووری جوگرافی و مێژوویی ئەم بەشەی كوردستاندا دەنا، بە كەركووكی دڵی كوردستانیشەوە.
- لە رێككەوتنی ئاداردا دان نراوە بە مافی هەموو نەتەوە و ئایینەكانی كوردستاندا و مافی هەموو لایەكیان دیاری كراوە.
- لە رێككەوتنی ئاداردا هەیكەلی حكومەتێكی لۆكاڵی بۆ بەڕێوەبردنی كوردستان دیاری كرا، كە هەر سێ كۆڵگەكەی دەوڵەت لەخۆی دەگرێت، كە بریتین لە دەسەڵاتەكانی (یاسادانان، جێبەجێ كردن، دادوەری)، هەر دوو ئەنجومەنی (یاسادانان و جێبەجێكردن)یش دەبوو راستەوخۆ لەلایەن گەلی كوردستانەوە هەڵبژێردرێن.
- لەبەر ئەوەی رێككەوتنی ئادار بەردی بناخەی دامەزراندنی دەوڵەتی كوردستان بوو، كاتێك لە ساڵی 1974 شەڕ لە نێوان شۆڕش و رژێمی بەعس هەڵگیرسایەوە، سەركرداییەتی شۆڕشی ئەیلوول لیژنەیەكی دامەزراند بۆ ئەوەی ناوەرۆكی رێككەوتنی ئادار بگۆرێت بۆ پڕۆژەی دروستكردنی هەرێمی فیدڕاڵی كوردستان لە عێراقدا، زیاد لەمەش شەخسی مستەفا بارزانی و سەركردایەتیی شۆڕشیش لە هەوڵی بەدەستهێنانی پشتگیری نێودەوڵەتی بوون بۆ ئەوەی لە كاتێكی گونجاودا دەوڵەتی كوردستان رابگەیەنن.
ئەوەی جێگەی خۆشحاڵییە ئەوەیە كە ئەم مێژووە و بەردەوامیی ئەم فیكرە ئێستاش وەك ئەو كاتەی كە چەمكی پارتی لە فیكری مستەفا بارزانی-دا بووە، پێش ئەوەی پارتی دیموكراتی كوردستان دابمەزرێت، بەردەوامی هەیە، ئەمەش زۆر بە بوێری و راشكاوانە لە رەفتار و گوتاری بەڕێز مسعود بارزانی دەیبینین و گوێمان لێی دەبێت.


پارتی وەك مێژوویەكی بەردەوام
بۆ گرێدانەوەی رابردوو بە ئێستاوە
وەك لە یار و یاوەرانی مستەفا بارزانی-یەوە گوێمان لێ بووە، لە سەردەمی رێبەرایەتی مستەفا بارزانی، پارتی هەر جێگەی رەخنە بووە و بەردەوامیش رەخنەی لێگیراوە، سەرچاوەی ئەم رەخنانەش لەوەوە سەرچاوەی گرتووە، بەردەوام هەڵسەنگاندن لەسەر پارتی لەسەر دوو وێنە كراوە، وێنەی یەكەم چەمك و پێناسەی (پارتی)یە لە فیكر و بیركردنەوەی مستەفا بارزانی، وێنەی دووەم شێوازی سیاسەتی پراكتیكی پارتییە كە كۆی ئەو بوارانە پڕناكاتەوە كە لە فیكری بارزانی-دا دەبێت پڕیان بكاتەوە.
مستەفا بارزانی بۆ ئەوەی باری لاسەنگی پارتی وەك كۆڵەگەی بزووتنەوەی رزگاریخوازیی كوردستان راست بكاتەوە و بۆ ئەوەی پارتی بتوانێت ئەو ئەركە مێژووییە سەختەی كە كەوتووەتە سەرشانی بە سەركەوتوویی بیگەیەنێتە مەنزڵ، بارەگای بارزانی دامەزراندبوو، بۆ ئەوەی ئەو بوارانەی كە پارتی ناتوانێت پڕیان بكاتەوە، ئەو دامەزراوەیە پڕیان بكاتەوە، یان ئەو هاودژییەی لە ئاكامی سیاسەتی پارتی لەگەڵ حزبە سیاسییەكانی دیكە، یان تەنانەت هۆزێك، یان گرووپێك، یان تاكێكیش دروستی دەكات، بارەگای بارزانی ئەو هاودژییانەی ئاشت دەكردەوە و ئەركی سەرشانی پارتی بۆ بەڕێوەبردنی شۆڕش ئاسان دەكرد و كۆی تواناكانیشی لەگەڵ تواناكانی پارتی بۆ بەردەوامیی شۆڕش پێكەوە كۆدەكردەوە.
جوانیی پارتی دیموكراتی كوردستان لەو خاڵەدا بەرجەستە دەبێت، كە چەند مەرجێكی فەرزكراوی فیكری مستەفا بارزانی لەسەر خۆی قبووڵ كردووە، هەرە گرنگەكەیان ئەوەیە، بە هەق و بە ناهەق رەخنە لە كۆی سیاسەتی پارتی بگیرێت، ئەوجا ئەوەی رەخنەكە دەگرێت، كادری حزب بێت، یان هاووڵاتیەك، ئەوا پارتی وەك دامەزراوەیەك ملكەچ دەبێت، گوێ لەو رەخنانە بگرێت و وەڵامدانەوەشی هەبێت و، نابێت لەسەر رەخنەگرتن ئەوجا رەخنەكە لەسەر هەر بوارێكی ژیانی كۆمەڵگە بێت، یان لە سەر ئۆرگانەكانی پارتی بێت، هیچ كەسێك سزا بدرێت، یان رەفتاری ناشیرین و ناجۆری لەگەڵدا بكرێت.
بەڵام پرسیار لێرەدا ئەوەیە ئایا ئەم مەرجە فەرزكراوەی فیكری بارزانی لەسەر پارتی وەك دامەزراوەیەك لە چییەوە سەرچاوەی گرتووە؟ یان ئایا پێش ئەوەی ئەم مەرجە لەسەر پارتی فەرز بكرێت، مستەفا بارزانی بەسەر نەفسی خۆیدا فەرزی كردووە؟ دیارە مێژوو وەك شاهید لە وەڵامی ئەم پرسیارەشدا پێمان دەڵێت: جیا لەوەی مستەفا بارزانی شێوازێكی بیركردنەوەی عارفانەی هەبووە كە هەموو كات هەوڵیداوە خۆی هەڵەكانی خۆی راست بكاتەوە و خێر و چاكە لە كۆمەڵگە بڵاوبكاتەوە، وەك رێبەر و كاریزمای نەتەوەیەكیش چەند تایبەتمەندییەكی دیاری هەبووە لە بریتی بوون لە: (راستكردنەوەی هەڵەكانی خۆی لەلایەن خۆیەوە، متمانە بە خۆبوون و متمانە بە ئیرادەی گەلەكەی، بڕوابوون بەوەی هەموو تاكەكانی نەتەوە بە جیاوازی ئایین و نەتەوە و بۆچوونی سیاسیشەوە، مرۆڤن و دەبێت رێز لە كەرامەتی مرۆڤ بگیرێت)، كەواتە نەك هەر مەرجی رەخنەگرتنی لەسەر نەفسی خۆی فەرز كردبوو، بەڵكو مستەفا بارزانی وەك رێبەر كۆمەڵێك مەرجی دیكەشی بەسەر نەفسی خۆیدا فەرز كردبوو، لەوانە:

- فەرزی كردبوو كە ژینگەی كوردستان مافی بە سەرمانەوە هەیە و دەبێت ژینگەیەكی پاك و جوانمان هەبێت و نابێت كەس دار ببڕێتەوە.
- فەرزی كردبوو ئەو ئاژەڵ و گیانەوەر و پەلەوەرانەی ژینگەی كوردستان جوان دەكەن، نابێت راو بكرێن و دەبێت پارێزگارییان لێ بكرێت.
- فەرزی كردبوو هەر كەسێك غەدر لە بەرامبەرەكەی بكات، ئەوجا باوك بێت لە كچەكەی، برا بێت لە خوشكەكەی، پێشمەرگە بێت لە هاووڵاتی، بەرپرس بێت لە كارمەندەكەی، غەدار هەر غەدارە و دەبێت وەك غەدار سەیر بكرێت و غەدرەكەش دەبێت لەسەر غەدر لێكراو هەڵبگیرێت.
- بارزانی رای وابوو دەبێت هەموو تاكێكی كۆمەڵگە ملكەچی یەك دەسەڵات بێت، ئەویش دەسەڵاتی یاسایە، بۆیە لە هەموو ناوچە ئازادكراوەكانی شۆڕشدا بێجگە لە یاسا و دادگا، كەسی دیكە دەسەڵاتی نەبوو.
ئەمانەو چەندین مەرجی فەرزكراوی دیكە كە مستەفا بارزانی پێش هەر كەسێك لەسەر نەفسی خۆی فەرزی كردبوو، لەلایەن پارتییەوە زۆر جاران وەك پێویست جێبەجێ نەدەكران، بۆیە رەخنە لە پارتی دەگیران.
بۆ ئێستای پارتی كە لە ژێر سایەی رێبەرایەتی مسعود بارزانی هەمان مێژوو و هەمان فیكری مستەفا بارزانی بەردەوامی هەیە، دەبینین ئێستا لە هەموو كاتێك زیاتر رەخنە لە پارتی دەگیرێت و، پارتییش لە ژێر زەبری مەرجە فەرزكراوەكانی فیكری مستەفا بارزانی-دا درێژەی بە نەفەسدرێژی و سینگفراوانیی خۆی داوە، ئەمە لەگەڵ ئەوەی رەخنەكانی ئەم سەردەمە وەك رەخنەكانی سەردەمی مستەفا بارزانی نین و گەلێك جار غەدریش لە پارتی دەكرێت، بەڵام مسعود بارزانی نەك هەوڵیداوە كە بەرپەرچی رەخنەكان بداتەوە، بەڵكو بە هەمان شێوازی بیركردنەوەی مستەفا بارزانی بڕیاری داوە دووبارە بارەگای بارزانی دابمەزرێنێتەوە، بۆ ئەوەی ئەم بارەگایە نەك هەر ببێتە هێزێكی مەعنەوی بۆ ئەوەی ئەركی سەرشانی پارتی سووك بكات، بەڵكو بۆ ئەوەیە ئەم بارەگایە ببێتە هێزێكی مەعنەوی بۆ هەموو حزب و لایەنە سیاسییەكان و یەكە كەی تاكەكانی كوردستان و بۆ ئەوەیە جیاوازییەكان پێكەوە ئاشت بكاتەوە و پێكەوە هەڵەكانی خۆمان راست بكەینەوە و خۆشگوزەرانی و ئاشتی و ئاسایش بۆ گەلی كوردستان دابین بكرێت.