رۆژنامه‌ى توده‌ى زه‌مان كه‌ به‌زمانى ئینگلیزى له‌ توركیا ده‌رده‌چێت به‌م ناونیشانه‌ بانگهێشتى فه‌رمى حكومه‌تى توركیاى بۆ سه‌ردانى سه‌رۆك بارزانى بۆ توركیا بلاَوكردۆته‌وه‌( Former foe Barzani formally invited to visit Turkey) ئه‌م تایتڵه‌ ماناى ئه‌وه‌یه‌ ئه‌و بارزانییه‌ى پێشتر وه‌ك نه‌یار سه‌یر ده‌كرا, ئه‌مرِۆ به‌فه‌رمى داوه‌تى توركیا ده‌كرێت, وه‌ك پرۆفیسۆر حوسێن باغچیش بۆ ئه‌م راپۆرته‌ پێى راگه‌یاندین, له‌م سه‌ردانه‌یدا بارزانى بۆ توركیا حكومه‌ت و ده‌وڵه‌تى توركیا باسى داهاتووی هه‌رێمى كوردستان و عێراق و ناوچه‌كه‌ له‌گه‌ڵ بارزانى ده‌كه‌ن, هه‌ر به‌ هه‌مان ده‌ربرِینى باغچى بۆ گولاَن , ئه‌م سه‌ردانه‌ واته‌ توركیا هه‌رێمى كوردستان و سه‌رۆكى هه‌رێمى كوردستان وه‌ك هاوشانى حكومه‌تى توركیا و سه‌رۆك كۆمارى توركیا سه‌یر ده‌كات,وه‌زیرى ده‌ره‌وه‌ى توركیاش داود ئه‌حمه‌د ئۆغلۆ له‌ پرێس كۆنفرانسێكدا راشكاوانه‌ رایگه‌یاند كه‌ داوه‌تنامه‌ى حكومه‌تى توركیا گه‌یشتۆته‌ ده‌ست بارزانى و له‌ ئایینده‌یه‌كى نزیكدا سه‌رۆكى هه‌رێمى كوردستان سه‌ردانى ئه‌و ولاَته‌ ده‌كات.
بایه‌خ و گرنگى داوه‌تنامه‌ فه‌رمیه‌كه‌ى حكومه‌تى توركیا بۆ سه‌رۆك بارزانى ئه‌وه‌ بۆ یه‌كه‌مجار نییه‌ یه‌كێك له‌ حكومه‌ته‌كان داوه‌تى فه‌رمى سه‌رۆكى كوردستان بكات, جێگه‌ى ئاماژه‌ پێكردنه‌ سه‌رۆك بارزانى هه‌ر له‌سه‌ره‌تاى ئه‌مساڵدا به‌داوه‌تى فه‌رمى سه‌رۆك ئۆباما سه‌ردانى واشنتۆنى كردوو، له‌مانگى رابردووشدا به‌ داوه‌تى فه‌رمى شاعه‌بدوڵلاَ سه‌ردانى عه‌ره‌بستانى سعودیه‌ی كرد, هه‌روه‌ها به‌داوه‌تى فه‌رمى سه‌رۆك وه‌زیرانى لوبنان سه‌عد حه‌ریرى سه‌ردانى لوبنانى كردوو، ئێستاش به‌ فه‌رمى له‌لایه‌ن به‌رِێز ساركۆزى سه‌رۆك كۆمارى فه‌ره‌نساوه‌ داوه‌تى فه‌رمى كراوه‌ كه‌سه‌ردانى فه‌ره‌نسا بكات و به‌رِێزى داوه‌تنامه‌كه‌ى سه‌رۆك ساركۆزى قبوڵ كردووه‌.به‌لاَم سه‌ردانى سه‌رۆك بارزانى بۆ توركیا بایه‌خ و تایبه‌تمه‌ندیى دیكه‌ى هه‌یه‌, ئه‌و بایه‌خ و تایبه‌تمه‌ندیه‌ش له‌وه‌یه‌دایه‌ كه‌ ئه‌م سه‌ردانه‌ فه‌رمیه‌ى به‌رِێز مسعود بارزانى سه‌رۆكى هه‌رێمى كوردستان بۆ توركیا دواى چه‌ند ساڵى ته‌نگژه‌ و ناخۆشى له‌ پێوه‌ندییه‌كانى نێوان هه‌رێمى كوردستان و توركیا دێت, بۆیه‌ ئه‌م سه‌ردانه‌ نیشانه‌ى ئه‌وه‌یه‌ كه‌ پێوه‌ندییه‌كانى نێوان توركیا و هه‌رێمى كوردستان به‌ره‌و ئاراسته‌یه‌كى ئیجابى ئه‌وتۆ هه‌نگاو هه‌ڵده‌گرن كه‌ ئاستى سیاسیى و دبلۆماتیش ده‌گرێته‌وه‌, لێره‌دا جێگه‌ى خۆیه‌تى ئاماژه‌ به‌وه‌ بكه‌ین كه‌ ئه‌و جۆره‌ سیاسه‌ته‌ى سه‌رۆك بارزانى له‌سه‌ر ئاستى ناوچه‌كه‌ و هه‌رێمى كوردستان پیاده‌ى ده‌كات, بۆته‌ هۆكارێك بۆ ئه‌وه‌ى زمانى لێكتێگه‌یشتن و چاره‌سه‌رى ئاشتیانه‌ى كێشه‌كان , جێگه‌ى هه‌رِه‌شه‌ى سه‌ربازى و گه‌رِان به‌دواى چاره‌سه‌رى سه‌ربازیدا بگرێته‌وه‌, هه‌ر ئه‌م شێوازه‌ى سیاسه‌تى سه‌رۆك بارزانیشه‌ كه‌ له‌سه‌ر ئاستى ئیقلیمى و نێوده‌وڵه‌تیى پێگه‌و شكۆى هه‌رێمى كوردستانى به‌ ئاستێك به‌رز كردۆته‌وه‌, كه‌ له‌ هه‌موو هاوكێشه‌ سیاسیه‌كاندا به‌وردى پێگه‌ى هه‌رێمى كوردستان بخوێنرێته‌وه‌.
بۆ به‌دواداچوونى ئه‌م پرسه‌ گرنگه‌ ئێمه‌ له‌گه‌ڵ چه‌ند رۆژنامه‌نووس و كه‌سایه‌تییه‌كی ئه‌كادیمى توركیا قسه‌مان كردووه‌, كه‌سه‌باره‌ت به‌ سه‌ردانه‌كه‌ى سه‌رۆك بارزانى و داهاتووی پێوه‌ندییه‌كانى نێوان هه‌رێمى كوردستان و توركیا راشكاوانه‌ راى خۆیان بۆ گولاَن به‌م شێوه‌یه‌ ده‌ربرِیوه‌.