ئەمڕۆ چوارشەممە وەزارەتی تەندروستی و ژینگەی عێراق رایگەیاند بەم زووانە ڕێوشوێنی نوێ و توندتری وەك قەدەغەكردنی هاتوچۆ، بۆ خۆپاراستن لە پەتای ڤایرۆسی كۆرۆنا رادەگەیەنن.

روبا فەلاح بەڕێوەبەری پەیوەندییە گشتییەكانی وەزارەتی تەندروستی و ژینگەی عێراق ئاشكرای كرد وەزارەتەكەیان چەند راسپاردەیەكی بۆ لیژنەی باڵای تەندروستی و سەلامەتی نیشتمانیی عێراق بەرز كردووەتەوە، بۆ ئەوەی لە كۆبوونەوەی داهاتوودا وتوێژی لەسەر بكەن و بكرێنە بڕیار.

گوتیشی راسپاردەكان بە شێوەیەكن كە ڕێوشوێنەكانی خۆپاراستن لە كۆرۆنا توندتر بكرێن، ئەگەر هاووڵاتییان بەردەوام بن لە پشتگوێخستنی ڕێوشوێنەكانی خۆپاراستن و پابەند نەبوون پێیانەوە.

روبا فەلاح هەروەها ئاماژەی بەوە داوە كە لە رۆژانی داهاتوودا قەدەغەكردنی هاتوچۆ لە چەند شوێنێك یان قەدەغەی گشتیی هاتوچۆ رادەگەیەندرێت، لەمبارەیەوە ڕێژەی تۆماری تووشبووانی نوێی پەتای ڤایرۆسی كۆرۆنا لە ماوەی رۆژانی داهاتوودا دەكرێتە پێوەر.












باسنيوز