ئه‌ندامێكی ئه‌نجوومه‌نی نوێنه‌رانی عێراق له‌ لیستی پارتی دیموکراتی کوردستان ئاشکرای کرد‌ هه‌فته‌ی داهاتوو ده‌نگ‌ له‌سه‌ر پرۆژەیاسای‌ بودجه‌ی2021ی عێراق ده‌درێت و هێشتا ڕێككه‌وتنی كۆتایی له‌گه‌ڵ هەرێمی كوردستان نه‌كراوه‌.

دیار ته‌یب، ڕایگەیاند: "بڕیارە هه‌فته‌ی داهاتوو لە ئەنجوومەنی نوێنەرانی عێراق ده‌نگ له‌سه‌ر پرۆژەیاسای‌ بودجه‌ی2021ی عێراق بدرێت و بۆ پشكی هەرێمی كوردستانیش لە پرۆژەیاساکەدا سێ پێشنیاز، یان سێ ئاراسته‌ هه‌یه کە‌ به‌شێكیان داوا ده‌كه‌ن لەلایەن هەرێمی کوردستانەوە ڕۆژانە له‌سه‌رووی 400 هه‌زار به‌رمیل نه‌وت بدرێته‌ سۆمۆ و‌ به‌شێكشیان داوای ته‌واوی دۆسیه‌ی نه‌وت ده‌كه‌ن و پێشنیازی دیكه‌ش هه‌یه‌ بۆ لێکتێگه‌یشتنی مام ناوه‌ند له ‌نێوان ئه‌و دوو بژاردەیەدا‌".

ئەو پەرلەمانتارە گوتیشی: "پێشبینی ده‌كرێت ماده‌ی 10 و 11 ی پرۆژەیاساکە وه‌ك خۆی بڕوات كه‌ په‌یوه‌ندیی به‌ پشكی هەرێمی كوردستانه‌وه‌ هه‌یه‌ و ئیێستاش شاندی هەرێمی كوردستان گه‌ڕاونه‌ته‌وه‌ گفتوگۆ لەبارەی بژارده‌كانەوە ده‌كه‌ن".

پسپۆڕانی بواری دەستوور پێیان وایە ئەو ڕوانگە و داوایەی بەغدا کە داوای ڕادەستکردنی هەموو نەوتی هەرێمی کوردستان دەکات، نادەستوورییە.

لەمبارەوە پێشتر سەڵاحەدین ئەحمەد، پسپۆڕی بواری دەستوور رایگەیاندبوو: "داوای بەغدا بۆ رادەستکردنی تەواوی دۆسیەی نەوت، داوایەکی نادەستوورییە، ئەمەش لە ماددەی ١١٠ی دەستووردا بە ئاشکرا خراوەتە ڕوو کە دەڵێت ئەو بیرە نەوتانەی کە کۆنن، بە ھاوبەشی لە نێوان ھەولێر و بەغدا، یان ھەرێمەکان و پارێزگاکان بەڕێوە دەبرێن".

ئەو پسپۆڕەی یاسای دەستووری، لەبارەی ئەو داواکارییەی بەغدا، یان هەندێك لە پەرلەمانتارە كوردە نەیارەكانی هەرێمی كوردستان، گوتی: "ئەوە داواکارییەکی نادەستووری و نایاساییە، ئەوان دەیانەوێت فشاری زیاتر بخەنە سەر ھەرێمی کوردستان بۆ ئەوەی ھەرێمی کوردستان ملکەچی داواکارییەكانیان بكەن".












باسنیوز