ئێوارەی دوێنێ فڕۆکەی هاوپەیمانیی نێودەوڵەتی لە سنووری داقووقی سەر بە پارێزگای کەرکووک، بۆردومانی تیرۆریستانی داعشیان کردووە و حەوت چەکداری داعش کوژراون.

لویس خزر، قایمقامی قەزای داقووق، ئەمڕۆ چوارشەممە 13ی1ی2021 ڕاگەیاند: "ئێوارەی دوێنێ تا درەنگانی شەوی ڕابردوو فڕۆكەی هاوپەیمانان بۆ جاری دووەم لە یەک هەفتەی ڕابردوودا پێگە و حەشارگەکانی تیرۆریستانی داعشیان لە سنووری داقوق كردووەتە ئامانج."

گوتیشی: "سەرباری كوژرانی حەوت چەكداری تیرۆریست، هاوكات تونێلێكی 10 مەتری تیرۆریستانیش ئاشكرا بووە كە بەمەبەستی خۆحەشاردان تیرۆریستان لەژێر زەوی هەڵیان کەندبوو."

قایمقامی قەزای داقووق ڕاشی گەیاند: "لە ماوەی ئەم هەفتەیەدا ئەوە دووەم هێرشی ئاسمانیی هێزی فڕۆکەی هاوپەیمانە بۆ سەر تیرۆریستانی داعش."

لە ڕاۆژانی ڕابردوشدا سێ سەرکردەی تیرۆریستانی داعش هەر لە سنووری داقووق کوژراون.











باسنيوز