کوتلەی بەدر: پرۆژەیاسای بودجەی عێراق رەت دەکەینەوە
عودەی شەعلان ئەبولجون، پەرلەمانتاری بەدر بە (سۆمەرییە نیوز)ی راگەیاندووە، حکوومەت، وەزارەتی دارایی و بانکی ناوەندیی عێراق یاری بە ئاگر دەکەن و پەندیان لە ئەزموونەکانی پێشوو وەرنەگرتووە، ”دەیانەوێ بەڕووی گەلی عێراق بووەستن“.
عودەی شەعلان ئەبولجون هەروەها رایگەیاندووە، ئەگەر لەپرۆژەیاسای بودجەی گشتیی عێراق بۆ ساڵی 2021 دەرماڵەی فەرمانبەران کەم کرابێتەوە و بەهای یەک دۆلار کرابێتە هەزار و 450 دینار، ئەوا ئەوان دەنگ بە پرۆژەیاساکە نادەن و رەتی دەکەنەوە.
ئەو پەرلەمانتارە ئاماژەی بەوەش کردووە، کە دەست بە کۆکردنەوەی واژۆی پەرلەمانتاران بۆ رەتکردنەوەی پرۆژەیاساکە و ناردنەوەی بۆ ئەنجوومەنی وەزیران، دەکات.
ئەبولجون پێیوایە چاکسازییەکانی حکوومەتی عێراق نالۆژیکین و ئەنجامی کارەساتباریان دەبێت، چونکە ”حکوومەتی عێراق بەو چاکسازییە پاڵپشتیی گەندەڵان و دژایەتیی هەژاران دەکات“.
هەروەک ئەو پەرلەمانتارە رایگەیاندووە، بڕیاری دابەزاندنی بەهای دینار لە پرۆژەیاسای بودجەی گشتیی عێراق بۆ بەرژەوەندیی ”مافیا گەندەڵەکان و چەند وڵاتێک دراوە، کە هیوای خێر بۆ عێراق ناخوازن“.
باسنيوز
