مەكتەبی سكرتاریەتی یەكێتی ئافرەتانی كوردستان لە (121)ـەمین ساڵیادی رۆژنامەگەریی كوردیدا و لە هۆڵی سەنتەری رۆشنبیریی زانكۆی سەلاحەدین و بە سپۆنسەری میدیایی كوردستان 24، كۆنفرانسێكی زانستی بە ناونیشانی (پرسی ئافرەت لە میدیای كوردیدا) بەڕێوەبرد، لە میانی كۆنفرانسەكەدا (٤) پانێڵ لە تەوەرەكانی (باڵانسی جێندەری لە میدیای كوردیدا، میدیا و بزووتنەوەی ئافرەتان، وێنای ئافرەت لە راگەیاندنی كوردیدا و ئاڵنگارییەكانی بەردەم میدیاكارانی ئافرەت) لەلایەن مامۆستایانی زانكۆ و شارەزایانی بواری میدیا و جێندەر و كۆمەڵناسی پێشكەش كران.

جارێكی دیكە لە 3ی تەمموزی ٢٠١٩ لە مەكتەبی سكرتاریەتی یەكێتی ئافرەتانی كوردستان، بە ئامادەبونی كەسانی پسپۆڕ و بەئەزموونی بواری میدیا، دیدارێك بە مەبەستی گفتوگۆكردن لە بارەی راسپاردە و دەرەنجامەكانی كۆنفرانسی (پرسی ئافرەت لە میدیای كوردیدا) رێكخرا، لەم دیدار و كۆبوونەوەیەدا دەربارەی چۆنیەتی هەنگاونان بۆ بەكردەیی كاركردن بۆ جێبەجێكردنی راسپاردەكان و هەنگاوەكان گفتوگۆ كرا.
هەر لەو بارەیەوە د.ڤیان سلێمان سكرتێری یەكێتی ئافرەتانی كوردستان تایبەت بۆ گوڵان گوتی: «رۆژی3ی تەمموزی ٢٠١٩؛ لە مەكتەبی سكرتاریەتی رێكخراوەكەمان، لە رێكخستنی دیدارێكدا بە ئامادەبوونی كەسانی پسپۆڕ و بەئەزمونی بواری میدیا و پرسی ئافرەت بۆ مەبەستی گفتوگۆكردن لە بارەی راسپێری و دەرەنجامەكانی كۆنفرانسی (پرسی ئافرەت لە میدیای كوردیدا)، كە هاوكات بوو لەگەڵ ساڵیادی رۆژنامەگەریی كوردیدا و رێكخراوەكەمان بەڕێوەی برد، لەو كۆبوونەوەیەدا گفتوگۆ كرا دەربارەی چۆنیەتی هەنگاونان بۆ بە كردەیی كاركردن بۆ جێبەجێكردنی راسپاردەكان و هەماهەنگی لەگەڵ دەزگاكانی راگەیاندن بۆ مەبەستی بەرەوپێشبردنی گرنگیدان بە ئافرەت و پرسی ئافرەت و وێناكردنی پێگەی بۆ رای گشتی لە كەناڵەكانی راگەیاندنەوە، سوپاس بۆ بەشداری پڕ بەها و بەسوودی مامۆستا و شارەزایانی بەشداربوو، هەروەها بۆ كەناڵەكانی راگەیاندن بۆ رووماڵكردنی ئەم چالاكییە و چالاكییەكانی دیكەمان.» گوتیشی: «یەكێتی ئافرەتانی كوردستان وەك رێكخراوێكی داكۆكیكار لە مافی ئافرەت، هەوڵ دەدات لە هەر بوارێكدا كاریگەری هەبێت لەسەر پێشكەوتن و كرانەوەی زیاتری كۆمەڵگە رۆڵی جدی هەبێت، لەم نێوەندەشدا راگەیاندن، نەك تەنیا وەك ئامرازێكی گواستنەوەی هەواڵ و زانیاری و گوزارەكردن لە بیروبۆچوون، بەڵكو وەك یەكێك لە هەرە گرنگترین ئامرازە كاریگەرەكان لەسەر كۆمەڵگە و دروستكردنی رای گشتی فاكتەرێكی سەرەكییە بۆ پێشكەوتنی كۆمەڵگە. لەم سۆنگەیەوە یەكێتی ئافرەتانی كوردستان گرنگییەكی زۆر بە راگەیاندن دەدات و لە رێگەی چەندین ئامراز هەوڵدەدات رای گشتی لەبارەی پرسی ئافرەت هۆشیار بكاتەوە، لە سۆنگەی هەستكردن بەو كەموكورتییانەی كە لە میدیای كوردیدا بەدی دەكرێت، لە چۆنیەتی مامەڵەكردن لەگەڵ پرسی ئافرەت و ئاستی بەشداریی كەناڵەكانی راگەیاندن، سەرەڕای پێشكەوتنە بەرچاوەكانی خانمان، سەرەڕای بوونی هەندێك خاڵی ئەرێنی و بەرزبوونەوەی رێژەی بەشداریی ئافرەت لە میدیای كوردی بەراورد بە ساڵانی پێشتر، بەڵام تا ئێستا زۆربەی هەرە زۆری بەڕێوەبەری دەزگاكانی راگەیاندن پیاوانن، زۆرجار كەناڵەكانی راگەیاندن سەرەڕای بانگەشەكانیان بۆ دیموكراسی و پێشكەوتن بەرپرسیارانە و پڕۆفیشناڵانە مامەڵ لەگەڵ پرسی ئافرەت ناكەن و بوار نادەن عەقڵ و دنیابینی ئافرەت بەشدارییەكی كارا لە رەوتی بەڕێوەبردنی كەناڵەكە بكات، یەكێتی ئافرەتانی كوردستان لەم كۆنفڕانسەدا ئامانجی دروستكردنی پردی پەیوەندییە لەنێوان رێكخراوەكان، بزووتنەوەی ئافرەتان بەتایبەتی و دەزگاكانی راگەیاندن بەگشتی، بۆ داڕشتنی گوتارێكی هاوسەنگ بۆ پشتیوانی پرسی ئافرەت لە كۆمەڵگەی كوردیدا.»
سەبارەت بە پێشنیار و بڕیار و راسپاردەكانی كۆنفرانسەكەشیان كە لەژێر ناوی (پرسی ئافرەت لە میدیای كوردیدا) بەڕێوەچوو، سكرتێری یەكێتی ئافرەتانی كوردستان گوتی: «یەكەم خاڵ دروستكردنی بۆردێك لەگەڵ ئەنجومەنی باڵای راگەیاندن بوو. راسپاردەكانیش بریتی بوون لە چوار خاڵ، یەكەم: پێشكەشكردنی پرۆپۆزالی ئەنجومەنی باڵای میدیا، دووەم: دانانی بۆردێك بۆ چاودێریكردنی كەناڵەكانی میدیا لە سەر پێگە و رۆئیای ئافرەت، سێیەم: داواكردن لە وەزرارەتی خوێندنی باڵا و توێژینەوەی زانستی كە ژمارەی كورسییەكانی بەشی راگەیاندنی زانكۆ و پەیمانگەكان بۆ ئافرەت وەرگرتن زیاتر بكات، چوارەم: داوا بكرێت وەزارەتەكان سیاسەتی یەكسانی دابڕێژن.»