بەشێك لە پیاوانی بازرگان و شوفێرە ترانزیتییەكان كە بەردەوام سەفەری دوورو درێژیان بۆ وڵاتانی دیكە هەیە، كارەكەیان بۆ هۆكارێك بۆ فرەژنی دەزانن و ئەوەش زۆر جار كێشەی خێزانی لێكەوتووەتەوە، مامۆستایەكی ئایینیش جەخت لەوە دەكاتەوە كە «زەواجی كاتیی حەرامەو تەنیا مسیار رێپێدراوە، بەڵام ئەویش كێشەی كۆمەڵایەتی لێ دەكەوێتەوە».


«خۆم كاری بازرگانی دەكەم و بەردەوام سەردانی وڵاتی چین دەكەم، هەندێ جار كارەكەم وایە ماوەی مانگێك ناگەڕێمەوە، ناكرێ هاوسەرەكەشم لەگەڵ خۆم بەرم، لەو سەفەرانەشدا تەنیایی زۆر ئازاری دەدام، لە ژیانیشمدا شوكر بۆ خوا كاری حەرامم نەكردووە، بۆیە ناچار بووم هاوسەرگیری بكەم لەگەڵ ئافرەتێكی چینی كە موسڵمان بووە، ئەو ئێستا هاوسەری دووەممە، هەردوولا رێككەوتین زەواجی مسیار بكەین و منداڵیشمان نەبێ، هاوسەرەكەشم ئاگادارە، دوای ئەوەی جۆری هاوسەرگیرییەكەم بۆ باسكرد، لای ئاسایی بوو، بەو مەرجەی منداڵمان نەبێ».

ئەوە دەستپێكی قسەكانی بەكر خۆشناوی تەمەن (34)ساڵ بوو. وەك خۆی باسیكرد لە وڵاتی چین هەندێ گەڕەكی موسڵمان نشین هەیە، كە ناتوانن كچەكانیان بەخێو بكەن، بۆیە زۆربەیان بە شێوەی كاتی، یان هاوسەرگیری مسیار شوو بە پیاوانی بازرگان و موسڵمانی دەوڵەمەند دەكەن، تەنیا بەوەی پێداویستی ژیانیان دابین بكەن. بەكر دەڵێت «زۆربەی بازرگانەكانی و وڵاتانی ئیسلامی ئەو جۆرە هاوسەرگیرییە دەكەن بۆ ئەوەی تووشی گوناە و زینا نەبن».

سۆران باییز تەمەن 26 ساڵەو خوێندەڤانی دواقۆناغی زانكۆیە لە بەشی یاسا و هەرلەو بارەیەوە دەڵێت: «ئارەزووی سێكسی لەلای زۆربەی مرۆڤەكان بەهێزە، بۆیە لە هەندێ كاتدا ناتوانن كۆنترۆڵی بكەن، بەتایبەتی كەسی هاوسەردار، بەڵام بۆ كوڕێك كارێكی ئاساییە، من هاوسەرگیرم نەكردووە، بەڵام لەو شارەی تێیدا قوتابیم، زەواجی كاتی هەیە، مەلا هەیە پێیدەڵێن (وەسیت ئەلخیر) وێنەو ناوی هەزاران ئافرەتی لایە بەژمارەی مۆبایلەوە، دوای ئەوەی یەكێك لەلای مەلاكە هەڵدەبژێری، دواتر بانگی دەكات و لەگەڵ یەكتر دادەنیشن، گفتوگۆ دەكەن و رێكدەكەون لەسەر پارەكەو كاتەكەی، لە رۆژێك هەیە تا پێنج ساڵ، ماڵ، یان هۆتێلی بۆ دەگری، هەیە خۆی جێگەی هەیە و خەرجیشی كەمترە، زۆربەشیان ناهێڵن منداڵیان ببێت. خۆم جارێك زەواجی كاتیم كرد، لەبەرامبەر پەنجا هەزار دینار بۆ یەك رۆژ، مەلاكە فۆرمێك پڕدەكاتەوە، هەردوولا ئیمزای لەسەر دەكەن، دووشاهید ئامادەدەبن و لەیەكتر مارەبڕ دەكرێن، خاوەن هۆتێل ئەو فۆڕمی زەواجی كاتییەی نیشان نەدەی، رێگە نادا لە هۆتێلەكەی بخەون، دوای تەواوبوونی ماوەكەش، ژنەكە دەڵێ دوعای خێرم بۆ بكەو بە هیچ شێوەیەك بە كرداری سێكس رازی نابێت، دەڵێ زینایە، بەڵام دوای تەواوبوونی گرێبەستەكە دەتوانن نوێی بكەنەوە». گوتیشی: «زۆرێك لەپیاوانی بازرگان و قوتابی زۆربەیان هاوسەردارن، كە بۆ ماوەیەكی زۆر لەو شارە دەمێننەوەو ئەو جۆرە هاوسەرگیرییە دەكەن، زۆربەی ئافرەتەكان خەڵكی شارەكانی خوارووی عێراقن، پیاوەكانیان كوژراون.»

رەوەند سلێمان تەمەنی (40)ساڵەو وەك خۆی باسیكرد دوای ماوەی ساڵێك لە هاوسەرگیرییەكەی بەقاچاخ چووەتە ئەوروپا، لەوێش تووشی كۆمەڵێك كێشە بووە. «لە ئەڵمانیا هەستم كرد ناتوانم خۆم كۆنتۆۆڵ بكەم، دوای ماوەیەكی كورت لەگەڵ كچێكی ئەڵمانی پێوەندیم بەست، پێم نەگوت هاوسەرم هەیە، لەگەڵ یەكتر دەخەوتین، یەكترمان زۆر خۆش دەویست، بەدزییەوە پێوەندیم لەگەڵ هاوسەرەكەم هەبوو، هەمیشە دەیگوت كەی رامدەكێشی؟ منیش دەمگوت جارێ زۆری ماوە. دواتر ئەو كارە بەردەوام بوو. رۆژێك هاوسەرەكەم تەلەفۆنی بۆكردم، منیش خەریكی كارێكی ناوماڵ بووم، دەستبەجێ هاوڕێیەكەم هەڵی گرت، ناوی منی هێنا، كچە ئەڵمانییەكە تووڕە بوو، گوتی: ئەوە كێیە، هاوسەرتە؟ منیش درۆم لەگەڵ كردو گوتم: ئەوە خوشكمە، ئەنجا گومانی نەما، دواتر هەستم كرد، خەریكە خۆشەویستی هاوسەرەكەم لەدەست دەدەم، گوتم واباشترە تاوەكو كێشەم بۆ دروست نەبووە، بگەڕێمەوە، دوای گەڕانەوەم بە هاوسەرەكەم گوت پێوەندیم لەگەڵ ئەو كچە ئەڵمانییە هەبووە، داوای لێبوردنم كرد و هاوسەرەكەشم گوتی: مادام درۆم لەگەڵ ناكەی، ئەمجارە لێت دەبوورم».

زاهیر ئەحمەد خۆرانی مامۆستا لە زانكۆی زانستە ئیسلامییەكان، سەبارەت بە هەمان پرس دەڵێت: «پێوەندی نێوان ژن وپیاو لەئیسلام زۆر بەهێزو پاكەو پێوەندی كۆمەڵاتی بەهێز دەكات، هەندێ كەس بەهۆی خوێندن، یان پیشەكەیەوە بۆماوەیەك لە ماڵی خۆیان دوور دەكەونەوە، ئیسلام چارەسەری داناوە بۆ ئەوەی تووشی زینا نەبن، بۆ خۆكۆنترۆڵكردن دەبێت بەڕۆژووبن، یان ژنێكی تر لەو وڵاتە بهێنن، ئەگەر سەفەرەكە لەمانگێك زیاتر بوو، دەبێ هاوسەرەكەشی لەگەڵ خۆی بەرێ، چونكە لەسەردەمی پێغەمبەر ئەگەر بۆ جیهاد بڕۆیشتبان هاوسەرەكانیشان لەگەڵ خۆیان دەبرد، ئەگەر یەكێك سەفەری كردو ماوەی شەش مانگ زیاتری پێچوو، ژنەكەی دەتوانێ داوای جیابوونەوە بكات، یان بەپێچەوانەوە، بەڵام زەواجی كاتیی حەرامە، تەنیا مسیار رێپێدراوە، بەڵام ئەویش كێشەی كۆمەڵایەتی لێ دەكەوێتەوە، چونكە زەواجی مسیار مارەیی نایگرێتەوە، ئەو منداڵەی لێ دەبێ، دەتوانێ لەمیرات بێبەش بكرێ.»