رەفتارە وەحشییانە و بەربەرییەكانی داعش بەرامبەر بە ئافرەتانی بەدیلگیراو، یان رفێندراو هەموو سنوورەكانی تاوان و دڕندەیی بەزاندووە. تیرۆریستانی داعش، سەرەڕای هەڵخڵەتاندنی ئافرەتانی موسڵمان و بەكارهێنانیان وەك كەرەستەی جووتبوونی پیاوانی چاوچنۆكیان لە ژێر ناوی «جیهادی نیكاح»، هەر شوێنێك داگیر بكەن، ئافرەتانی سەر بە ئایین و ئایینزاكانی دیكە لە هەر تەمەنێكدا بن، وەك «كۆیلە» و «سەبایە» و «دەستكەوتی شەڕ» مامەڵەیان لەگەڵ دەكەن، دوای ئەوەی لەو پەڕی دڕندەییدا ناچاریان دەكەن لەگەڵ تیرۆریستان سێكس بكەن، دواتر نرخیان بۆ دیاری دەكەن و لە بازاڕەكانی خۆیاندا كڕین و فرۆشتنیان حەڵاڵ دەكەن. سەرباری ئەوەی كە كریستیان و ئێزیدییەكان و هەر كەمینەیەكی دیكە ناچار دەكەن ئایینی خۆیان بگۆڕن، هەموو تاوانێكی نامرۆڤانە بەرامبە ر بە ئافرەتەكانیشیان دەكەن. لە ئێستاشدا بەشێكی ئەو ئافرەتانە رزگاركراون و رۆژانەش پرۆسەی رزگاركردنیان بەردەوامە، بەڵام ئەوان لە بارودۆخێكی جەستەیی و دەروونی زۆر خراپدان. لە بەر ئەوەی زۆربەی ئەو قوربانییانە تەنانەت لە لایەن خێزانەكانیانەوە وەرناگیردرێنەوە و تەنانەت رووبەڕووی مەترسی كوشتنیش دەبنەوە، بۆیە پەنا بۆ شەلتەرەكان دەیەن. بەڵام ئایا حكومەت و لایەنە پەیوەندیدارەكان و رێكخراوەكانی ژنان و مافی مرۆڤ بۆ ئاساییكردنەوەی باری دەروونی و كۆمەڵایەتیی ئەو قوربانییانە دەبێت چی بكەن؟ بەشداربووانی ئەم راپۆرتەی گوڵان وەڵامی ئەو پرسیارە قورسە دەدەنەوە.

گوڵان: كۆمەڵایەتی

دوای ئەوەی ڕۆژی3/8/2014 لەلایەن رێكخراوی تیرۆریستی داعش هێرش كرایە سەر قەزای شنگال، ژمارەیەك لە ئافرەتانی ئێزیدی لەلایەن ئەو گرووپە تیرۆریستییەوە رفێندران، كە بە پتر لە دوو هەزار ئافرەت مەزندە دەكرێن. بەپێی دوایین ئاماری بەڕێوەبەرایەتی گشتی كاروباری ئێزیدییەكانیش لە وەزارەتی ئەوقاف و كاروباری ئایینی، زیاتر لە 800 ئافرەت لە ژێر دەستی داعش رزگاریان بووە.
پەرلەمانتار ڤیان عەباس ئەندامی پەرلەمانی كوردستان و چالاك لە بواری كاروباری ئافرەتانی ئاوارەبووی شنگال، لە دەستپێكی قسەكانیدا بۆ گۆڤاری گوڵان باسی ئەوە دەكات كە «لەبەر ئەوەی رۆژانە ئەو ئافرەتانە بە شێوازی جیا جیا ئازاد دەكرێن، ئامارێكی ورد لەبەر دەستدا نییە»، گوتیشی: «بە خۆشحاڵییەوە خەڵكی هەرێمی كوردستان بەگشتی و خەڵكی پارێزگای دهۆك بەتایبەتی لە رووی پێشكەشكردنی خزمەتگوزاری بە توێژی ئافرەتانی شنگالی رۆڵێكی گەورەیان گێڕاوە، لەماوەی ئەم دواییەدا لە شاری دهۆك سەنتەرێكی چارەسەری جەستەیی و دەروونی تایبەت بە ئافرەتانی رزگاربووی دەستی داعش دروستكراوە و چەندین پزیشكی پسپۆڕ و راوێژكاری دەروونی لە دەرەوەی كوردستان بۆ ئەو سەنتەرە هێنراون، جگە لە نوژدار و پسپۆڕ و توێژەرانی دەروونی ناوخۆیی خۆبەخش، ئەو سەنتەرە رۆژانە پێشوازی لە 20 ئافرەت دەكات، لە كاتێكدا رەوشی دەروونی ئەو قوربانییانە زۆر زۆر خراپە و تووشی فۆبیای جۆراو جۆر بووین، چونكە لە رەوشێكی نائارام و توندوتیژ ژیاون لەوانە، دەستدرێژیكردن، كڕین و فرۆشتن، گۆڕینی ئایین، ئەم رەفتارانەش نەك هەر تەنها پێشێلكردنی یاسای نێودەوڵەتی و مافەكانی مرۆڤە، بەڵكو ژێرپێنان و شكاندنی شەریعەتێكی ئاسمانییە و ئیسلامیش ئەوەی پێ قبووڵ ناكرێت.»
زەكیە حەقی كە لە ماوەی ساڵانی 2005-2010 پەرلەمانتاری عێراق بووە، ئاماژەی بەوە دەكات كە تیرۆریستانی داعش كچانی ئێزیدییان لە گوندەكانی كوردستان رفاندووە، ئەم كچانە لە تەمەنی منداڵی و بەشێكیان تەنها 14 ساڵیان تەمەن بووە و هەموویان هەتككراون و مەترسییەكی گەورە لەسەر چارەنووسیان دروست بووە. بەتایبەتی كاتێك دووگیان دەبن، یان لە ئاكامی جیهادی نیكاح تووشی ڤایرۆسی ئایدز دەبن، كە ئافرەتێك بە رێگەی هەتككردن دووگیان كرابێت، ئاخۆ چ ئازارێكی دەبێت و چ كاریگەرییەك لەسەر دەروونی دروست دەبێت؟ لەبەر ئەوەی ئەگەر بگەڕێنەوە ئەوا رووبەڕووی گەورەترین مەترسیی كوشتن لەسەر نامووس دەبنەوە، خۆ ئەگەر نەكوژرێن و لە حاڵەتێكدا ئەمانە ئەگەر تووشی ئایدز بووبن، مەترسییەكی گەورە دروست دەكات، بۆیە دەبێت بەوجۆرە سەیری ئەم پرسە بكەین و ئەوە بخەینە بەرچاومان و بزانین ئەگەر كچێكی تەمەن 14 ساڵ لەم حاڵەتەدا بێت، ئەوا بژاردەی زۆر كەمی لەبەر دەست دەبێت و لەوانەیە ناچار بێت بە تەواوەتی بڕیار بدات لەگەڵ داعش بمێنێتەوە، لەم كاتەشدا مەترسی ئەوە دروست دەبێت، تیرۆریستانی داعش بە بیانووی چوونە بەهەشت و بەڵێنی دیكە وەك تیرۆریست رایان بهێنن و بیانكەن بە تیرۆریستی خۆكوژ و دژی خۆمان بەكاریان بهێننەوە، بۆیە دەبێت بیر لەوە بكرێتەوە ئەم قوربانییانە بپارێزین. لەوانەیە هەندێك لەو ئافرەتانەی رووبەڕووی هەتككردن دەبنەوە، بیشارنەوە، یان ناوی خۆیان تۆمار نەكەن، بۆیە پێشنیار دەكەم شوێنێك بۆ قوربانییانی جیهادی نیكاح دابمەزرێت و نەتەوە یەكگرتووەكانیش بۆ پاراستنی ئەم قوربانییانە بڕیارێك دەربكات و فەرزی بكات هەموو دەوڵەتانی رۆژهەڵاتی ناوەڕاست بەو بڕیارەوە پابەند بن، بۆ ئەوەی ئەم قوربانییانە رزگار بكرێن و دووبارە تێكەڵی كۆمەڵگە بكرێنەوە.»
رێكخراوی لێبووردنی نێودەوڵەتی لە راپۆرتێكی بە ناونیشانی: «هەڵاتن لە دۆزەخ . ترس و تۆقاندن و بە كۆیلەكردنی سێكسی لە ناو دەوڵەتی ئیسلامی لە عێراقدا» بڵاو كردۆتەوە، ئەم راپۆرتە تەرخانكراوە بۆ ئازاری كچان و ژنانی ئێزیدی، دوای ئەوەی لە لایەن تیرۆریستانی داعشەوە دەستگیركراون، یان رفێندراون. میتۆدی راپۆرتەكە لە سەر بنەمایەكی زانستی داڕێژراوە و قسەكردنی 42 كچ و ژنی ئێزیدی لە خۆ دەگرێ كە توانیویانە لە ناوچەكانی ژێر دەسەڵاتی داعش هەڵبێن و پاشان لە ناو كەمپی ئاوارەكانی هەرێمی كوردستان رێكخراوی لێبووردنی نێودەوڵەتی دیداری لەگەڵدا كردوون و قسەكانی تۆمار كردوون. لەسەر بنەمای ئەو قسانەی كە تۆماریان كردووە، رەفتاری وەحشیگەرانە و نامەردانەی داعش بەرامبەر كچان و ژنانی ئێزیدی هەموو سنوورەكانی زەوی و ئاسمانی بەزاندووە. ئەوەی بەرامبەر یەكێك لەو ژن و كچانە كراوە، بەرامبەر ئەوانی دیكەش هەمان رەفتار كراوە، بۆیە راپۆرتەكە لە هەر بەشێكدا لێدوانی چەند كچ و ژنی ئێزدی بڵاو كردۆتەوە.
ئاروای تەمەن 15 ساڵ كە لە سەرەتای مانگی ئاب لە هێرشی تیرۆریستانی داعش بۆ سەر شنگال خۆی و دایكی و خوشكەكانی لەگەڵ 62 كچ و ژن و منداڵی خزم و كەسوكاری و سەدان كچ و ژنی دیكەی ئێزیدی لەلایەن تیرۆریستانی داعشەوە دەستگیركراون، بەمجۆرە بۆ رێكخراوی لێبووردنی نێودەوڵەتی قسەی كردووە:
«یەكەمجار ئێمەیان برد بۆ سووریا بۆ شوێنێك لە نزیكی حەسەكە، لەوێ لە ناو خانوویەكدا لەگەڵ ژمارەیەك كچی دیكە بەندیان كردین، پاش 10 رۆژ، بۆ ماوەی دوو رۆژ گرووپێكیان لە ئێمە گواستەوە بۆ موسڵ لە عێراق، دوای ئەوە من و خوشكەكەم و لەگەڵ ژمارەیەك لە ئامۆزاكانم بردیانین بۆ بێجی، هەروەها چوار خوشكم و دوو لە ئامۆزاكانمیان برد بۆ سووریا، لە بێجی ئێمەیان لە دوو شوێنی جیاواز هێشتەوە و پاش سێ رۆژ من و ئامۆزا تەمەن 13 ساڵەكەمیان برد بۆ رامبوسی نزیكی شنگال، دایكم و خوشكیشمیان برد بۆ گوندێكی دیكە كە تا ئێستاش لەگەڵ خزمەكانمان هەر لەوێن. لە رامبوسی لە خانوویەكیان داناین لەگەڵ پێنج كچی دیكە، لەوێ كچەكان لێیان دەپرسیم: چییان لێكردووم؟ ئایا هەتك كراوم؟ ئامۆزاكەم دەیویست لەوێ بمێنێتەوە و هەر لەوێ شوو بكات، بەڵام دواتر وازی لەو بیركردنەوەیە هێنا و لەگەڵ من بەرنامەمان داڕشت رابكەین، یەكێك لە كچەكانی نێو ئەو خانووەی ئێمەی تێدا بوو، دەیگوت: من هەتك نەكراوم، بەڵام گومان هەبوو لەوەی راست بكات، چونكە هەموویان هەتك كرابوون، ئەو پیاوانەی ئێمەیان هەتكرد، هەموویان عەرەبی عێراقی بوون، ئەوان هەڕەشەی ئەوەیان لێدەكرێن ئەگەر ئێمە خۆمان بكوژین، ئەوان هەموو كەسوكارمان كە لەلایان كۆیلەن دەیكوژن».
لە راپۆرتەكەدا چیرۆكی رەندەی تەمەن 16ساڵیش بڵاو كراوەتەوە، رەندە و دایك و باوكی و خوشك و براكانی لە رۆژی 3ی ئاب لە گوندێكی خوار شنگال كەوتبوونە دەستی تیرۆریستانی داعش و ئەو یەكێكە لەو سەدان كچە فرۆشراوانە و كراوە بە دیاری بۆ پیاوێك كە ناوی (سەلوان)ـە و تەمەنی زۆر لەخۆی گەورەتر بووە. رەندە بەمجۆرە بەسەرهاتی خۆی دەگێڕێتەوە:
«منیان برد بۆ موسڵ، بە درێژایی ئەو ماوەیە دەستبەسەر بووم، سەرەتا منیان بردە شوێنێك كە پێیان دەگوت: (مقەڕ) واتە بارەگایەكی تیرۆریستانی داعش، ئێمە لەو شوێنە نزیكەی 150 كچ و پێنج ژن بووین، لەو مقەڕە پیاوێك كە ناوی سەلوان بوو، من و ئامۆزا تەمەن 13 ساڵەكەمی بردە ماڵێكی شپڕێو، لەو ماڵە پەلاماری دام، من خۆم بەدەستەوە نەدا، زۆری لێدام و ملم بریندار بوو، نەمتوانی لە ژێر دەستی دەرباز بم، بەڵام نەیتوانی هیچ لە ئامۆزاكەم بكات و نەیوست بە زۆر ئەویش هەتك بكات، دوای ئەوە بەرنامەمان دانا و رامانكرد، دواتر سەردانی دكتۆرم كرد، دكتۆر گوتی دووگیان نەبوویت و هیچ نەخۆشییەكت نییە، بەڵام ناتوانم قەت ئەوەم لە بیر بچێتەوە كە تیرۆریستانی داعش بەسەریان هێنام، ئەوەی بەسەر من و خێزانەكەمیان هێناوە زۆر ئازاربەخشە، داعش هەموو ژیانی ئێمەی تێكدا، دایكم لەو كاتە منداڵی بوو كە كۆیلە بوو لەبەر دەستی داعش لە تەلەعفەر، ئێستا لە موسڵ كۆیلە كراوە لەگەڵ خوشكە بچووكەم و كۆرپە تازە لەدایكبووەكەی، براكەم كە تەمەنی 10 ساڵە لە دایكمیان جیاكردۆتەوە ئێستا لای پوورمە لە تەلەعفەر، من نازانم ئەوان چییان بەسەرهاتووە، نازانم جارێكی دیكە دەیانبینمەوە، یان نە؟»
چیرۆكی ئەو دوو پاكیزەیە (ئاروا و رەندە)، سەدان چیرۆكی هاوشێوەی دیكەن كە تیمی رێكخراوی نێودەوڵەتی لە 200 ئافرەتی دیكەی بیستووە، ئەویش چیرۆكی وەحشیگەری و رەفتاری نامەردانەی تیرۆریستانی داعشە كە لەگەڵ كچ و ژنە كۆیلەكانی كورد كردوویانە. ئەو دوو سەد چیرۆكە هەر یەكەیان، چیرۆكی سەدان و هەزاران كچی كوردی ئێزیدییە كە ئێستا لە جوگرافیای دەوڵەتی ئیسلامی لە سووریا و عێراق پەرتكراون و هەر رۆژەی بە جۆرێك كەرامەتیان پێشێل و هەتك دەكرێت.
جیلان خۆی كوشت پێش ئەوەی سەمای پێبكەن و هەتكی بكەن
باوكی جیلان لە مانگی ئەیلوول بە رێكخراوی لێبووردنی نێودەوڵەتی راگەیاندووە كە پێش دوو هەفتە هەواڵی ئەوەی بۆ هاتووە جیلانی كچی خۆی كوشتووە، ئەم هەواڵە لە مانگی نۆڤەمبەر ئەو كۆمەڵە كچە پشتڕاستیان كردۆتەوە كە توانیویانە پاشتر رابكەن، یەكێك لەو كچانە كە ناوی لونایە بەمجۆرە ئەم رووداوەی پشتڕاست كردۆتەوە:
«ئێمە 21 كچ بووین، دووان لە كچەكان تەمەنیان لە نێوان 10-12 ساڵاندا بوو، رۆژێكیان هاتن جلیان داینێ وەك جلی راقیسە وابوو، پێیانوتین: بچن خۆتان بشۆن و ئەو جلانە لەبەر بكەن، جیلان كچێكی جوان بوو، ئەو دەیزانی كە دوای خۆشووشتن و لەبەركردنی ئەو جلانە هەتكی دەكەن، بۆیە كە چووە ناو حەمامەكە لەوێ وایەری دیواری حەمامەكەی لێكردبووە و بە وایەرەكە خۆی كوشت».
لەتیف حوسێن توێژەری كۆمەڵایەتییە و لە ئاخاوتنێكی تایبەتدا بۆ گوڵان باسی ئەوە دەكات كە: «بەشێكی زۆر لە چالاكان و رێكخراوەكانی ژنان و ئافرەتان، لە ئێستادا و هەر لەپاش پەلاماردان و داگیركردنی ئەو ناوچانە بەتایبەت شەنگال و زێدی ئێزدییەكان كە بەشێكی زۆر لە ئافرەت و كچانەیان كەوتنە بەردەستی داعش و پاش رفاندنیان بە هەموو شێوەیەكی وەحشیگەرانەی خۆیان و وەك پیشەی تایبەتیان مامەڵەیەكی نامرۆڤانەیان لەگەڵ كردوون. بەشێكیان تا ئێستاش بێ سەر و شوێنن و بەشێكی دیكەیان هەڵاتن و هەندێكیشیان رزگاركران. بێگومان كەوتنە دەستی داعش خۆی لەخۆیدا هێدمەیەكە و ترسناكە و بمانەوێت و نەمانەوێت كاریگەری زۆر لەسەر دەروون و ناخی ئەو كەسانە دەكات كە دەكەونە دەستی داعش و كارە ترسناكە نامرۆڤەكانیان، پاش ئازادبوون، یان قوتاربوون لێیان و گەڕانەوە بۆ ناو خێزان و كۆمەڵگەش ئەو ئافرەت و ژنانەی كە كەوتبوونە دەستی داعش لە رووی كۆمەڵایەتی و دەروونییەوە پێویستیان بە مامەڵەیەكی هەستیار و درێژخایەن دەبێت، چونكە هەموو دەزانین داعش وەها بارودۆخی ئەوانی شێواندووە كە لە رووی دەروونییەوە شێواو و نائارامن و هەمیشە ترسی ئەوەیان لەلایە كە دیسانەوە پەلاماردەدرێن و سووكایەتیان پێدەكرێتەوە. بۆیە زۆر گرنگە لە رووی دەروونییەوە ئاوڕ لەو كچ و ژنانە بدەینەوە كە لای داعش و لە ژێر فەرمانی ناڕەوای ئەواندا بوون، چونكە ئەوان تووشی شۆك و ترسێكی زۆر هاتوون و دەبێت بە جۆرێك مامەڵەیان لەگەڵ بكرێ كە بگەڕێندرێنەوە بۆ دۆخی ئاسایی خۆیان و هەست بە ئارامی و هێمنی ژیانیان بكەن. لە رووی كۆمەڵایەتیشەوە دەبێت بە چاوێكی پڕ بایەخ و سۆزەوە سەیر بكرێن، وەك ئەوەی لە پێشوودا هەبوون، نەك ئەوەی كە ئەم كچ و ژنانە لای داعش بوون و تێڕوانینمان بۆیان جیاواز بێت لە تێڕوانینی پێش داگیركاری داعش، ئەم مامەڵەیە وا دەكات تا راددەیەكی باش هەست بە ئارامی بكەن و بۆ دۆخی ئاسایی و جارانی خۆیان بگەڕێنەوە.»
سوعاد لالۆ ئەندامی سكرتاریەتی یەكێتی ئافرەتانی كوردستان، كە خاتوونێكی بەرەگەز ئێزیدییە، سەبارەت بە هەمان پرس بۆ گوڵان دەڵێت: «رفاندنی كچان و ئافرەتانی شنگال و سووكایەتی پێكردنیان لەلایەن تیرۆرستانی داعش بۆ ئێمەی ئێزیدی برینێكی ساڕێژ نەبووە، هەرچەندە ژمارەیەك لەو ئافرەتانە ئازاد كراون و گەڕاونەتەوە، بەڵام ئەوانەشی كە لە ژێر دەستی داعشدا ماون ژمارەیان كەم نییە، لە نزیكەوە سەردانی ئافرەتە رزگاركراوەكانم كردووە، سەرباری خراپی گوزەران لەناو كەمپەكان لە قەیرانێكی دەروونی گەورەدا ژیان بەسەردەبەن و لە رووی دەروونییەوە رووخاون. هەندێك لە ئافرەتانی گەڕاوە بەهۆی نەمانی كەسوكارەكانیان كە لەلایەن ئەو گرووپە تیرۆریستە كوژراون، یان دەستبەسەر كراون، جێگەیەك بۆ مانەوە شك نابەن و جێگەی نیشتەجێبوونیان نییە، بۆیە جارێكی دیكە نائومێدی بەرۆكیان دەگرێت. ئەگەرچی لە ئێستادا دەنگۆی ئەوە هەیە لەلایەن حكومەتی عێراقەوە مووچەیەكیان بۆ ببڕدرێتەوە، هەرچەندە لەلایەن حكومەتی هەرێمەوە هاوكاری زۆر كراون، بەڵام هاوكارییەكان بە گشتی بۆ ئاورەكان بەپێی پێویست نییە و پێویستیان بە ئاوڕلێدانەوەی زیاترە، خۆشبەختانە یەكەمجارە لە كۆمەڵگەی ئێمەی ئێزیدیدا بەمجۆرە تەعامول لەگەڵ ئەو قوربانییانە دەكرێت و خێزانەكان وەكو كەس سەیریان ناكەن، بەڵكو وەكو قوربانی هەڵسوكەوتیان لەگەڵدا دەكەن و موراعاتی باری دەروونیان دەكەن و بە گەرمی پێشوازییان لێدەكەن، بەڵام ئەو دەروونە رووخاوە، وا بە ئاسانی چارەسەر نابێت و پلانی درێژماوەی پێویستە بۆ ئەوەی خۆیان لە باری ئاساییدا بدۆزنەوە».
د. ئۆمید قادر پسپۆڕی نەخۆشییە دەروونییەكان، سەرەتا باسی ئەوە دەكات كە «باری دەروونیی ئافرەتانی رزگاربووی دەستی داعش بارودۆخێكی خراپ و ناجێگیرە بەهۆی ئەو زنجیرە هێدمە دەروونییەی كە بۆیان هاتۆتەپێش، كە بریتین لە رفاندن و هەتككردن و دووری لە كەسوكار و هەڕەشەی كوشتن و ...تاد، لە ئەنجامدا ئەو كەسە هاوسەنگی رۆحی لە دەست دەدات، وەكو ئەوە وایە كە لە پڕ دە كیلۆ بخەیتە سەر لایەكی تەرازوو و لایەكەی تر بە ئاسماندا بچێ، ئەو دیمەنە تاڵەی كە بینیویەتی بۆ ماوەی زیاتر لە شەش مانگ وەكو فیلمێكی ڤیدیۆیی بە بەردەوامی دێتە بەرچاوی، ئەوەش وادەكات بێ تاقەت و نائومێد بێت و خۆزگە بە مەرگ بخوازێت، وێڕای هەستكردن بە تاوان، ترس لە دووبارە بوونەوەی كارەساتەكە هەمیشە لەگەڵیاندایە، ئەو قوربانییانە هەمیشە پرسیاری ئەوە لەخۆیان دەكەن كە بۆچی رووبەڕووی ئەو بارودۆخە ناخۆشە بوونەتەوە؟ بۆچی كەسێكی دیكە نەبوو؟ دوور نییە ئەو یادەوەرییە تاڵانە بە درێژایی تەمەنی لەگەڵیدا بمێنێتەوە، چونكە ناتوانێ بە شێوەیەكی ئاسان گوزارشت لەو كارەساتە بكات كە بە سەریدا هاتووە. بۆیە پێویستە هەرچی زووە لەپاڵ چارەسەری جەستەیی چارەسەری دەروونیشیان بۆ بكرێت، چونكە باری دەروونی ئەو قوربانیانە كاریگەری نەرێنی لەسەر خێزان دروست دەكات و وادەكات ئەو ئافرەتە نەتوانێ لەناو خێزانەكەیدا رۆڵی خۆی بگێڕێت، چارەسەریش بە هەردوو رێگەی مەعریفی و دەرمانی دەبێت و ناكرێ قوربانییانی ئەو كارەساتە فەرامۆش بكرێن، ئەو قوربانییانە خۆیان ئەو قەدەرەیان هەڵنەبژاردووە، ئەوە قەزیەی تاكە كەسێك نییە، بەڵكو قەزیەی میللەتێكە، میلەتێك نەهامەتی بەسەردا هاتووە لەلایەن لایەنێكەوە كە دژایەتی ئاسایش و ئارامی هەموو دونیا دەكات، كەیسی ئەو ئافرەتانە شەرمەزاری نییە و مایەی رێز گرتن و ستایش كردنن و بۆ دووبارە گەڕانەوەیان بۆ ناو كۆمەڵگە پێویستییان بە هاوكاری هەموومان هەیە».