گوڵان - كۆمەڵایەتی -سالار بابەشێخ


ژمارەیەكی زۆری منداڵانی رۆژئاوای كوردستان كە تیرۆریستان لە زێد و ماڵی خۆیان هەڵیانكەندوون، ناچار لەگەڵ خانەوادەكانیان پەنایان بۆ شارەكانی هەرێمی كوردستان هێناوە و بەشێكیان لە هەولێری پایتەخت گیرساونەتەوە. بە هیممەتی دوو مامۆستای خۆبەخشی خەڵكی رۆژهەڵات و رۆژئاوای كوردستان و بە هاوكاری رێكخراوی (UNICEF) و شارەوانی و پەروەردەی هەولێر، قوتابخانەیەك بە كابینە بۆ سەدان منداڵی ئاوارەی بێبەشكراو لە خوێندن لە شارۆچكەی (كەسنەزان)ـی هەولێر بە ناوی قوتابخانەی بنەڕەتی "دیرۆك" دروستكراوە. گوڵان لە درێژەی رووماڵكردنی بارودۆخی ژیانی ئاوارەكان و لە كارێكی مەیدانیدا ئەو قوتابخانەیەی بەسەركردەوە و كاربەدەستانی قوتابخانەكە، مامۆستا و قوتابی و كەسوكاری قوتابییەكانیش باسی كەموكوڕییەكانی قوتابخانەكەیان كرد، ئەوان داواكارن ئاوڕی جددی لەو قوتابخانەیە بدرێتەوە.


لە رۆژانی كۆتایی پاییز و سەرەتای مانگی سەرماوەز كە سەرما و با و بۆران و رەهێڵەی باران لە چیاكانەوە بۆ ناو پێدەشت و شاروشارۆچكەكان دادەكشا، لەلایەن باوكی منداڵێكی چاوگەشی ئاوارەی خەڵكی رۆژئاوای كوردستان و نیشتەجێی گەڕەكێكی شارۆچكەی (كەسنەزان)ی هەولێر، ئاگادار كراینەوە، كە لەو گەڕەكە قوتابخانەیەكی بنەڕەتی بۆ منداڵانی ئاوارەی رۆژئاوای كوردستان كراوەتەوە، بەڵام وەك باسیكرد،"هیچ خزمەتگوزارییەكی تیا نییە و منداڵەكان لە سەر عەرد دادەنیشن و رەحلە و كتێبیان نییە و تەنانەت لە ئاوی خواردنەوەش بێبەشن".
قوتابخانەیەكی بێ‌ تابلۆ!
پرساوپرس قوتابخانەكەمان دۆزییەوە... قوتابخانەیەكی بێ‌ تابلۆ، دەرگە و حەوشەیەكی گەورەی تەلبەندكراو، تانكەرێكی گەورەی بێ‌ ئاو و چەندین كابینەی بچووك كە لە دوو ریزی بەرامبەر بە یەكتری دروستكراون و هەر كام لەو ژوورانەش كە كرابوونە پۆل، پتر لە 60 قوتابی تیا بوو، كە ژمارەیەكی زۆریان لە سەر عەرد دانیشتبوون. ئەوە دیمەنێكی قوتابخانەی "دیرۆك" بوو، كە قوتابخانەیەكی بنەڕەتی تێكەڵاوە، بەڵام بەڕێوەبەری قوتابخانەكە دەرفەتی وێنەگرتن و ئامادەكرنی راپۆرتی پێنەداین و داوای مۆڵەتی فەرمیی بەڕێوەبەرایەتی پەروەردەی كرد. دوای ئەوەی لە حەوت خانی پەروەردەی هەولێر (راگەیاندن، ژووری بەڕێوەبەر، ژووری پلاندان، ژووری تایپ، ژووری دەركردە و دیسان ژووری....هتد)، رزگارمان بوو، رەوانەی پەروەردەی دەشتی هەولێر كراین، دەوامی رۆژی پێنج شەممەش گەیشتە كۆتایی، گەرچی بەڕێوەبەری پەروەردەی دەشتی هەولێر هاوكاری زۆری كردین و هەر بەپەلە مۆڵەتی فەرمیی پێداین، بەڵام تا گەیشتینە بەردەم قوتابخانە دەوام تەواو بوو، كەسی لێ نەمابوو، تەنیا منداڵێكی لێبوو كە لە دەرەوەی قوتابخانەكە چاوەڕوانی دایكی دەكرد، بارانێكی بەخوڕیش دەباری و بە تەواوی تەڕی كردبوو. ئەو كیژۆڵەیە هەڵدەلەرزا و هاوكات باران و فرمێسكی چاوی تێكەڵ بە یەكتری دەبوون و بە سەر گۆنای ئاڵیدا خلار دەبوونەوە. هێندەی نەبرد، دایكی گەیشت و باوەشی پێدا كرد و بردیە بەر هەورەبانی دووكانێك بۆ ئەوەی لەو بارانە بە لێزمەیە بیپارێزێت.

دیمەنێكی دڵتەزێن!
ئەو خاتوونە خۆی بە رابیعە سەعید ناساند و، دوای ئەوەی تێگەیشت كە پەیامنێرێك لە رێگەی گۆڤاری (گوڵان)ـەوە بەنیازە دەنگیان بە لایەنی پەیوەندیدار بگەیەنێت، ئامادە بوو قسە بكات و بە نیگەرانییەكی زۆرەوە گوتی: "راستە هەرێمی كوردستان و سەرۆكە دڵسۆزەكەی ئامێزی بۆ هەموو ئاوارەیەك كردۆتەوە، ئەوەتا قوتابخانەیەكیشیان بۆ منداڵەكانمان بەتایبەتی درووست كردووە، بەڵام ئەو قوتابخانەیە هیچی لە قوتابخانە ناچێت، نە كتێبیان هەیە، نە ئاویان هەیە، هەموویان لە سەر عەرز دادەنیشتن، ئێستاش چەند رەحلەیەكیان دابین كردووە، بەڵام هێشتا بەشێك لە منداڵەكان لە سەر عەرز دادەنیشن، زۆرێك لە منداڵەكانیش ماڵیان لە قوتابخانەكە دوورە و توانای ئەوەشمان نییە تەكسییان بۆ بگرین".
رۆژی شەممە 8ی سەرماوەز لەگەڵ كردنەوەی قوتابخانەكە سەردانمان كرد و بەڕێوەبەری نوێی قوتابخانەكە بە گەرمی پێشوازی كردین، ژوورێكی بچووك بۆ خۆی و هەموو مامۆستاكان تەرخان كرابوو، كارمەندی خزمەتگوزاریشی نەبوو، بۆ ئەوەی مامۆستاكان لە كاتی پشووی نێو وانەكاندا قوڕگێك تەڕ بكەن و چایەك بخۆنەوە. لە سەر مێزی بەڕێوەبەری قوتابخانەكە ئاڵایەكی كوردستان و گۆی زەوی و چەندین كاخەز و دوو قەڵم دانرابوون. لە سەر مێزەكەی تەنیشتیشی دەبەیەك ئاوی قەتران و هەندێك شوكلێت و چەندین قەڵەمی تایبەت بە وایتبۆرد و چەند تەختەسڕ دانرابوون.

قەیرانی دارایی كۆمەڵێك كێشەی درووستكردووە

راسپێر رزگار بەڕێوەبەری قوتابخانەكە لە دەستپێكی قسەكانیدا بە رۆحێكی نەتەوەییەوە باسی ئەوەی كرد كە كوردانی هەر چوار پارچەی كوردستان خوشك و برای یەكترین و هەمیشە لە تەنگانەدا ئامێزیان بۆ یەكتری كردووەتەوە، جەختی لەوەش كردەوە كە "بڕینی بودجە و مووچەی نزیك بە یەكساڵی هەرێمی كوردستان و ئەو قەیرانە داراییە كۆمەڵێك كێشەی نەك هەر بۆ پەروەردە، بەڵكو بۆ هەموو دەزگاكانی حكوومی دروست كردووە، سەرەڕای ئەوەش بەرەكانی شەڕی دژ بە تیرۆریستانی داعش تێچوویەكی زۆری هەیە و هاوكات نزیك بە دوو ملیۆن كەس لە ناوخۆ و دەرەوەی هەرێمی كوردستان ئاوارە بوون و روویان لە شارەكانی هەرێم كردووە، خەڵكی سووریا و كوردانی رۆژئاوای كوردستانیش ژمارەیەكی زۆریان لە هەولێرن، گوتیشی: "ئێمە منداڵی كوردانی ئاوارە و منداڵی خۆمان لێك جیا ناكەینەوە، وەكوو پەروەردەش دوو قوتابخانە كراوەتەوە بۆ منداڵانی رۆژئاوا، یەكێكیان لە شارۆچكەی قوشتەپە و یەكێكی لە شارۆچكەی كەسنەزان، كە ئەم قوتابخانەیە ناوی (قوتابخانەی دیرۆكی بنەڕەتی تێكەڵاو)ـە و پۆلی یەك تا شەش وانەی تیا دەخوێنن، راستە ژوورەكانی كابینەن، بەڵام بە شێوەیەكی زۆر جوان و رێكوپێك درووستكراوە و ساحەیەكی باشی هەیە، رێكخراوی (UNICEF) رۆڵی سەرەكیی لە دروستكردنی هەبووە، ئێمەش وەكو پەروەردە لە خزمەتیاندا بووین، ئەگەرچی بەڕێوەبەرایەتی پەرورەردەی هەولێر و پەروەردەی دەشتی هەولێر درێغییان نەكردووە، هەروەها هەندێك رێكخراو هەن كە سەردان دەكەن و هاوكاریمان دەكەن، بەڵام هێشتا هەندێك كەموكوڕی هەیە كە لە هەوڵی چارەسەركردنیداین، بۆ نموونە لە سەرەتاوە منداڵەكان بێ‌ رەحلە بوون و هەموویان لەسەر عەرز دادەنیشتن، ئێستا ئەوە تا رادەیەكی زۆر چارەسەر كراوە، بە ئۆتۆمبێلی وەزارەتی پەروەردە لە قوتابخانەكانی دیكەی پەروەردەی دەشتی هەولێر رەحلەمان هێناوە، بەڵام ژوورەكان بچووكن و ژمارەی قوتابییەكانیش زۆرن، لەگەڵ ئەوەشدا ئێستا تەنیا نزیكەی 20 تا 25 قوتابی لە سەر عەرز دادەنیشن، كە تا دوو رۆژی دیكە رەحلەی زیاترمان بۆ دێت و ئەوەش بە تەواوی چارەسەر دەكرێت".

مامۆستا خۆبەخشەكان هاتوچۆشیان لە سەر خۆیانە

ئەو بەڕێوەبەرە ئەوەشی خستەڕوو كە "مامۆستا شاهین حەسوون خەڵكی رۆژئاوای كوردستان، وەك خۆبەخش لە سەرەتاوە ماندووبوونێكی زۆری بۆ كردنەوەی قوتابخانەكە كێشاوە و لەگەڵ مامۆستا ئیلام كە خەڵكی رۆژهەڵاتی كوردستانە بە بێ‌ بەرامبەر و خۆبەخشانە وانە دەڵێنەوە، تەنانەت هاتوچۆشیان لەسەر خۆیانە، مامۆستاكانی دیكە هەموویان مامۆستای موحازر (وانەبێژ بە كاتژمێر)ـن، كە ئەوانیش خەڵكی رۆژئاوای كوردستانن".
كاتێك پرسیاری مووچە و بڕی پارەی مامۆستای وانەبێژمان كرد، بەڕێوەبەری قوتابخانەكە لیستێكی نیشانداین، یەكێك لەو مامۆستایانە 96 جاران 40 خولەكی وانەی وتبوو، تەنیا 384 هەزار دیناری بۆ تەرخان كرابوو. ئەوەش مانای وایە ئەو مامۆستایانەش لە كاری خۆبەخشانە نزیكن.
لە وەڵامی ئەو پرسیارەشدا كە بۆچی مەنهەجی عەرەبی نەگۆڕاوە بۆ كوردی و ئایا تا چەند بایەخ بە وانەی كوردی دەدەن؟ مامۆستا راسپێر گوتی: "كوردانی رۆژئاوای كوردستان مەنهەجیان بە عەرەبی بووە و لە خوێندنی كوردی بە تەواوی بێبەش كرابوون، لە لایەن رژێمی ئەسەدەوە، بۆیە ئێستاش بەناچاری دەبێت مەنهەجیان بە عەرەبی بێت، بەڵام وانەی كوردیمان هەیە و گرنگیی زۆریشی پێدەدەین". سەبارەت بەوەش كە وەرزی سەرما هاتووە و بۆچی هیچ گەرمكەرەوەیەكیان نییە، گوتی: "بە سپاسەوە رێكخراوی (ریك) بەڵێنی داوە سبلیت بۆ هەموو ژوورەكان دابین بكات، بەڵام هێشتا كارەبای رەئیسیمان بۆ نەهاتووە، كە بڕیارە لەم رۆژانەدا ئەوەش چارەسەر بكرێت".

كێشەی هاتوچۆی قوتابییەكان

وەك بەڕێوەبەری قوتابخانەكە باسیكرد، ژمارەی قوتابییان 450 كەسن و زۆربەشیان كێشەی هاتوچۆیان نییە و ماڵیان لە قوتابخانەكە نزیكە، بەڵام ئەوەشی نەشاردەوە كە ژمارەیەكی كەمیان ماڵیان لە قوتابخانەكە دوورە و گوتیشی: "باوكی قوتابی هەیە سێ‌ منداڵی بە ماتۆر لەگەڵ خۆی دەهێنێت بۆ قوتابخانە"، لە وەڵامی ئەو پرسیارەشدا كە: بۆچی توێژەری دەروونیتان نییە و دۆخی تایبەتی و باری دەروونی ئەو منداڵانە رەچاو نەكراوە؟ مامۆستا راسپێر گوتی: "راستە ئەوە زۆر پێویستە و ئێمەش لەگەڵ سەرووی خۆمان باسی دەكەین، چونكە بەڕاستی ئەو منداڵانە شەڕ و ئاوارەبوونیان بینیوە و پێویستە زیاتر رەچاوی باری دەروونییان بكرێ"، سەبارەت بەوەش كە بۆچی كتێبیان نییە، گوتی: "ئەوە تەنیا كێشەی ئێمە نییە، ئێستا لە دهۆك قوتابخانە هەیە هێشتا نەكراوەتەوە، بە هۆی ئەوەی ئاوارەی تیا نیشتەجێ كراوە، بەڵام قوتابییانی ئێمە لە خوێندن دوانەكەوتوون، چونكە مامۆستاكان خۆیان كتێبیان هەبووە و لە وانەوتنەوە و فێركاری بەردەوام بوون، لە دووڕژی داهاتووش كتێبمان بۆ دێت و ئەو گرفتەشمان نامێنێت".
بەڕێوەبەری قوتابخانەی دیرۆك لە كۆتایی قسەكانیدا سوپاسی عەلی عەودی بەڕێوەبەری پەروەردەی دەشتی هەولێر و سەمیر عەبدولڕەحمان سەرپەرشتیاری پەروەردەیی كارگێڕی كرد و "هاوكاری و دڵسۆزی"یانی بەرز نرخاند. هاوكات ئەوەشی خستەڕوو كە قوتابخانەكەیان پێویستی بە جێگری بەڕێوەبەر و توێژەرێكی دەروونی و كارمەندێكی ئیداری (كاتب) و دوو خزمەتگوزار و پاسەوانێك هەیە.

هیوا و ئۆمێدی قوتابییان...

زەنگی پشوو لێدرا و قوتابییان هاتنە حەوشە، زۆربەی حەوشەكە كۆنكرێت و وشك بوو، بەڵام لە نێوان دوو ریزی پۆلەكاندا ئاوی باران گۆماوێكی گچكەی دروستكردبوو، لە روخساری منداڵانی ئەو قوتابخانەیەدا هیوا و ئۆمێدێكی زۆر خۆی بەرجەستە دەكرد، ژمارەیەكی زۆریان دەهاتنە بەردەم كامێراكە و دەستیان بە هێمای سەركەوتن بەرز دەكردەوە. لەو لاوەتر چەند قوتابی بە سەرە وەستابوون و دەمیان بە بۆڕی ئاوەكەوە دەنا و تینوویەتی خۆیان دەشكاند، یەكێك لەو منداڵانە لە وەڵامی ئەو پرسیارەدا كە پێشتر ئاوتان نەبوو، چیتان دەكرد، گوتی: "ئاویشمان نەبێت هەر دێینە قوتابخانە، چونكە نامانەوێ لە خوێندن دوابكەوین".
مامۆستا خەڵات یوسف مامۆستای جوغرافیا بووە و ئێستا مامۆستای وانەی كوردییە، ئەو خەڵكی رۆژئاوای كوردستانە و گەرچی خۆبەخشانە كارناكات و بۆ هەر كاتژمێرێك وانەوتنەوە بڕێك پارەی كەم وەردەگرێت، بەڵام ئەویش وەك مامۆستاكانی دیكە لە ناو پۆلەكان تەنانەت كورسییەكی بۆ وچان وەرگرتنێك نییە كە لە سەری دابنیشێت، سەبارەت بە خۆیشی گوتی: "من دوو ساڵە لە باشووری كوردستانم و هەرگیز هەستم بە غەریبی نەكردووە، ئێرەش بە وڵاتی خۆمان و وڵاتی هەموو كوردێك دەزانین". وەك خۆی باسیكرد ماوەی سێ مانگە لە قوتابخانەی دیرۆك مامۆستایە و وانەی كوردی دەڵێتەوە، سەبارەت بە كەموكوڕییەكانی قوتابخانەكەش گوتی: "كیماسیمان گەلەك زۆرن، ژمارەی قوتابییان لە ناو پۆلەكان زۆر زۆرە، من مامۆستای پۆلی یەكم، هەر پۆلێك نزیكەی هەشتا قوتابی تیایە كە ژوورەكەشی زۆر بچووكە، بە هاتنی رەحلەش منداڵان بە چوار كەس لە سەر رەحلەیەكن، هێشتا ژمارەیەكیشیان لە سەر عەرزەكە دادەنیشن، هەروەها ئاو نییە و كتێبیش تا ئێستا بۆ قوتابییەكان دابین نەكراوە"، ئەو مامۆستایە پێشنیاری كرد قوتابخانەكەیان كە تەنیا تا پۆلی شەش لەخۆ دەگرێت، بكرێتە دوو شفت، بۆ ئەوەی پۆلەكانی (حەوت و هەشت و نۆ)ش بكرێنەوە و ئەو منداڵانەش بخرێنە بەر خوێندن و لەوە زیاتر لە ناو ماڵ نەمێننەوە، لە كۆتایی قسەكانیشیدا گوتی: "بەڕاستی ئێستا بۆ خودی خەڵكی هەرێمیش كێشە و گرفتی زۆر درووست بووە، خەڵك مووچەی دوادەكەوێت، حكومەت سەرقاڵی شەڕی تیرۆریستانە، ئاوارەیەكی زۆریش رووی لەم هەرێمە كردووە، بۆیە بە هەموو شێوەیەك ئێمە دەستخۆشی لە حكومەت دەكەین و هیوای سەركەوتنیش بۆ هەموو كورد دەخوازین".
لە لای خۆیەوە مامۆستای خۆبەخش شاهین غیدان حەسوون، كە خەڵكی شاری (حەسەكە)ـی رۆژئاوای كوردستانە و یەكێك لە چالاكانی هەڵسووڕ بووە كە بەدواداچوونی زۆری بۆ بنیادنانی ئەو قوتابخانەیە كردووە، لە سەرەتای قسەكانیدا باسی ئەوەی كرد كە بەپێی ئاماری فەرمی 1518 خێزانی رۆژئاوای كوردستان لە سنووری كەسنەزان نیشتەجێن، تا ئێستاش زیاتر لە 700 قوتابی لە خوێندن بێبەشن، سەبارەت بە چۆنیەتی كاركردنیشیان بۆ درووستكردنی قوتابخانەكە بەمجۆرە هاتەئاخافتن: "پێش دوو ساڵ من حەزم كرد لە خولێكی ئینگلیزی بەشداری بكەم، داوام لە مامۆستا ئیلام كرد كە مامۆستای ئینگیزییە و خەڵكی رۆژهەڵاتی كودستانە كە ئینگلیزیم فێر بكات، ئەویش گوتی: تەنیا رۆژانی جومعە (هەینی) مەجالم هەیە و دەستمان پێكرد، جومعەی دواتر سێ چوار منداڵیش لەگەڵی هاتن بۆ فێربوونی ئینگیزی، سێ‌ جەمعەی دواتر لە ژوورەكەم جێگەی دانیشتن نەبوو، ئیتر چووینە لای بەڕێزان بەڕێوەبەری ناحیە و قایمقام و بەڕێوەبەری پەروەردەی دەشتی هەولێر و مۆڵەتمان وەرگرت كە تەنیا رۆژانی جومعە لە قوتابخانەی بنەڕەتی رابەر لە كەسنەزان بە منداڵانی رۆژئاوا وانە بڵێینەوە، لە رێگەی فەیسبووك ەو پەیوەندییەكانمان توانیمان نزیكەی بیست مامۆستای خۆبەخش پەیدا بكەین، كە لەو قوتابخانەیە لە رۆژانی جومعە بە بێ‌ بەرامبەر و خۆبەخشانە وانە بڵێنەوە، سەرەتا بە چوار دەرسی زمانی كوردی، ئینگلیسی، عەرەبی و بیركاری دەستمان پێكرد، ژمارەی قوتابییەكان ئەو كات گەیشتە زیاتر لە 300 قوتابی و بۆ ماوە شەش مانگ لە خوێندنی رۆژانی جومعە بەردەوام بوون، ئیتر من و مامۆستا ئیلام و مامۆستا هەوراز و و مامۆستا جەمال بەدواداچوونی زۆرمان كرد بۆ ئەوەی قوتابخانەیەك بۆ ئەو منداڵانە دروست بكرێت، لە پەروەردە وتیان بەپێی یاسا مۆڵەت نادرێ قوتابخانە بۆ ئاوارەكان لە ناو شاردا دروست بكرێ‌، بەڵام دەكرێ‌ لە قوتابخانەیەك شفتێكیان پێ بدرێ‌، ئێمە بەدواداچوونی زیاترمان كرد و ئەوانیش زانییان ژمارەی قوتابییەكان زۆرن، بۆیە توانیمان رەزامەندی وەربگرین، دواتر رێكخراوی (UNICEF) لە سەر ئەكی خۆی ئەم قوتابخانەیەی لە ساڵی 2013 دروستكرد، پەروەردەش ئەركی پێداویستییەكانی دیكەی لە ئەستۆ گرت، وەك راكێشانی ئاو و كارەبا و دابینكردنی مامۆستا و رەحلەی پێویست بۆ قوتابییەكان، بەڵام بەداخەوە تا ساڵی 2014 رێگەیان نەداین ئەم قوتابخانەیە بەكار بخەین و قوتابی لێی سوودمەند بێت، ئەمساڵیش كە كراوەتەوە هەتا ئێستاش زۆر نوقسانی زۆرمان هەیە".
مامۆستایەكی خۆبەخش دوو تەنكەر ئاوی كڕیوە
مامۆستا شاهین لە درێژەی قسەكانیدا باسی ئەوەی كرد كە بەڕێوەبەری پێشووی قوتابخانەكە "زۆر بە جددی لە هەوڵی دابینكردنی پێداویستییەكان بووە و زۆریش پێیەوە ماندوو بوو"، گوتیشی: "تەنانەت لەگەڵمان هاتە لای جەنابی وەزیر، بەڵام ئەویش لە كەمتەرخەمی و كەمكارییەكان بێتاقەت بوو، بۆیە وازی لە بەڕێوەبەرایەتی قوتابخانەكە هێنا، چونكە كارەكان زۆر بە سستی دەكران، بۆ نموونە تا ئێستا ئاوی خواردنەوەمان نییە و دوێنێ خێرخوازێك پارەی بۆ ئاوڕاكێشان دابین كردووە و مامۆستا ئیلام كە مامۆستایەكی خۆبەخشە لە سەر حیسابی خۆی دوو تەنكەر ئاوی كڕیوە".
گرینگ ئەوەیە نەوەی دواڕۆژمان بە باشی پەروەردە بكەین
مامۆستا شاهین لە كۆتایی قسەكانیدا ئاماژەی بەوە كرد كە مامۆستا ئیلام پێشمەرگەیە و لە بەرەكانی شەڕدایە و لەكاتی پشووەكانیشی وچانێك وەرناگرێت لەو قوتابخانەیە وانەی ئینگیزی دەڵێتەوە. ئێمەش مایكی (گوڵان)مان خستە بەردەم مامۆستا ئیلام و بۆ ئەوەی روانگەی خۆی لە سەر سەنگەری شەڕی دژی تیرۆر و سەنگەری پەروەردە و خوێندن و فێركاری بخاتەڕوو، ئەویش بە هەناسەیەكی وڵاتپارێزانەوە گوتی: "باسی كێشەكان كرا و دووبارەی ناكەمەوە، بەڵام راستییەكەی كێشەمان زۆرە، هەوڵی زۆریشمان داوە بۆ ئەوەی چارەسەری بكەین، ئەو منداڵانە پێویستە زیاتر بایەخیان پێبدرێ‌، چونكە لە دۆخێكی تایبەتدان، باری دەروونییان جێگیر نییە، شەڕ ماڵوێران و دەربەدەری كردوون، هەیانە بۆ ماوەی زیاتر لە سێ چوار ساڵە لە خوێندن دابڕاون".، ئەوەش دەزانین كە رەوشی ئابووریی هەرێم باش نییە و بڕینی بودجە و شەڕی دژی داعش فشاری زۆری درووستكردووە، بۆیە رازی بووین وەك مامۆستا خۆبەخشانە كاربكەین و منداڵەكانیش بە هەموو كەموكوڕییەكان رازی بوون، بەڵام منداڵ بێتاوانە و پێویستە حكومەت و رێكخراوەكان و دەزگا خێرخوازییەكانیش ئاوڕی زیاتر لە منداڵانی ئاوارە بدەنەوە، بۆ ئەوەی لانیكەم لە خوێندن دوانەكەون", گوتیشی: "لە قوتابخانە دڵم لای هەڤاڵانی بەرەكانی شەڕە و لە سەنگەریش دڵم لای قوتابییەكانە، بەڵام گرینگ ئەوەیە نەوەی دواڕۆژمان بە باشی پەروەردە بكەین و بەسەر دوژمنانی ئەم خاكە و نەیارانی نەتەوەكەماندا زاڵ بین و وڵاتمان هەر ئاوەدان و پڕ لە ئاسایش و ئاشتی بێت".