تەنیا سامانی مرۆڤ ژیانێتی كە هیچ هێزێك نییە لە دنیادا یەك چركەساتی ڕۆیشتوویمان بۆ بگێڕێتەوە، ئەی باشە چی وای لە چناری تەمەن هەژدەساڵان كرد بە بڕیارێكی بێدەربەستانەوە، هەموو چركەساتەكانی ژیانی خۆی بە پەتێكەوە هەڵواسێت و دوایەمین هەناسە لە خۆی ببڕێت..
پاش ئەوەی كوڕێكی كاسپكار بە ناوی سامان لە كۆڵانەكەی ماڵی چنار لە ناو هەموو كیژانی گەڕەكدا دڵی بە جوانی و ئەدەب و نەرمونیانی چناردا دەچێت، هەردووكیان بە هۆی مۆبایلەوە مەفتوون و شەیدای یەكتر دەبن، ئەگەرچی بە جەستەش لەیەكترەوە دووربوون بەڵام بە ڕۆح و بە تاسووقی چرپەو گۆڕینەوەی ڕازو نیازی گەرمی شەوانەی ناو مۆبایلێكی ساردوسڕەوە هەر بە خەیاڵەوە بۆ یەكتر دەتوانەوە...
وادیارە چنار وەك ئەو كیژانەی كە تا ڕادەی نەخۆشیی شەرمنۆكن و ناتوانن وەك پێویست هەست بە ژیان و جوانیەكانی بكەن، وەهابووە، ئەم كیژە شەرمنۆكانە كە هۆگری كەسێكی تر دەبن ئیترئومێد دەكەن بەوەی بچنە ڕۆحی یەكترەوە تا پێكبگەن و بەرەو كەناری ئارامی سەوڵی بەلەمیان بژنەون، كاتێك ئەو كەسەیان بۆ نابێت ئیتر وا دەزانن لە ناو دەریایەكدا بەلەمەكەیان بەرەو گەرداو دەچێت و هەموو چركەساتێك بیر لە مردن دەكەنەوە، دایكی سامان بەنیازی خوازبێنی بۆ كوڕەكەی لە دەرگای ماڵی چنار دەدات، بەڵام بە بێئومێدی و دەسەوەسانی لە دەرگاوە دێتە دەرەوەو بە هەنجەتی ئەوەی ئەو كیژە هێشتا منداڵە، مەحاڵە و نادرێتەشوو، ئیتر ئەم سەرچاوەی ئاسوودەیی بینینە كە لە بەیەكگەیشتنی دوو عاشقدا هەیە بەو ڕەتكردنەوەیەی ماڵە باوانی چنار كوێر دەبێتەوە، سامانێك كە ڕۆژانە لە ڕێی قوتابخانەو بە تەلەفۆن سێرەی لە چنار گرتبوو نەیدەزانی كە هەردووكیان قوربانی كەلتوورێكن كە خۆشەویستی نێوانی كیژو كوڕ بە عەیبە دەژمێرن، هەر ئەو كەلتوورەیە ئەگەر چنارەكان توندوخۆڕاگر نەبن دەخاتە ناو تراژیدیاوە، لە كۆمەڵگەی نەخۆشدا كیژو كوڕی عاشق پێكەوە دەبنە قوربانی دەستی كەلتوورێكی نەخۆش، جەلادی ڕاستەقینەش ئەو كەلتوورەیە كە ئەو عەقڵیەتە بەرهەم دەهێنێت كە كۆسپ دروست دەكەن بۆ نەگەیشتنی دوو دڵ بە یەكتر، گەرچی ڕەشەبای ڕۆژگار خەونی بەیەكگەیشتنی ئەم دوو عاشقەی هەڵفڕاند، بەلای سامانی واقیعبینەوە ژیان نەوەستا، هەر زوو بیری بۆ دەرفەتی ترو دۆزینەوەی كیژێكی تر كردەوە تا بیخوازێت، خۆشەویستی ڕاستەقینە لە ژیانی مرۆڤدا وەك هەر شتێك نییە كە لە دەست دەرچێت و بتوانرێت قەرەبوو بكرێتەوە، سامان بڕوای یەقینی بەوە هەبووە كە لەناو دوتوێی شەوو ڕۆژە نەهاتووەكاندا، ڕووداوو بەسەرهاتی چاوەڕوان نەكراوی بەیەكتر نەگەیشتنیش ڕەنگە هەبێت، بەڵام بۆ كیژێكی شەرمنی وەك چنار كە لە سێبەری خۆی شەرم بكات و كەمترین هاوڕێ لە ژیانیدا تۆمار بێت ئەم یەكەمین تاقیكردنەوەیەی نسكۆی بەیەكترنەگەیشتنی بە دڵدارەكەی و بێتوانایی لە بڕیاردان لە بەرانبەر باوانی وەك درەختێكی بەر ڕەشەبا دەیشكێنێتەوە، تەنانەت بوێری ئەوەی نەكردووە لەبەردەمی دایكیدا باس لەو شەیدا بوونەی خۆی بۆ سامانیش بكات و لە یەكەمین ڕەتكردنەوەی خوازبێنیكردنیدا ئەمیش بە شەرمەوە سەری ڕەزامەندی بۆ ڕەتكردنەوەكەی دایكی لەقاندووە، فزەیەكی لێوە دەرنەهاتووە تا بڵێ (من دەمەوێت ژیان لەگەڵ ئەو كوڕەدا بەش بكەم، نەك مردن.. ئەگەرنا مردنم باشترە لە دووریم لە سامان) بە دڵنیاییەوە ئەمە ختوورەی ناو دڵی چنار بووەو نەیوێراوە بیدركێنێت، بە ڕەتكردنەوەی خوازبێنیەكە چنار كەوتۆتە بەر هەستێكی تەزیوی ڕچیوەوە، ماوەی چەند مانگێك لە بری دەست گووشین و ماچێكی گەرم تەنیا كورتە نامەو قسەی پچڕ پچڕی بە ترسەوە بۆ هاتبێت، گەرچیش هەموو دڵخۆشیەكانی كە نامەگۆڕكێ دروستی كردون پێوەندی بە یەكبوونی هەستی هەردووكیانەوە هەبووە بەرانبەر بە یەكتر..
چنار لە چاوەڕوانی یەكبوونی جەستەیدا و بە ئومێدی چوونە ژێر تارای بووكێنییەوە هەموو خەیاڵەكانی كۆدەكاتەوە تا سامان لە ژیاندا بەختەوەری بكات، شەو لە دوای شەو هەستەكانی گەرمتر دەبن تا لە پڕ هێدمەی ساردبوونەوەیان دایدەچڵەكێنێت، كەسیش نییە دڵی خۆیی بۆ بكاتەوەو لەسەر شانی كەمێك بگریێ، تەنیا منداڵێكی بچكۆلانەی خوشكەزای نەبێت كە دەیلاوێنێتەوەو خەمەكانی خۆی بە گەمەكردن لەگەڵ ئەو منداڵەدا كەم دەكاتەوە، كەسێك نەبووە پێی ڕابگەیەنێت كە لەگەڵ باوەش كردنەوەی بۆ خەیاڵە ڕۆمانسیەكان، پێویست بوو ئەوەشی لەبیر بێت كە دوور نییە لە هەر كاتێكدا واقیع چارەنووسی پێچەوانەی ئەو خەیاڵە خۆشانەی لە هەگبەدا بێت..
چەند جوانە مرۆڤ لە عەشقدا خاوەنی خەیاڵی ڕەنگین بێت هێندەش جوانترە بتوانێت پاش هەر لەناوچوونی خەیاڵێك ویستی زیندوو كردنەوەو بەردەوامیدان بە خەیاڵەكان لە دەست نەدات..
پێویستە بەر لە عەشق و بەر لە ناسكبوون بەر لە پاكیزەیی، بنارەكانی نیشتمان فێر بكرێن چۆن بەرگەی نسكۆو بەرگەی خەمی بەیەكنەگەیشتن بگرن و بە ئومێدی ژیانەوە زوو تێیپەڕێنن..
باوانی چنار بەر لە مەراسیمی بەخاكسپاردنی كیژەكەیان پێویست بوو داوای لێبوردنیان لە سامانی یارە دڵسۆزەكەی كیژەكەیان بكردایە كە نیەت پاكی و دڵسۆزی خۆی نیشان دابوون بە هاتنەخوازبێنی نەك تۆماركردنی سكاڵا لەسەر سامان و تۆمەتباركردنی بەوەی لەبەر ئەو كیژەكەیان خۆی هەڵواسی..
چونكە سامان ئێستا ئەو درەختەیە كە نە گەڵای پێوەماوەو نە چیتر باڵندەی ئەوینی چنار بەسەر لقەكانیەوە دەنیشێتەوە، چناریش سادەیی و خۆڕسكێتی و شەرمنی و ترس لە نەگەیشتن بە حەزو ئاواتەكانی؛ خنكانی..
((ئەم چیرۆكە ڕووداوێكی راستەقینەیەو بەدەسكارییەوە داڕێژراوەتەوە ناوەكان خوازراون و ناوی كەسەكان نین))