كوردستان زۆر له‌وه گه‌وره‌تره كه له هه‌ندێك فیلمدا نیشان ده‌درێ
ئه‌نفال و و كیمیاباران و كۆڕه‌و سیناریۆی چه‌ندین فیلمی سینه‌مایی بوونە و هه‌ر یه‌كێك به‌شێوه‌یه‌كی جیا، سینه‌ماكارانی كوردی رۆژهه‌ڵاتیش له دوای راپه‌رین و دامه‌زراندنی په‌رله‌مان و حكومه‌تی هه‌رێمی كوردستان جێیی ده‌ستیان دیاربووه له پێشخستنی سینه‌مای كوردی، كه زۆر جار پشتیان به تراژیدیا و كاره‌ساته‌كان به‌ستووه به پشت به‌ستن به‌و ته‌كنیك و شاره‌زاییه‌ی كه له ئێران به‌دەستیان هێناوه به سوود وه‌رگرتن له سینه‌مای ئێرانی، ڤیان مایی سینه‌ماكار پێیوایه مه‌رج نییه ته‌نیا پشت به كاره‌ساته‌كان ببه‌ستین بۆ پێشخستنی سینه‌مای كوردی و له‌م باره‌یه‌وه ده‌ڵێ: من پێموایه تراژیدیا و كاره‌سات لایه‌نێكی سلبی و ناخۆشی مێژووی میلله‌تی كوردن و ده‌كرێ ببن به بابه‌تی فیلمه سینه‌ماییه‌كان، به‌ڵام من وای ده‌بینم ته‌نیا به‌وه سه‌ركه‌وتوو نابین كه ئه‌و لایه‌نه ده‌ربخه‌ین و نیشانی جیهانی بده‌ین كه تێیدا میلله‌تی ئێمه چه‌وسێنراوه‌ته‌وه و ئازار دراوه و به دڕنده‌ترین شێوه ره‌فتاری به‌رامبه‌ر كراوه، به‌شێكی زۆری ژیانی ئێمه به‌تایبه‌تی له‌لایه‌نی هونه‌رییه‌وه ده‌رباره‌ی ئه‌م كاره‌سات و تراژیدیا گه‌ورانه بوون، مێژووی كوردستان زۆر له‌وه گه‌وره‌تره كه له چه‌ند فیلمێكدا باس بكرێ و نیشان بدرێ، سینه‌ماكارانی رۆژهه‌ڵات ره‌نگه له زۆر لایه‌نه‌وه سه‌ركه‌وتوو بن به‌تایبه‌تی لایه‌نی ته‌كنیكی، به‌ڵام له‌لایه‌نی هونه‌رییه‌وه پێموایه زۆر جه‌خت كردنه‌وه له‌سه‌ر ئه‌م لایه‌نه ره‌نگه كاردانه‌وه‌یه‌كی پێچه‌وانه و سلبی هه‌بێت، پێویــــسته گرنگی به‌و كێشه و گرفتانه بده‌ین كه ئێستا له كۆمه‌ڵگای كوردیدا بوونی هه‌یه و پێویستیان به چاره‌سه‌ر كردن هه‌یه.
