دوای 9 ساڵ دووركه‌وتنه‌وه..سۆفیا لۆرین ده‌گه‌ڕێته‌وه
ده‌زگاكانی راگه‌یاندنی ئیتاڵی ئاشكرایان كرد دوای 9 ساڵ دووركه‌وتنه‌وه سۆفیا به فیلمێكی نوێ ده‌گه‌ڕێته‌وه به‌ناوی (ده‌نگی مرۆڤایه‌تی) كه له ده‌رهێنانی ئیدوارد بۆنتی كوڕیه‌تی، چیرۆكی فیلمه‌كه‌ش له شانۆگه‌رییه‌ك وه‌رگیراوه كه له نووسینی شاعیر و نووسه‌ری فه‌ره‌نسی جان كۆكتۆیە، فیلمه‌كه باس له شاره‌كانی رۆما و ناپۆلی و ئۆستیا ده‌كات و بڕیار وایه له ماوه‌ی 3 هه‌فته ده‌ست به وێنه‌ی گرتنی بكرێت.
سۆفیا لۆرین له 20ی سێپتێمبه‌ری 1934 له‌دایكبووه و خاوه‌نی زۆرترین جه‌ماوه‌ر بوو له مێژووی سینه‌مای ئیتاڵی و خه‌ڵاتی ئۆسكاریشی به ده‌ستهێناوه، دواین كاری سینه‌مایشی ده‌گه‌ڕێته‌وه بۆ ساڵی 2004 ئه‌ویش فیلمی (رۆمانسیه‌تی زۆرتر) بوو و سه‌ركه‌وتنێكی به‌رچاوی به‌ده‌ستهێنا و له‌و كاته‌وه تا ئێستا به‌شداری له هیچ كارێكی سینه‌ماییدا نه‌كردووه.
