دوای ئەوەی یاریزانی یانەی هەولێر مەهدی كەریم لە پاڵەوانێتی جامی عەرەب، كە لە وڵاتی سعودیە بەرێوەچوو تووشی پێكانێكی سەخت هات و چەند مانگێكە بەهۆی چارەسەركردنی لەم پێكانە لە وڵاتی قەتەر نەشتەرگەرییەكی ئەنجامدا و ئێستا لە قۆناغی چاكبوونەوەی تەواوە، لە لێدوانێكی تایبەتدا لە وڵاتی قەتەر مەهدی كەریم یاریزانی یانەی هەولێر گوتی: ماوەی چەند مانگێكە لە وڵاتی قەتەر چارەسەری ئەم پێكانە دەكەم، كە لەگەڵ هەڵبژاردەی عێراق لە جامی عەرەب تووشی بووم، بەسەرپەرشتی پزیشكی فەرەنسی و بەسەركەوتوویی نەشتەرگەرییەكەم ئەنجامدا و چارەسەركردنم بە سێ قۆناغ تیپەری.
لە درێژەی قسەكانیدا مەهدی كەریم گوتی: رۆژی چوارشەممە دەگەرێمەوە شاری هەولێر دوای ئەوەی بەسەركەوتووی هەر سێ قۆناغی چارەسەركردنم تیپەراند، بەڵام دەبێت بۆ دواین جار لە چەند مانگی داهاتوو بگەرێمەوە وڵاتی قەتەر بۆ ئەوەی پزیشك چەند رێنماییەك و مەشقی تایبەتم بۆ دادەنێت بۆ دڵنیا بوون لە چاكبوونەوەم دواتر راستەوخۆ دەگەرێمەوە یاریگا و دەتوانم لەگەڵ یانەی هەولێر بەشداری لە یارییەكان بكەم.
لە كۆتایی قسەكانیدا مەهدی كەریم گوتی: ناتوانم بەشداری لە یارییەكانی جامی یەكێتی ئاسیا بكەم، بەتایبەتی كاتێك ئەگەر یانەی هەولێر سەربكەوێت بۆ یاری كۆتایی، بەڵام پشتگیری لە یاریزانەكان دەكەم و بەو هیوای بتوانن دەستكەوتێكی مێژوویی بۆ یانەی هەولێر لەم پاڵەوانێتیە تۆمار بكەن، پەنا بەخوا لە یارییەكانی خولی نایابی عێراق بەشداری لەگەڵ یانەی هەولێر دەكەم.