دوای ئەوەی پاڵەوانی پێشووی پێشبڕكێكانی فۆرملا یەك مایكل شۆماخر لەگەڵ تیپی مارسیدس بەردەوام نەبوو و ئەم تیپەی جێهێشت، بەڕێوەبەری وەرزشیی تیپی مارسیدس نۆربرت هاوگ تەئكیدی لە سەركەوتنی مایكل شۆماخر- كردووە لە سێ وەرزی رابردوودا لەگەڵ تیپەكەی و گوتی: ئێمە ناتوانین بڵێین مایكل شۆماخر لەگەڵ تیپەكەمان سەركەوتوو نەبوو لە سێ وەرزی رابردوو، بەڵكو شۆماخر دەیتوانی ئەنجامی باش بە دەستبهێنێت ئەگەر ئۆتۆمبێلێكی باشی لە ژێر دەستبوایە.
جێگەی باسە وا بڕیارە لە ساڵی 2013 شۆفیری بەریتانی لویس هامیلتۆن شوێنی مایكل شۆماخر بگرێتەوە لە تیپی مارسیدس.
لە درێژی قسەكانیدا بەڕێوەبەری وەرزشی مارسیدس گوتی: مایكل چانسێكی زۆر لەبەر دەستدابوو بۆ بیركردنەوە، بەڵام دەیزانی دەبوایە شۆفێریكی تر بهێنین بۆ ئەوەی شوێنی بگرێتەوە.
جێگەی باسە تا ئێستا دیار نییە ئایا شۆماخر لە پێشبڕكێكانی فۆرملا یەك بەردەوام دەبێت یان بەیەكجاری واز لە پێشبڕكی فۆرملا یەك دەهێنێت.