دوای ئەوەی یانەی سلێمانی بەمەبەستی بەهێز كردنی ریزی پێكهاتەی یانەكەی و بەدەستهێنانی ئەنجامێكی شایستە لە یارییەكانی خولی بژاردەی یانەكانی عێراقیدا دیدار حامد لە مانگی رابردوو بەفەرمی گرێبەستێكی بەبڕی 65 ملیۆن دیناری عێراقی لەگەڵ یانەی سلێمانی مۆركرد، بۆ ئەوەی لە خولی بژاردەی عێراقی یاریی بۆ یانەی سلێمانی بكات،بەڵام بەهۆی چەند كێشەیەكەوە دیدار حامد ریزی یانەی سلێمانی بەجێهێشت و بەرەو شاری هەولێر هاتەوە، لە ئێستاشدا گرێبەستی لەگەڵ هیچ یانەیەكدا مۆرنەكردووە،لەم بارەشەوە ئەیوب عەزیز سەرپەرشتیاری تۆپی پێی یانەی وەرزشی سلێمانی بە گۆڤاری گوڵانی راگەیاند «پێشتر لەگەڵ دیداردا رێكەوتبووین تاوەكو بۆ ماوەی وەرزێك و بەبڕی 65 ملیۆن دینار یارییان بۆ بكات و لەرووی نرخی گرێبەستەكەشەوە هەردوولا هیچ كێشەیەكیان نەبووە.ناوبراو گوتیشی بەهۆی رێكنەكەوتنی هەردوولا لەسەر چەند وردەكاریەكی ناو گرێبەستەكە و سەرقاڵی دیدار بەچەند كارێكی خۆیەوە لەشاری هەولێر، بڕیاریانداوە پێش ئەوەی گرێبەستەكەی لەلایەن یەكێتیی تۆپی پێی عێراقەوە پەسەند بكرێت، گرێبەستەكەی دیدار هەڵبوەشێننەوە.
بەوتەی سەرپەرشتیاری تۆپی پێی یانەی سلێمانی لەگەڵ قائید سەدیری برای ساڵح سەدیر و گۆڵچی یانەی نەجەف گفتوگۆكانیان دەستپێكردووەو بڕیارە رۆژی یەك شەممە گۆڵچی ناوبراو بگاتە شاری سلێمانی، پێشتریش یانەی سلێمانی گرێبەستی لەگەڵ هەردوو گۆڵچی عەلا خەلیل لەیانەی كەرخ و ئیسماعیل ئەحمەد لەیانەی پێشمەرگە ئەنجامداوە، كە نرخی گرێبەستی ئەوەی یەكەمیان 23 ملیۆن دینارە و گرێبەستەكەی ئیسماعیلیش 16 ملیۆن دینارە. لە بەرامبەریشدا دیدار حامد گۆڵچی پێشووی یانەی هەولێر بەگۆڤاری گوڵانی راگەیاند «هەر چەندە پێشتر من و یانەی سلێمانی رێكەوتنی فەرمیمان مۆركردبوو كەوا لە خولی بژاردەدا یاریی بۆ یانەی سلێمانی بكەم،بەڵام بەهۆی هەندێك كێشەوە گرێبەستەكەم هەڵوەشاندەوەو زیاترگوتی: یانەی سلێمانی بڕیاری ئەوەیان دابوو بە هەموو شتێكی من ڕازی بن، بەڵام دواتر لە زۆر شت پەشیمان بوونەوە، یانەی سلێمانی بە منیان گوت هەفتەی سێ رۆژ وەرە مەشقەكانمان دواتر پەشیمان بوونەوە گوتیان دەبێ شەش رۆژ بێیتە مەشقەكان،هەروەها گوتیان مووچەی مانگانەمان بۆ تۆ ملیۆنێك و نیو داناوە، كێشەمان بۆ دروست بووە دەبێت كەمی بكەینەوە، بۆیە منیش بەوانە ڕازی نەبووم، بڕیاری واز هێنانم داو گرێبەستەكەم هەڵوەشاندەوە، ئێستاش نەچوومەتە هیچ یانەیەكەوە.