ستیڤن جیراردی كاپتنی یانەی لیڤەرپوولی ئینگلیزی گوتی تیپەكەمان ئەمساڵ لە كۆتاییدا یەكێك دەبێت لە چوار گەورە پێشەنگەكەی ئینگلتەرا.
جیرارد هەروەها متمانەی خۆی بە ئاستی لیڤەرپوول لە وەرزی ئەمساڵدا دەربڕی و گوتی لیڤەرپوول دەتوانێ یەكێك بێت لە چوار یانەكەی پێشەنگی خولی ئینگلیزی و بەوەش وەرزی داهاتوو بۆ خولی یانە پاڵەوانەكانی ئەوروپا سەربكەوێت كە ئەوە ئامانجی سەرەكی یانەكەیە.
جیرارد لە لێدوانی بۆ رۆژنامەی دەیلی میرۆری ئینگلیزی گوتی ئاستی تیپەكە و یاریكردن و توانای یاریزانەكان بە شێوەیەكی بەرچاو گەشەی كردووە و لەگەڵ تێپەڕینی یارییەكاندا زیاتر هەست بە گونجان دەكەین و ئەوەش گەشبینی كردووین بە ئاستی تیپەكەمان.
یانەی لیڤەرپوول لە سەرەتای وەرزی ئەمساڵدا ئاستێكی باشی پێشان نەداوە و سەرەتای ئەم هەفتەیە توانی یەكەم یاری خۆی لە خولەكەدا لە یانەی سوانزی بباتەوە بە ئەنجامی 5-2 گۆڵ.