جوان جەمال یەكێكە لە كچە یاریزانە بەناوبانگەكانی یاریی شەترەنج لەسەر ئاستی كوردستان وعێراق، خاوەنی چەندین ئەنجامی بەرچاوە لە پاڵەوانێتییە نێودەوڵەتییەكان وخاوەنی ژمارەیەك میدالیای جۆراو جۆرە و بەیەكێك لە باشترین كچە وەرزشوانی عێراق و كوردستان دادەنرێت، ناوبراو یاریزانی یانەی پێشمەرگەی سلێمانی و هەڵبژاردەی عێراقە،ئەو لەدایكبووی ساڵی 1972ی هەولێرە ودەرچووی ئەندازیاریی شارستانییە وئێستاش قوتابی ماجستێرە لەكارگێڕی، لە نزیكەوە ئەم دیمانەیمان لەگەڵیدا سازكرد.



*ئاستی یاریی شەترەنج لە كوردستاندا چۆن دەبینیت؟
-لە ئێستادا بەرەو پێش دەچێت،بەڵام وەكو پێویستیش نییە، لە كوردستان تەنیا 4 بۆ 5 یانە بەردەوام ئاستیان بەرزە، ئەوەش رێژەیەكی كەمە كە ئاستی شەترەنج لە شارەكانی كوردستان بەم شێوەیە بێت.
* هۆكاری ئاستی دابەزینی ئەم یارییە چییە ؟
- لە ئاستی كچاندا دابەزیوە، هۆكارەكەشی بۆ ئەوە دەگەڕێتەوە كە هەر یاریزانە كۆنەكان بەردەوام لە یاریكردنن و هیچ یاریزانێكی نوێ دروست نەبووە و گرنگیان پێنەدراوە، ئەو یاریزانە تازانەش پێویستیان بە گرنگیی زیاترە لەسەر ئاستی یانەكان.
* ئێوە وەكو یاریزانە بەتواناكانی شاری هەولێر چۆنە رووتان لە شاری سلێمانی كردووە؟
-ئەو ئیمكانییەتانەی یانەی پێشمەرگەی سلێمانی پێمان دەدات، یانەكانی شاری هەولێر پێمان نادەن.بە دڵنیاییەوە بەرپرسانی وەرزش هۆكارن كە یاریزانە باشەكانی هەولێر ڕوو لە شارەكانی دیكە دەكەن.
*داواكاری وپێشنیازت بۆلایەنی بەرپرس چییە ؟
-هیوادارم گرنگیی تایبەت بە یاریی شەترەنج بدرێت، یاریی شەترەنج لە هەولێر و كوردستان زیاتر پەرەی پێبدرێـت و بگاتە لوتكەی وەرزشی كوردستان .
*كێشەو گرفتی یاریی شەترەنج زیاتر لە چیدا ڕەنگ دەداتەوە ؟
-كێشەكان بریتین لە نەبوونی هۆڵێكی گونجاو بۆیاریی شەترەنج، تاكو ئێستا لە شاری هەولێر هۆڵێكی گونجاومان نییە بۆئەوەی مەشقی تێدا بكەین وپاڵەوانێتییەكی تێدا ئەنجام بدرێت، زۆربەی پاڵەوانێتییەكان لە هوتێلەكان بەڕێوەدەچن، دەبێ هۆڵێكی شیاومان هەبێت بۆئەم یارییە لە پایتەخت.
* پێویست ناكات یاریی شەترەنج بخرێتە ناو پرۆگرامی خوێندنەوە ؟
- كارێكی زۆر باشە ئەگەر بخرێتە ناو پرۆگرامی خوێندن لە قوتابخانەكاندا و وانەی شەترەنج بخوێندرێت.
*باشترین ئەنجامەكانت لەسەر ئاستی عەرەب چین؟
-مەدالیای برۆنز لە پاڵەوانێتیی ئێران، مەدالیای زیویش لە پاڵەوانێتیی عەرەبی لە وڵاتی یەمەن و چەندین ئەنجامی بەرچاوتریشم بەدەست هێناوە.
*چی بكرێت بۆئەوەی كچە یاریزانان زیاتر بێنە نێو بواری وەرزشییەو ؟
- پێویستە خانەوادەكان زیاتر هانی رۆڵەكانیان بدەن بۆئەوەی كچەكانیان خۆشەویستییان بۆ وەرزش زیاتر بێت و بێنە نێو وەرزشەوە.
*كارگێڕانی یانەكەتان چۆن هاوكاریتان دەكەن؟
-بە شێوەیەكی زۆر باش هاوكارمانن لە گشت روویەكەوە .
*بەرنامەت بۆداهاتوو چییە ؟
-بەنیازم بەردەوام لە بەرەو پێشچووندابم، بەرنامەیەكی تۆكمە بۆخۆم دابنێم بۆئەوەی پەرە بە ئاست و توانای خۆم بدەم لە پاڵەوانیتیەكانی داهاتوودا ئەنجامێكی دڵخۆشكەر بەدەست بهێنم.
* ئەگەر لە كۆتایيدا شتێكت ماوە بیڵێیت؟
-سوپاس بۆگۆڤاری گوڵان بەردەوام هاوكاری وەرزشكاران دەكات لە گشت شارەكانی كوردستان، بەهیوای ئەوەم زیاتر هانی وەرزشكاران بدەن.