مەسەلەی گواستنەوە و راگواستن لە داهاتوویەكی نزیكدا گۆڕانكارییەكی زۆری بەسەردا دێت، قەرەباڵغی و ترافیك لەسەر زەوی كەمدەبێتەوە و لە ئاسماندا زیاد دەبێت، ئۆتۆمبیلەكان لەبری شوستە و جادەكان بە ئاسماندا دەفڕن.. ئەگەر بتهەوێ لە شارێكەوە بەرەو شارێكی دیكە بڕۆی تەكسی ئاسمانی دەتگوازێتەوە. هەر لە ئێستاوە بۆ گەیشتن بەئامانجەش هەوڵ دراوە..
كۆمپانیای (بێل نیكسۆس) لە پیشانگای ساڵانەی CESدا تەكسیەكی فڕۆكی خستەڕوو، تەكسی فڕۆكە لە شەش رۆتێر بۆ فڕین سوود وەردەگرێ، هێزی وزەی بەگەڕخەری فڕۆكەكە لە باتری و گاز (غاز)ە. كۆمپانیای ناوبراو رایدەگەیەنێ كە لە ساڵی 2020دا تەكسی فڕۆك دەكەوێتە واری كردارییەوە.
تەكسیە فڕۆكەكەی (بێل نیكسۆس) بە EVTOL ناسراوە، هەرچەندە پێشووتریش هەوڵێكی زۆر دراوە بۆ ئەوەی لە داهاتوودا هەوڵ بدرێ ئۆتۆمبیلەكان لە زەوییەوە بەرەو ئاسمان بگوازنەوە و هەم كێشەی رێگاوبان نەیەتە پێش و هەم ئاسانكاری و خێرایی بۆ گەشتە كورت مەوداكان ئەنجام بدرێت.