لە لێكۆڵینەوەیەكی ئەمریكیدا هاتووە كە دووكەڵی نێرگەلە Hookah زیاتر لە دووكەڵی جگەرەی ئاسایی و جگەرەی ئەلیكترۆنی ماددەی ژەهراوی و كیمیایی زیانبەخش لەخۆدەگرێت، ئەمە جگە لە ماددەی نیكۆتین كە هۆكارە بۆ راهاتن لەسەر تووتن، یان جگەرەكێشان، جەخت لەوەش كراوەتەوە كە كێشانی نێرگەلە لە هەموو جۆرەكان و رێگاكانی دیكەی كێشانی تووتن زیانبەخشترە. دووكەڵی نێرگەلە كە راستەوخۆ هەڵدەمژرێت ئاوێتە كاربۆلینەكان Carbonyls و بێنزین Benzene لەخۆدەگرێت، كە ماددەیەكی شێرپەنجەییە. لەبەر هەڵمژینی قەبارەیەكی زۆری دووكەڵ لەگەڵ هەر هەڵكێشانێكی نێرگەلەدا، رێژەیەكی زیاتری ماددەی كیمیایی دەگەنە لەش، بۆنموونە رێژەیەكی بەرز لە گازی یەكەم ئۆكسیدی كاربۆن كە بە شێوەیەكی سەرەكی لە سووتانی رەژووی نێرگەلە سەرچاوە دەگرێت، كە بە مەبەستی گەرمكردنی تووتن و چەند ماددەیەكی دیكەی ناو نێرگەلە بەكاردێت، ئەمەش گەلێك جار دەبێتە هۆی پەیدابوونی گازی ژەهراویی دیكە. لە لایەكی دیكەوە بوونی تەنۆلكەی ورد كە تیرەكەیان لە 100 نانۆمەتر بچووكترە لەناو دووكەڵی نێرگەلەدا بە رێژەیەكی بەرز دەستنیشان كراون، بەتایبەتی لە 10 خولەكی سەرەتای كێشانی نێرگەلەدا. بە پێی توێژینەوەكان، ئەم تەنۆلكە وردانە ریسكی تەندروستیی بەرچاویان هەیە، چونكە دەگەنە بەشە هەرە قووڵەكانی سییەكان، ئینجا بۆ ناو خوێن و پاشان بەربەستی خوێنیی مێشك BBB دەبڕن و دەگەنە هەموو شانەكای مێشك.