زۆربەی جۆرەكانی بۆیەی نینۆك NailPolish بە بڕی جیاواز ماددەی ژەهراوی یان زیانبەخش لەخۆ دەرگرن، هەندێك لەو ماددانە وەكو (فۆرمەلدیهاد) دەبنە هۆی شێرپەنجە، هەندێكی تر دەبنە هۆی تێكدانی سیستم و هاوسەنگیی هۆرمۆنەكان. تۆلین Toulene، فۆرمەلدیهاید Formaldehyde، لەگەڵ دایبیوتیل فتالەیت Dibutylphthalate مەترسیدارترین سێ ماددەی ژەهراویین كە لە زۆربەی جۆرەكانی بۆیەی نینۆكدا بە رێژەی جیاواز بوونیان هەیە و بەتایبەتی لەلایەن كارمەندانی ساڵۆن و ئارایشگاكان بوونەتە جێگای باس و گرنگی پێدان. تۆلین كە شلەیەكی بێ ڕەنگە بە شێوەی سەرئێشە، سەرسووڕان، هەستكردن بە ماندووبوون، لەگەڵ ئەگەری گرفت لە جگەر و گورچیلەدا كاریگەریی نەرێنی لە سەر كۆئەندامی دەمار دا دەنێت. فۆرمەلدیهاید ماددەیەكی شێرپەنجەییە پاش هەڵمژینی هەڵمەكەی دەبێتە ئەگەری كۆكە، سووتانەوەی قوڕگ لەگەڵ درووسبوونی خیزەی سینگ لەكاتی هەناسەدان، هەروەها بە بەركەوتنی راستەوخۆ بەپێست دەبێتە هۆی سووربوونەوە و خوراندن. دایبوتیل فتالەیت كاریگەریی نێگەتیڤی هەیە بۆ سیستمی زاوزێ. بۆیەی نینۆك جگە لەمانە، ماددەی زیانبەخشی تریش لەخۆدەگرێت. ئەو كەسانەی كە لە ساڵۆن و ئارایشگاكاندا كار دەكەن، زیاتر رووبەڕووی ئەم ماددانە دەبنەوە، بەتایبەتی ئەگەر دەمامك (ماسك) بەكارنەهێنن، هەروەها نەبوونی هەواگۆڕكێی دروست لە سالۆن و ئارایشگاكان هۆكارە بۆ قەتیسبوونی ئەم ماددانەی كە لە بۆیەی نینۆكەوە دەگەنە هەوا و پاشان راستەوخۆ بەر پێست دەكەون، یان لەگەڵ هەناسەدا هەڵمدەمژرێن، لێرەدا كارمەندەكان زیاترین زیانیان بەردەكەوێت، چونكە زۆرترین كات لەناو ساڵۆنەكاندا بەسەر دەبەن.