ئەگەرچی نواندنی منداڵ لەسەر پشت بە باشترین پۆزیشنی نووستن دادەنرێت، بەڵام هەندێك لایەنی تر هەن كە پێویستە دایك و باوك گرنگی پێبدەن. كاسەی سەری منداڵ زۆر نەرمە، بۆیە كە منداڵ بۆ ماوەیەكی زۆر لەسەر یەك پۆزیشندا دەخەوێت، ئەوا كاسەی سەر شێوەیەكی تایبەت وەردەگرێت. یەكێك لە ئاكامە خراپەكانی بەردەوام نواندنی منداڵ لەسەر پشت بریتییە لە شەت و خواربوونی كاسەی سەر Plagiocephaly یان فلاتبوونی كاسەی سەر لەگەڵ نایەكسانی و ناڕێكبوونی بەشەكانی كاسەی سەر لەبەر فشاری دووبارە و بەردەوام لەسەر ئێسكە نەرمەكانی كاسەی سەر كە هێشتا یەكتریان نەگرتووە، ئەمەش دەبێتە هۆی ناڕێكبوونی شێوەی كاسەی سەر. نووستن لەسەر پشت بۆ ماوەیەكی زۆر هۆكارە بۆ گەلێك گرفتی تر، بۆ نموونە كەمبوونەوەی گەشەی قژ لەو بەشەی سەر كە دەكەوێتە ژێر فشاری بەردەوام، نایەكسانی لە ئاراستە و قەباری گوێیەكان، بەرجەستەبوونی پێشەوەی سەر بە ئاراستەی لایە فلاتبووەكەی سەر. نواندنی بەردەوامی منداڵ لەسەر پشتدا هۆكارە بۆ نایەكسانی قەبارەی لای راست و چەپی كاسەی سەر Asymmetry،ئەمەش هۆكارە بۆ جیاوازی لە گەشە و پەرەسەندنی مێشكدا، هەروەها گرفت لە چاوەكان،گرفت لە شەویلاك و گرفت لە گوێیەكاندا بەشێوەی كۆبوونەوەی شلەیەكی مۆمی لەجیاتی هەوا لەناو گوێدا Glue ear.بەكارهێنانی كڵاو یان (خودەی Helmet) تایبەت بۆ سەر لەكاتی گونجاودا لەوانەیە كە سوودی هەبێت بۆ راستكردنەوەی كاسەی سەر.