ئەگەرچی بەكارهێنانی لەولەب IUD رێگایەكی كاریگەرە، بەڵام لەگەڵ ئەمەشدا لەوانەیە كە ببێتە هۆی گەلێك گرفتی تەندروستی، بۆ نموونە ئەگەری زیادبوونی ئازار و ناڕحەتی لەكاتی سووڕی مانگانەدا، ئەگەری قوڕسبوونی سووڕی مانگانە یان بینینی بڕی خوێنی زیاتر، ئەگەری كونبوونی دیواری منداڵدان لەكاتی دانانیدا، دەرپەڕینی لەولەب لە شوێنی خۆی Expulsion بەتایبەتی لە ساڵی یەكەمی پاش دانانی، بەمەش ئەگەری دووگیانبوون دێتە پێشەوە،ئەگەری روودانی دووگیانی كە رێژەكەی دەگاتە 1%، گەلێك جاریش پاش دانانی لەولەب لەوانەیە كە دووگیانی لە دەرەوەی منداڵداندا رووبدات Ectopic pregnancy كە حاڵەتێكی پڕ مەترسییە و پێویستی بە چارەسەرێكی كتوپڕەوە هەیە. بەگشتی لەولەب 2 جۆری هەیە: لەولەبی سفر Copper IUD ماددەی كۆپەر دەردەداتە ناو منداڵدان، لەولەبی هۆرمۆنی Hormonal IUD كە بە هۆرمۆنی پرۆجیستیرۆن Progesterone باركراوە. زیانەكان پاش دانانی لەولەبی هۆرمۆنی بریتین لە: ئەگەری پەیدابوونی كیسی هێلكەدان، ئازار لە مەمكدا، گۆڕان لە مەزاج، سەرئێشە، پەیدابوونی زیپكە.