پەككەوتنی دڵ Hart failure واتە نەمانی توانای دڵ بۆ پاڵنانی خوێنی ئۆكسێنراو بە دروستی بۆ هەموو بەشەكانی لەش. دڵ كە لاواز دەبێت، دیوارەكانی ئەستوور و سخ دەبن، ئەوكاتە ماسوڵكەی دڵ ناتوانێت فرمانی خۆی بە چوستی ئەنجام بدات. بە تێپەڕبوونی كات و لەگەڵ كەم گەیشتنی خوێنی ئۆكسێنراو بە مێشك و ماسوڵكەكانی لەش، شلە لە سییەكان و شانەی تردا كۆدەبێتەوە. كەمی ئۆكسجین هۆكارە لەپاڵ نیشانە سەرەكییەكانی پەككەوتنی دڵ بەتایبەتی هەستكردن بە ماندووبوون، هەناسەتەنگی و گرفت لە هەر كارێكدا كە چاڵاكی فیزیكی پێویست بكات. نیشانەكانی پەككەوتنی دڵ بریتین لە: هەناسەتەنگی بەتایبەتی لەكاتی ئەنجامدانی جوولە یان چاڵاكیی فیزیكیدا، هەستكردن بە ماندووبوون و هیلاكی، هەستكردن بە سووكبوونی سەر، بەرگەنەگرتنی مەشقی وەرزشی، كۆكەی درێژخایەن، هەستكردن بە ویزە لە سینگ لەكاتی هەناسەدا، كەمبوونەوەی ئارەزووی خواردن، ئاوسانی گۆزرینگەكان، هەندێك جاریش سینگ ئێشە. بەگشتی نیشانەكان لەكاتی پاڵكەوتن و لەكاتی شەودا دژوارتر دەبن. هۆكارە هاندەرەكانی نەخۆشیی دڵ ئەمانەن: بەرزبوونەوەی پەستانی خوێن، تووشبوون بە نۆرەی دڵ لە رابردوودا، قەڵەوی، جگەرەكێشان، كەمی ڤیتامینەكان، هەوكردنە ڤایرۆسییەكان، نەخۆشیی زگماكیی دڵ، هەناسەتەنگی لەكاتی نووستندا Sleep apnea، ژاراویبوون بە كانزا قوڕسەكان، خۆراكی ناتەندروستییانە كە بڕی زیادی چەورییە خراپەكان و خوێ لەخۆبگرێت، زیاد دانیشتن و كەمی چاڵاكیی فیزیكی، سترێس، نەخۆشیی خوێنبەرەكانی تاجی دڵ، ئاوسانی ماسوڵكەی دڵ Cardiomyopathy، نەخۆشی زمانەكانی دڵ.