بالوكە Warts گرێیەكی ڤایرۆسی پێستە، زیاتر لە پێستی دەست وپێیەكاندا بەدی دەكرێت. بالوكە لە هەموو تەمەنێكدا دەبینرێت، ڤایرۆسی بالوكە HPV زیاتر دوچاری ئەو كەسانە دەبێت كە بەرگری لەشیان لاوازە. بالوكە نەخۆشییەكی گوازراوەیە، ڤایرۆسەكەی بە رێگای بەركەوتن دەگوازرێتەوە.رووی بالوكە زبرە و هاوكاتە لەگەڵ خورشت، قەبارەی بالوكە بەگشتی لە نێوان 0.5 -10 ملم دایە، رەنگیان پەمەیی یان گۆشتی یان سپییە. پاش گەیشتنی ڤایرۆسی بالوكە بە پێست بە چەند مانگێك ئینجا گرێی بالوكە بەرجەستەبێت. لە رووی شێوەوە، بالوكە بە چەند شێوەیەك بەدی دەكرێت وەكو بالوكەی فلات Flat warts، بالوكەی مۆزایك، بالوكەی ناڕێك. رێگاكانی چارەسەركردنی بالوكە بریتین لە: لابردنی بالوكە بە فریزكردن Cryotherapy، بەكارهێنانی ترشی سالیسیلیك Salicylic acid بە شێوەی لەزگە یان گیراوە، بەكارهێنانی لەزگەی زیوی Silver duct tape كە بۆ ماوەی 6 رۆژ لەسەر بالوكەدا دەهێڵرێتەوە پاشان دەتوانرێت كە چەند جارێكی تر دووبارە بەكاربهێنرێتەوە تا نەمانی یەكجاەركی بالوكە، هەروەها چارەسەر بە تیشكی لێزەر بە مەبەستی سووتاندنی بۆڕییە زۆر باریكەكانی خوێن لەناو بالوكەدا، بەمەوە شانە هەوكردووەكە لەناودەچێت و دەوەرێت، بەڵام پاشان لەوانەیە كە ببێتە هۆی ئازار یان دروستبوونی ئاسەوار لە شوێنی بالوكەدا.