بە رای پسپۆڕانی تەندروستی هێندەی نەماوە كە خوێنی دەستكرد Artificial blood بەردەست بێت پاش هەوڵدان و لێكۆڵینەوە بۆ نزیكەی 80 ساڵ بە مەبەستی ئامادەكردنی خوێنی دەستكرد. خوێنی دەستكرد بە شێوەی پاودەر لە ساردكەرەوەدا هەڵدەگیرێت و دەبێتە شۆڕشێك لە پزیشكیدا بەتایبەتی بۆ حاڵەتە خێرا و لەناكاوەكان. لێكۆڵەران سەركەوتوو بوون لە ئامادەكردنی خڕۆكەی سووری دەستكرد كە توانای یەكگرتن و گواستنەوەی گازی ئۆكسجینیان لە سییەكانەوە بۆ هەموو بەشەكانی لەش هەیە. خوێنی دەستكرد بە شێوەی پاودەری وشككراو كە وەكو بیبەری سووری وردكراو وایە لەناو كیسی نایلۆن هەڵدەگیرێت لەناو ئەمبیولانس یان هەرشوێنێك كە دەكرێ تا ماوەی ساڵێك یان زیاتر هەڵبگیرێت و لەكاتی پێویستدا لەگەڵ ئاوی دڵۆپێنراو یان (ستێریلكراو) تێكەڵ بكرێت وەكو خوێنی ئاسایی لە رێگای خوێنهینەری باسكەوە بەكاربهێنرێت. خانە یان خڕۆكە سوورە دەستكردەكانی خوێن كە قەبارەیان پێنج یەكی خڕۆكە سوورە ئاساییەكانە، لە پوختەی پرۆتینەكانی هیمۆگلۆبینی مرۆڤەوە دروست دەكرێن و بە چینێكی پۆلیمەری Polymer دەستكرد دادەپۆشرێن، بەمەوە دەتوانرێت كە خوێنی دەستكرد بدرێت بە هەر كەسێك كە خاوەنی هەر گروپێكی خوێن بێت. لە ئامارەكاندا هاتووە كە هۆكاری نزیكەی 70%ی مردنەكان لە بەرەكانی جەنگدا دەگەڕێتەوە بۆ هێدمە لە ئەنجامی ونكردنی خوێن(خوێن بەربوون) نەك برینداربوونی ئەندامە گرنگەكانی لەش، بۆیە لێرەدا بوونی خوێنی دەستكرد لەبەردەستدا رۆڵێكی گەورەی دەبێت بۆ رزگاركردنی ژیانی بریندارانی تووشبوو بە خوێنبەربوون. هەروەها بە گوێرەی درەنگ گەیشتنی بریندارانی كارەساتەكان بە نەخۆشخانە و ئامادەكردن و ئەنجامدانی خوێن گواستنەوە.