خۆراك باشترین سەرچاوەیە بۆ زۆربەی ماددە گرنگەكان Nutrients، بەڵام ئایا بەكارهێنانی كۆمەڵە ڤیتامین هاریكار دەبێت بۆ دابینكردنی هەموو ڤیتامینەكان بەتایبەتی ئەگەر لە خۆراكەوە دابین نەكرێن؟ لەشی مرۆڤ بۆ جێبەجێكردنی فرمانەكانی بە دروستی، پێویستی بە گەلێك ڤیتامین و كانزا هەیە. ڤیتامین و كانزاكان رۆڵیان هەیە بۆ خۆپاراستن لە نەخۆشیی دڵ و هەندێك جۆری شێرپەنجە وەكو شێرپەنجەی كۆڵۆن و ملی منداڵدان. خۆشبەختانە دەتوانیت كە زۆربەی ئەم ماددە گرنگانە بۆ لەش دابین بكەیت تەنیا بە جۆراوجۆركردنی خۆراك، لەگەڵ ئەمەشدا هێشتا گەلێك كەس بۆ دڵنیابوون لە دابینكردنی بڕی تەواوی ئەم ماددانە، كەپسول یان دەنكی مالتی ڤیتامین Multivitamins و كۆمەڵە كانزا یان مالتی ماینیرال Multiminerals بەكاردێنن. لەگەڵ تەمەندا پێویستییەكانمان بە ڤیتامین و كانزایەكان گۆڕانی بەسەردادێت، بۆیە پێویست بە بەكارهێنانی هەندێك جۆری ڤیتامین یان كانزا دەكات، بۆ نموونە ئافرەت لە ساڵانی دووگیانبووندا پێویستی زۆری بە ڤیتامین B9 (ترشی فۆلیك یان فۆلێت) هەیە بۆ كەمكردنەوەی ئەگەری سەقەتە زگماكییەكانی كۆرپە، هەروەها ئافرەت لە لە 3 مانگی سەرەتای دووگیانیدا پێویستی بە مەلتی ڤیتامین هەیە. ئافرەتی بەتەمەن پێویستی بە كانزای كالسیۆم هەیە بۆ رێگرتن لە پوكانەوەی ئێسك و شكانی ئێسك. كەسانی رووەكی Vegetarians پێویستییان بە ڤیتامین D و ڤیتامین B12 هەیە. بەگشتی بۆ كەسانی پێگەیشتوو بەكارهێنانی مەلتی ڤیتامین بەبێ هۆكارێكی دایاریكراو زیانی نییە.
