لەیزیك LASIK نەشتەرگەرییەكی چاوە كە شێوەی چینی كۆرنیا Cornea بۆ هەمیشە دەگۆڕێت بە مەبەستی باشتركردنی بینین لەجیاتی بەكارهێنانی چاویلكە یان هاوێنەی لكاو.نەشتەرگەریی لەیزیكتەنیا بۆ كورتبینی Nearsightedness یان دووربینی Farsightedness سووك یان مامناوەندی چارەسەرێكی گونجاوە، جا هاوكات بە بوونی یان بە نەبوونی ئەستیگماتیزم Astigmatism. ملیۆنان كەس پێیان باشە كە نەشتەرگەریی لەیزیك بۆ چاویان ئەنجام بدەن لەجیاتی بەكارهێنانی چاویلكەی پزیشكی، یان هاوێنەی لكاو، بەڵام لە راستیدا زۆربەیان ئەنجامی نادەن. مەرجەكانی كاندیدبوونت بۆ چارەسەر بە لەیزیك ئەمانەن: پێویستە كە تەمەنت لە سەرووی 18 ساڵ بێت، پێویستە كە چاوەكانت تەندروست بن، هیچ نەخۆشی و گرفتیان نەبێت بەتایبەتی لە چینی كۆرنیای چاودا چونكە هەر هەوكردن یان ئاسەوارێك لە كۆرنیادا رێگر دەبێت بۆ چارەسەری لەیزیك، هیچ ناڕحەتی یان گرفتێكی تەندروستیت نەبێت لەكاتی پاڵكەوتن لەسەر پشتدا، چونكە چارەسەری لەیزیك تەنیا بە پاڵكەوتنی نەخۆش لەسەر پشت ئەنجام دەدرێت، پێویستە كە بتوانیت بۆ ماوەی 1-2 خولەك چاوەكانت لەسەر خاڵێكی تیشكی دەزگای لەیزەردا بەبێ جوولە رابگریت، پێویستە كە 4 هەفتە بەر لە ئەنجامدانی نەشتەرگەریی لەیزیك بەكارهێنانی هاوێنەی لكاو رابگریت، چونكە بەكارهێنانی هاوێنەی لكاو هۆكارە بۆ گۆڕینی شێوەی كۆرنیا، ئەمەش كاریگەری دەكاتە سەرئەنجامی چارەسەرییەكە.