خۆراك پێویستە بۆ بەردەوامبوونی ژیان، بەڵام چی خواردن زۆر گرنگترە لە چەند خواردن. هەر كەسێك رۆژانە بڕێكی دیاریكراوی لە خۆراك پێویستە بەپێی كار و پیشە و جووڵە و تەندروستی گشتی، بەمانایەكی دیكە بڕێكی دیاریكراوی وزە و بڕی دیاریكراوی لە ماددە خۆراكییە گرنگەكانی وەكو پرۆتین، كاربۆهیدرات، چەوری، ڤیتامینەكان، كانزاكان و ئاو. كەم و زیادی لە وزەی خۆراكی و ماددە گرنگە خۆراكییەكان كێشەی تەندروستی لێ دەكەوێتەوە بە شێوەی: زیاد و كەمی لە كێشی لەشدا، بەدخۆراكی، نیشانەكانی كەمی ڤیتامین و كەمی كانزاكان. بۆ نموونە خۆراكێك كە رێژەیەكی بەرزی لە چەورییە تێرەكان تێدا بێت، كە بە چەورییە خراپەكان ناسراون، ئەوا ئەمڕۆ یان سبەی رووبەڕووی گرفتی تەندروستی وەكو بەرزبوونەوەی كۆلیستیرۆلی خوێن و نەخۆشی دڵت دەكاتەوە، ئەمە سەرەڕای زیادبوونی كێشی لەش و قەڵەوی. ئەو خۆراكەی كە بڕێكی كەمی لە سەوزە و میوە تێدابێت، لەوانەیە كە ببێتە هۆی كەمی ئەو ڤیتامینانەی كە لە ئاودا دەتوێنەوە بەتایبەتی ڤییتامین C لەگەڵ بێبەشبوون لە ماددە دژەئۆكسانەكان كە رۆڵی گرنگیان هەیە بۆ خۆپاراساتن لە نەخۆشی دڵ و نەخۆشی شەكرە و شێرپەنجە.
