بەر لە هاتنی مانگی رەمەزان، خەڵك خۆیان بۆ ئەو مانگە پیرۆزە ئامادە دەكەن، لە كڕینی شت و مەك و خواردن و كەرەستەكانی ماڵ، رەمەزانی پار تەنیا لە نێو ماڵەكاندا رەمەزان دەبینرا، ساڵانی پێشوو بازاڕ و شوێنی گشتی و باخچەكان پڕ دەبوون لە خەڵك، هەروەها یارییە میللییەكانی وەك سینی سینیانێ و كڵاو كڵاوێن وكەرەمستانێ جۆشیان بە شەونشینی دەدا، ئەمە جگە لەو یارییە تازانەی كە گەنجان لە كافتیریا و شوێنە تایبەتەكاندا شەوانەی رەمەزانیان پێ بەڕێ دەكرد، ئەمساڵیش بەرەو ئەو مانگە پیرۆزە دەچین، تا ببێتە مانگێكی خێر و بەرەكەت و جێگەی نزا و پاڕانەوە بۆ هەمووان، بۆ ئەو مەبەستەش لەسەر هاتنەوەی مانگی پیرۆزی رەمەزان گوڵان ڤیچەرێكی ئامادە كردووە:
دەستپێك مامۆستا (جەعفەر گوانی) پێشنوێژ و وتارخوێنی مزگەوتی دكتۆر نەریمان، دەربارەی مانگی پیرۆزی رەمەزان لە سەردەمی كۆرۆنا گوتی: «سەرەتا پیرۆزبایی هاتنەوەی ئەم مانگە پیرۆزە دەكەم، بەهیوای ئەوەی رەمەزانی ئەمساڵمان ببێتە مایەی تاعەت و عیبادەت و خۆشی بۆ هەمووان، وەك ئاشكرایە ساڵی پار رەمەزان تەنیا لە نێو ماڵەكاندا بوو، واتە ئەوانەی تاعەت و عیبادەتی خۆیان لە نێو ماڵەكان دەكرد، بەهۆی كەرەنتیینەی گشتییەوە دەرگای مزگەوتەكان داخرابوون، ئێمە وەك مامۆستایانی ئایینی هەمیشە تەندروستیی خەڵكمان لا گرنگە، ئامانج ئەوەیە كە خۆپارێزی باشترە لە چارەسەر، واتە ئەگەر مزگەوتەكان بكرێنەوە خەڵك پێویستە دەمامك و دەستكێش و خۆپارێزییەكی تەواو پەیڕەو بكات، هەروەها دووریی نێوان كەسەكان گرنگن تا بە هەموو شێوەیەك رێنماییەكان پەیڕەو بكەین، بەڵام ئەگەر دۆخەكە زیاتر خراپ بێت، یان مزگەوت نەكرێنەوە، یانیش بەهۆی بەرزبوونەوەی تووشبووان مزگەوتەكان دابخرێن، ئەوكاتە خەڵك دەتوانن لە ماڵەكانی خۆیاندا نوێژی تەراویح و شەوانی قەدر و نوێژی جەژنیش ئەنجام بدەن».
لای خۆشیەوە (دكتۆر رەحمان شەل شێروانی) دەربارەی رەمەزان دەڵێت: «سەرەتا لەكاتی بەربانگدا نابێ پەلە بكەین لە خواردن و خواردنەوە، دەربارەی پارشێویش دەبێ خواردنی باش بخۆین و بڕێكی زۆر ئاو بخۆینەوە، گرنگترین شت لە رەمەزاندا ژەمی ئێوارەیە، واتە كاتی رۆژووشكاندن، لەو كاتەدا پەلە مەكە، خواردن بە سێ قۆناغ بێت باشترە، یەكەم: یەك گلاس ئاو بە حەوت جار، سێ دەنك قەسپ (خورما). دووەم: هەستە و دەست نوێژت بشۆ، بە هێواشی نوێژەكەت بكە و بگەڕێەوە سەر سفرە، واباشترە شەربەتی سرووشتی، نیسك، نانی تیریی بێ خومرە، چا، ماست بخۆیت. سێیەم: تەنیا بۆ ئەوانەی زۆر برسییانە، پاش نوێژی عیشا، یان تەراویح، ئەو خواردنەی خودا بە نسیبی كردبوو بیخۆ.
تێبینی: خواردنی شەكر و شیرنیی زۆر و بە ماوەیەكی كەم تەندروستیت تێك دەدات و تووشی بێ هێزی و ژانەسەر و سەرسووڕە و ژانە زكت دەكات، خواردنەوەی بڕێكی زۆری ئاو و شەربەت و بیبسی تووشی (زگ-ئاو) ت دەكات، بە هیوای تەندروستییەكی باش بۆ هەمووان».
كاك ئەحمەد شەهاب كە لە گەڕەكی تەعجیلی شاری هەولێر چێشتخانەی خواردنی میللیی هەیە دەڵێت: «رەمەزانی پارساڵ هیچ بۆن و مۆركێكی پێوە دیار نەبوو، بەهۆی ئەوەی كەرنتینەی گشتی هەبوو، بازاڕی شەوانەی تەعجیل، یان بازاری میللی چۆڵ بوو، كە ئەوەندەی من تەمەنمە بە هیچ شێوەیەك ئەو شوێنەم بەو بێ نازییەوە نەبینیوە، زۆر كەس داویای دەكرد كە خواردن ئامادە بكەین و بە دلیڤەری بۆیان بنێرین، بەڵام ئێمە پابەندی رێنماییەكان بووین، ئەگەر چی زەرەرێكی زۆرمان كرد بەهۆی ئەوەی لە شەوانی رەمەزاندا داهاتێكی زۆرمان لە رێگەی خواردنی میللی و تكە و چا دەست دەكەوت، بەڵام پار تەنیا (13) رۆژی كۆتایی رەمەزان خواردنگەكەمان كرایەوە».
دلڤین محەمەد، كە خاتوونێكی ماڵە دەربارەی رەمەزان دەڵێت: «ساڵانە بەر لە رەمەزان ماڵەكەمان دەڕازێنینەوە، ئەوەش بە دانانی ئەو كەرەستانەی مانا و گوزارشت لە مانگی رەمەزان دەكەن، وەك فانۆس و بەرماڵی جوان و قورئانی پیرۆز، هەروەها ئامادەكردنی خواردن و خواردنەوە، رەمەزانان رۆژانە بە كاری ماڵەوە بەڕێ دەكەین، بەر لە ئێوارە و بەربانگیش خواردن و خواردنەوە ئامادە دەكەین، شەوانیش دوای بەربانگ ماڵ پاك دەكەینەوە و ئەگەر بكرێت سەردانی مزگەوت دەكەین، یان سەردانی خزم وكەسانی نزیك دەكەین، ئەمەش وەك مانگێكی پڕ خێر و بەرەكەت دەبێتە مایەی خۆشی و شادی بۆ هەمووان».