كاتێك دەخرێتە سەر سفرەكانی نان خواردن، بەر لەوەی تامێكی بكەی، هەر بە سەیركردنی دەمت پڕ ئاو دەبێ و دڵت بۆی دەچێ، ئەوەی باسی دەكەین بریتییە لە (تورشی)، كە یەكێكە لەو خواردنە خۆشانەی خۆشەویستە لای گشت كەسێك و تەنانەت سەرەڕای ئەوەی ناوی تورشییە، كەچی خواردنێكی خۆشەویست و شیرینە، لەلایەن وەستای كارگەی تورشی سیروان لەسەر تورشی ئەو چەند زانیارییەی پێبەخشیم: دوای ئەوەی كەرەستەكانی وەك سەوزە و میوە ئامادە دەكرێ و دواتر لەناو (خوێ) دادەنرێ، ئەمەش بۆ ماوەی نێوان ساڵێك تا دوو ساڵ، تاوەكو ئەو كاتەی ئامادە دەبێ و بۆن و تامەكەی ترش دەبێ، لە ساڵانی سی و چلەكاندا تورشی لە كوردستان و هەولێر هەبووە و چەندین كەسایەتی بەناوبانگ هەن كە كارگەی تورشیان داناوە، ئەو كەرەستانەی تورشی لێدروست دەكەن بریتین لە: خەیار، تەرۆزی، سێوی ژێر زەوی، كەلەرم و بیبەری شیرین و تیژ، پەتاتە، زەیتوون، كەرەوەز و سڵق، تورشی سێ جۆری سەرەكی هەیە ئەوانیش : تورشی (زەرد – سوور – مەحشی)، لە كۆتاییشدا ئاوی سیر و عەنبەی تێدەكرێ بۆ زیاتر بۆن خۆشكردنی، تورشی لە مانگی ڕەمەزانان بازاڕێكی باشی هەیە، وەكو وەستای تورشی گوتی: خەڵك بەڕۆژوو دەبێ و هەناوی دەسووتێ بۆ شتی ترش و شیرین و زیاتریش وتی لە زستانان تورشی سوور بازاڕی هەیە و لە هاوینانیش زەرد.
