سکرتێری گشتیی نەتەوە یەکگرتووەکان داوای لە سەرکردەکانی فەلەستین و ئیسرائیل کرد کە دەست لە توندوتیژی ھەڵگرن و بگەڕێنەوە بۆ دانوستاندنەکان و رایدەگەیەنێت، کە رووخاندنی خانوبەرە ئاشتی و ئاسایش بەرقەرار ناکات.

بان کی موون، سکرتێری گشتیی نەتەوە یەکگرتووەکان لە پەیامێکی ڤیدیۆییدا رایدەگەیەنێت، کە ”توندوتیژی زیان بە ھەوڵ و خواستەکانی فەڵەستینییەکان دەگەیەنێت بۆ دروستکردنی دەوڵەت و ئاسایشی ئیسرائیلیش دەخاتە مەترسییەوە“.

بان کی موون روو دەکاتە فەلەستینییەکان و رایدەگەیەنێت، کە ئەو دەزانێ ئەوان ”نائومێد بوون و توڕە بوون لە دروستکردنی نشینگەی جولەکەنشین“، بەڵام داوایان لێدەکات توڕەییەکەیان بگۆڕن بۆ ”دەنگی ئاشتی و بانەوازی گۆڕانکاری“ و داواش لە بەرپرسانی فەلەستین دەکات، توڕەیی جەماوەری خۆیان بگۆڕن بە دەنگی ئاشتی.

سکرتێری گشتیی نەتەوە یەکگرتووەکان هەروەها نیگەرانە لە سیاسەتی هێزە ئەمنییەکانی ئیسرائیل بەرامبەر عەرەبەکان و پێیوایە، رێوشوێنی ئەمنیی توند و رووخاندنی خانووبەرە، ”ناتوانێت ئاسایش و ئاشتی بەرقەرار بکات“.

ماوەیەکە بەهۆی هەوڵدانی ئیسرائیل بۆ دروستکردنی کۆمەڵگەی جولەکەنشین و هێرشی ناوبەناوی فەلەستینییەکان بۆ سەر هاووڵاتییانی ئیسرائیل، شەڕ و پێکدادان لەنێوان هێزە ئەمنییەکانی ئیسرائیل و گەنجانی فەلەستین دروستبووە.












باسنیوز