سەرچاوەیەكی لوبنانی بە ئاژانسی رۆیتەرزی راگەیاندووە، ھێزێكی زۆری ئێران كە ژمارەیان زیاتر لە ھەزار كەسە، لە ماوەی 10 رۆژی رابردوودا چوونەتە خاكی سووریا و ئامادەكاری دەكەن بۆ ئەوەی لە ماوەی داھاتوودا پەیوەستی ھێزەكانی دەوڵەتی ئەسەد و حیزبوڵای لوبنان و بەشداریی ھێرشێكی زەمینی بكەن.

رۆیتەرز ئاشكراشی كردووە ئەو ئۆپەراسیۆنە لە ئاسمانەوە و لەلایەن فڕۆكەكانی رووسیا پشتیوانیان لێدەكرێ.

دوو سەرچاوە كە ناویان ئاشكرا نەكراوە و بە رۆیتەرزیان راگەیاندووە: ئۆپەراسیۆنەكە بەمەبەستی كۆنترۆڵ كردنەوەی ئەو شوێنانە دەبێت كە لەژێر كۆنترۆڵی بەشار ئەسەددا نەماون.

ئەو سەرچاوانە ئاشكراشیان كردووە ھاوپەیمانییەكی سەربازی لە نێوان رووسیا و ھێزەكانی ئەسەددا ھەیە، ھاوكات ئێران و حیزبوڵڵای لوبنانیش لە ھەوڵی كۆنترۆڵكردنەوەی ئەو بەشە لە خاكی سووریا دان كە لە باكووری رۆژئاوا كەوتە دەست ھێزە دژبەرەكانی ئەسەد.

ئەو ھەواڵە لە كاتێك دایە كەلە رۆژانی رابردوودا ئەمەریكا و رووسیا لەسەر پرسی رووبەڕوو بوونەوە لەگەڵ داعش لە سووریا نەگەیشتبوونە رێككەوتن و ئەمڕۆ سەرچاوە جیاوازەكان ھەواڵی ھێرشی فڕۆكەكانی رووسیایان بڵاو كردەوە كە خەڵكی مەدەنیان كردووەتە ئامانج.
















باسنيوز