سەرۆكی پەرلەمانی عێراق (سه‌لیم جبوری) ده‌چێته ئه‌مریكا
عه‌بدولعه‌زیم عه‌جمان، سه‌ركرده له ئیئتیلافی هێزه نیشتمانییه‌كانی سوننه راگه‌یاند كه سه‌لیم جبوری له مانگی حوزه‌یرانی داهاتوو، سه‌ردانی ویلایه‌ته یه‌كگرتووه‌كانی ئه‌مریكا ده‌كات و واده‌ی ئه‌م سه‌ردانه‌ش، پێشتر و له‌كاتی سه‌ردانه‌كه‌ی پێشووی بۆ ئه‌و وڵاته دیاری كرابوو.
به‌وته‌ی عه‌جمان، ئه‌مجاره، سه‌لیم جبوری وه‌ك سه‌رۆك سه‌رۆكی ئه‌نجومه‌نی نوێنه‌رانی عیراق ده‌چێته واشنتۆن و به‌نیازه له‌گه‌ڵ به‌رپرسانی ئه‌و وڵاته دۆخی عیراق و دۆسیه‌ی پڕچه‌ككردنی هۆز و عه‌شیره‌ته‌كان تاووتوێ بكات.
جه‌ختیشیكرده‌وه كه سه‌ردانه‌كه‌ی ئه‌مجاره‌ی جبوری، هیچ په‌یوه‌ندییه‌كی به پرۆژه‌یاساكه‌ی كۆنگرێسی ئه‌مریكا بۆ پڕچه‌ككردنی كورد و هێزه سوننه‌كان نییه كه مشتومڕێكی زۆری به‌دوای خۆیدا هێناوه.
له‌ماوه‌ی رابردوودا هه‌ریه‌ك له حه‌یده‌ر عه‌بادی، سه‌رۆك وه‌زیرانی عیراق و دواتر مه‌سعود بارزانی، سه‌رۆكی هه‌رێمی كوردستان و راسته‌وخۆ دوای ئه‌و سه‌ردانه‌ش، رافع عیساوی سه‌ركرده‌ی داواكراوی سوننه‌كان له‌لایه‌ن حكومه‌تی عیراقه‌وه، سه‌ردانی ویلایه‌ته یه‌كگرتووه‌كانی ئه‌مریكایان كرد و ئێستاش سه‌لیم جبوری به‌نیازه بچێته واشنتۆن.
خەندان
