رووسیا نیگه‌رانییه‌كانى ویلایه‌ته‌ یه‌كگرتووه‌كانى ئه‌مه‌ریكاى له‌ سه‌ر بڕیارى پێدانى سیسته‌مى به‌رگرى موشه‌كى پێشكه‌وتوو له‌ جۆرى ئێس سێسه‌د به‌ ئێران ره‌تكرده‌وه‌ و ته‌ئكیدیشى له‌سه‌ر جێبه‌جێ كردنى بڕیاره‌كه‌ كرده‌وه‌. له‌ په‌یوه‌ندیه‌كى ته‌له‌فۆنیدا سێرگى لاڤرۆڤ وه‌زیرى ده‌ره‌وه‌ى رووسیا به‌ هاوتا ئه‌مه‌ریكیه‌كه‌ى جۆن كیرى راگه‌یاند، مۆسكۆ نیگه‌رانى و به‌رهه‌ڵستییه‌كانى واشنتۆن له‌باره‌ى بڕیارى پێدانى سیسته‌مى به‌رگرى موشه‌كى پێشكه‌وتوو له‌ جۆرى ئێس سێسه‌د به‌ ئێران ره‌تده‌كاته‌وه‌ و سوره‌ له‌سه‌ر جێبه‌جێ كردنى بڕیارى پێدانى سیسته‌مى به‌رگرى موشه‌كى پێشكه‌وتوو به‌ ئێران.

وه‌زیرى ده‌ره‌وه‌ى رووسیا له‌ په‌یوه‌ندییه‌ ته‌له‌فۆنیه‌كه‌دا راشیگه‌یاندووه‌ كه‌ سیسته‌مى به‌رگرى موشه‌كى چه‌كێكى به‌رگرییه‌ و بۆ سه‌ر هیچ وڵاتێك هه‌ڕه‌شه‌ و مه‌ترسى نییه‌. لاڤرۆڤ ئاماژه‌ى به‌وه‌شداوه‌ كه‌ بڕیارى هه‌ڵپه‌ساردنى قه‌ده‌غه‌كردنى فرۆشتنى سیسته‌مى به‌رگرى موشه‌كى به‌ ئێران له‌ چوارچێوه‌ى ئه‌و رێككه‌وتنه‌ ئه‌تۆمیه‌یه‌ كه‌ له‌ نێوان ئێران و وڵاتانى گروپى پێنج كۆیه‌ك واژوو كراوه‌.