توركیا هێزی زیاتر له سنووری باشوور و رۆژئاوای كوردستان جێگیر ده‌كات
له‌باره‌ی دامه‌زراندنی له‌شكرێكی تایبه‌ت به پاراستنی سنوور، سوپاسالاری گشتی توركیا ژه‌نه‌ڕال نه‌ژده‌ت ئۆزال ئاشكرایكردووه كه ئه‌م له‌شكره سه‌ر به‌فه‌رمانده‌یی هێزی پیاده‌ی وه‌زاره‌تی به‌رگری ده‌بێت و ناوی "له‌شكری پاراستنی ئاسایشی سنووره" و له كۆتایی ساڵی داهاتوو یا له سه‌ره‌تای ساڵی ٢٠١٧ ئه‌رك و چالاكییه‌كانی له ناوچه سنوورییه‌كانی باشوور و باشووری رۆژهه‌ڵاتی توركیا ده‌ست پێده‌كات.
ئێستا هه‌ردوو لیوای شه‌ش و حه‌وتی سوپای توركیا ئەرکی پاراستنی ئاسایشی سنووری ووڵاته‌كه‌یان به درێژایی ١٢٠٠ كلم له‌گه‌ڵ عێراق و سوریه لە ئەستۆیە.
به‌پێی وته‌ی ئۆزال دامه‌زراندنی ئه‌م له‌شكره تایبه‌ته به‌هۆی زیادبوونی نیگه‌رانییه‌كانی ده‌وڵه‌تی توركیا له‌ئاست ئاڵۆزییه‌كانی ناوخۆی عێراق و سوریا و كرده و چالاكییه‌كانی رێكخراوی تیرۆریستی داعش لەو دوو وڵاته‌دایە.
نه‌ژده‌ت ئۆزال سوپاسالاری گشتی توركیا ده‌ڵێت: به‌جێگیركردنی له‌شكری ئاسایشی سنوور رێگه له دزه‌كردنی ئه‌ندامانی رێكخراوی داعش بۆ ناو توركیا ده‌گرن و به‌پێچه‌وانه‌شه‌وه ڕێگە له ئاودیو بوونی چه‌كدارانی بیانی بۆ نێو سوریه دەگرن.
