دوای ئه‌وه‌ی ئیسرائیل كۆمه‌لێك زانیارى له‌سه‌ر وتوێژى ئه‌تۆمى نێوان ئێران وڵاتانی گروپى و پێنج یه‌ك به‌ نهێنى ده‌ستكه‌وت و پاشان بڵاویانیشى كرده‌وه‌ ، ئیداره‌ی باراك ئۆباما سه‌رۆكى ئه‌مه‌ریكا ئیسرائیلى ب دزینى ئه‌و زانیارییانه‌ تۆمه‌تباركرد و رایگه‌یاند، رێگه‌ به‌ ئیسرائیل نه‌دراوه‌ هه‌ندێك زانیاری هه‌یه‌ له‌باره‌ی وتوێژى ئه‌تۆمی ئێران و وڵاتانى گروپى پێنج كۆیه‌ك بیزانێت و ئه‌مه‌ش له‌به‌ر ئه‌وه‌ی، ئه‌گه‌ری هه‌یه‌ ئه‌وان زانیارییه‌كان بدركێنن و سوود له‌و زانیارییانه‌ وه‌ربگرن به‌ مه‌به‌ستی وه‌ستاندنی وتوێژه‌كانى ئه‌تۆمى.

جۆش ئێرنێست، گوته‌بێژی كۆشكی سپی رایگه‌یاند، ئه‌و زانیارییانه‌ی له‌لایه‌ن ئیسرائیله‌وه‌ بڵاوكراونه‌ته‌وه‌، كۆمه‌ڵیك زانیاری بێ بنه‌مان و هیچ راست نیین.هه‌روه‌ها جێن ساكی، گوته‌بێژی وه‌زاره‌تی ده‌ره‌وه‌ی ئه‌مریكا له‌ كۆنگره‌یه‌كی رۆژنامه‌وانیدا رایگه‌یاند، نابێت ئیسرائیل هیچ زانیارى نهێنى له‌سه‌ر وتوێژى ئه‌تۆمى ببات و بڵاویان بكاته‌وه‌ چونكه‌ ئه‌و زیان به‌ ئه‌نجامى وتوێژه‌كان ده‌گه‌یه‌نێت. ساكى ئاماژه‌ى به‌وه‌شدا، نابێت ئیسرائیل له‌ وتوێژى ئه‌تۆمى نیگه‌ران بێت چونكه‌ واشنتۆن به‌رده‌وام هه‌وڵه‌كانى بۆ پاراستنی ئیسرائیل و ئاسایشی ئیسرائیل خستووه‌ته‌ گه‌ر.