ستیڤان هارپر سه‌رۆك وه‌زیرانى كه‌نه‌دا كۆمه‌ڵێك پێشنیازى یاسایى پێشكه‌شى په‌رله‌مانى وڵاته‌كه‌ى كردووه‌؛كه‌ به‌ پێى ئه‌و یاسایانه‌ هاندانى خه‌ڵك به‌مه‌به‌ستى هێرشى تیرۆریستى له‌دژى ئه‌و وڵاته‌ به‌ تاوان له‌قه‌ڵه‌م ده‌درێت و ده‌سته‌ڵاتى ده‌زگاكانى هه‌واڵگرى ئه‌و وڵاته‌ زیاتر ده‌بێت و رێ به‌و ده‌زگایانه‌ ده‌درێت كه‌ بۆ به‌ره‌نگاربوونه‌وه‌ له‌دژى هێرشه‌ تیرۆریسته‌كان راسته‌وخۆ ده‌ست به‌كاربن.

هه‌روه‌ها ده‌زگاكانى هه‌واڵگرى ئاسایشى ئه‌و وڵاته‌ مۆڵه‌تیان پێده‌درێت كه‌ رووبه‌ڕووى مه‌ترسییه‌كانى داعش ببنه‌وه‌ و ده‌سه‌ڵاتیان هه‌بێت كه‌ رێ له‌ گه‌شتى ئاسمانى هاووڵاتیانى كه‌نه‌دایى بگرن كه‌ گومانیان لێده‌كریت بچنه‌ پاڵ رێكخراوه‌ توندڕه‌وه‌كان و مۆڵه‌تیان پێده‌درێت كه‌ كه‌سانى گومان لێكراو ده‌ستگیر بكه‌ن و ئه‌نته‌رنێته‌كه‌شیان ببچڕێنن. شایه‌نى باسه‌ چاوه‌ڕوان ده‌كرێت كه‌ په‌رله‌مانى كه‌نه‌دا ئه‌و پێشنیازه‌ په‌سه‌ند بكات.