وەزارەتی بەرگریی ئەمریكا (پنتاگۆن) رایگەیاند تا رۆژی دووشەممە ٦/١/٢٠١٥ فڕۆكە جەنگییەكانی ئەمریكا ١٣٥٠ هێرشی ئاسمانییان بۆ سەر چەكدارانی گرووپی دەوڵەتی ئیسلامی (ناسراو بە داعش) لە عێراق و سووریا ئەنجامداوە.

گوتەبێژێكی وەزارەتی بەرگری ئەمریكا (پنتاگۆن) راشیگەیاند: "ژمارەی هێرشە ئاسمانییەكانی فڕۆكە جەنگییەكانی ئەمریكا بۆ سەر چەكدارانی داعش تا شەوی دووشەممەی رابردوو گەیشتە ١٣٥٠ هێرش، كە ٦٨٧ لە عێراق و ٦٦٣ لە سووریا ئەمجامدراون".

گوتەبێژەكەی وەزارەتی بەرگری ئەمریكا گوتیشی "فرۆكە جەنگییەكانی هاوپەیمانان جگە لە ئەمریكا تا شەوی دووشەممەی رابردوو ٣٠٩ هێرشی ئاسمانییان كردبووە سەر چەكدارانی داعش لە عێراق و سووریا، كە ٢٣٧ هێرشیان لە عێراق ئەنجامدراون".

هێرشی وڵاتانی هاوپەیمانان بە سەرۆكایەتی ئەمریكا بۆ سەر گرووپی داعش لە عێراق لە مانگی ئابی ساڵی ٢٠١٤ دەستیانپێكرد و سەرەتا تۆپخانەیەكی داعشیان لە نزیكی شارۆچكەی مەخموور لە نزیكی هەولێر كردە ئامانج.








رووداو