ئەمڕۆ 22ی نۆڤەمبەر حكومەتی بەریتانیا رایگەیاند، كە ژمارەیەك خۆبەخشی دیكەی وڵاتەكەیان كە بە باشی بۆ خۆپاراستن لە ئیبۆلا و رووبەڕووبوونەوەی ئیبۆلا راهێنانیان پێكراوە، بەریتانیایان بەجێهێشت و بەرەو سیرالیۆن بەڕێكەوتن.

بەریتانیا 30 كەسی شارەزا و پسپۆڕی پزیشكی رەوانەی چەند نەخۆشخانەیەكی جیاوازی سیرالیۆن كردووە، بۆ ئەوەی ها‌وكاری خەڵكی ئەو وڵاتە بكەن، بەتایبەت ئەوانەی بەهۆی ڤایرۆسی ئیبۆلاوە نەخۆشن و ژیانیان لە مەترسیدایە.

بە پێی دوایین راپۆرتەكانی رێكخراوی تەندروستی جیهانی لە سیرالیۆن 1200 كەس بەم ڤایرۆسە مردوون و 5500 كەسیش تو‌وش بوون، هەرچەندە رێژەی تو‌وشبوون لە سیرالیۆن كەمترە لە لیبریا، سیرالیۆن لەرووی رێژەی بڵاوبوونەوەی ئەو ڤایرۆسەوە لەنێو وڵاتانی رۆژئاوای ئەفریقا دووەم وڵاتە .

بەشێوەیەكی گشتی ئیبۆلا بووەتە هۆی مردنی 5200 كەس لە سەرانسەری جیهان و زیاتر لە 14 هەزار و 400 كەسیش بەم نەخۆشیە لە 8 وڵاتی جیاواز تو‌وشبوون.






رووداو