باراك ئۆباما، سەرۆكی ئەمریكا بەپێشوازی لە رێككەوتنی ئێران و گرووپی 5+1 بۆ (جێبەجێكردنی بەرنامەی هەنگاوی هاوبەش) گوتی:"هەر گەمارۆیەكی نوێ كە كۆنگرێس لە كاتی جێبەجێكردنی ئەو رێككەوتننامە بە دژی ئێران پەسەندی بكات، ڤیتۆی دەكەم".


سەرۆكی ئەمریكا رۆژی یەكشەممە 12-1-2014 لە بەیاننامەیەكدا گوتی: "بە رێككەوتنێك كە ئەمڕۆ بۆ جێبەجێكردنی (بەرنامەی هەنگاوی هاوبەش) لە مانگی نۆڤەمبەری ساڵی رابردوو راگەیەنرا،كۆماری ئیسلامی ئێران بۆ یەكەمین جار بە درێژایی دە ساڵ، بە كردەوەیەكی دیاریكراو بۆ وەستاندنی بەرنامە ناوەكییەكەی و گەڕاندنەوە بۆ دواوەی هەندێك لە بەشە گرینگەكانی ئەو بەرنامەیە، رەزامەندی دەربڕی.

ئۆباما لەو بەیاننامەیەدا گوتوویەتی:"تا ئەو كاتەی ئێران بەڵێنەكانی بباتە سەر و ئێمە بتوانین بە رێگە چارەیەك بۆ بەرنامەی ناوەكی ئێران بگەین، بەشێك لە گەمارۆكان بەشێوەیەكی سنووردار كەمدەبێتەوە".

سەرۆكی ئەمریكا ئەوەشی گوتووە:"لەهەمانكاتدا، ئێمە بە تووندی سیستەمی گەمارۆكان لە دژی ئێران درێژە پێدەدەین و ئەگەر ئێران بەڵێنەكانی نەباتە سەر،ئێمە گەمارۆكان زیاد دەكەین".

ئێران و وڵاتانی ئەندامی گرووپی 5+1 (ئەمریكا، بەریتانیا، فەرەنسا، رووسیا و چین لەگەڵ ئەڵمانیا)، لە ساڵی رابردوودا گەییشتنە رێككەوتنێكی كاتی بۆ چارەسەركردنی كێشە ناوەكییەكانی ئێران.

بە پێی ئەو رێككەوتنانە، ئێران قبوڵی كردووە لە ماوەی 6 مانگدا بەشێك لە چالاكییە ناوەكییەكانی خۆی رابگرێت و لەبەرامبەریشدا وڵاتە زلهێزەكان لەو ماوەیەدا گەمارۆی نوێ نەخەنە سەر ئێران و هەندێك لە گەمارۆكانیش كەمبكەنەوە.











رووداو