پارتی نوری سەلەفی میسری رایگەیاند كە ئەوان بە بەڵێ دەنگ رەشنووسی نوێی میسر دەدەن كەوا بڕیارە بخرێتە راپرسیەوە، ئەمەش بۆ دوورخستنەوەی وڵات لە ئاڵۆزی زیاتر و داواشیان لە گەلی میسر كرد كە پشتگیری لە رەشنووسی دەستوورەكە بكەن.

یونس مەخیون سەرۆكی پارتی نوری سەلەفی رایگەیاند كە پارتەكەیان هەڵوێستی خۆیانیان بۆ پرسی رەشنووسی دەستوور یەكلاكردۆتەوە و بە بەڵێ دەنگ بۆ دەستوورەكە دەدەن و راشیگەیاند كە دەستووری نوێیی وڵات هاوسەنگ بە دەستخستووە لە نێوان ئازادیەكان و بنەماكانی كۆمەڵگە.

پارتی نوری سەلەفی بە ئەندامێك بەشداریان لە لێژنەی پەنجای نووسینەوەی دەستووری وڵات كرد و هەروەها پشتگیری ئەو نەخشە رێگایەیان كرد كە لە لایەن سوپاوە دارێژرا بۆ لە سەر كارلادانی محەمەد مورسی.

جێی باسە رۆژی یەك شەممەی رابردوو لیژنەی هەمواركردنی دەستووری تازەی میسر بە دەنگی ئەندامانی لیژنەكە نووسین و هەمواركردنەوەی دەستووری تازەی پەسەند كرد، دەستوورەكە رادەستی عەدلی مەسنوور سەرۆكی كاتی میسر كرا.

بە گوێرەی ئاژانسەكانی هەواڵیش، هەندێ لە ئەندامانی لیژنەكە بەرهەڵستییان بەرامبەر هەندێ برگەو ماددەكانی ناو رەشنووسی دەستووری تازەی كردو بەڵام بۆ دواجار لیژنەی هەمواركردنی دەستووری تازەی میسر كە بە لیژنەی پەنجا ناسراو توانی بە زۆرینەی دەنگی ئەندامانی لیژنەكە دەستووری تازە پەسەند بكات، بە پێی زانیارییەكانیش لیژنەی ناوبراو هەندێ ماددە و برگەی تازەی ناو دەستوورەكە نووسیوەتەوە و هەندێكیشی هەمواركردووەتەوە یەكێك لەو ماددانە كە لە ناو دەستووری تازەی میسر هەمواركراوەتەوە پرسی هەڵبژاردنەكانە لەو وڵاتە بە پێی ماددە هەمواركراوەكە، هەڵبژاردنی سەرۆكایەتی ئەو وڵاتە بەر لە ئەنجامدانی پەرلەمانی ئەنجام دەدرێت كە پێشتر پێچەوانە بوو.