ئه‌مڕۆ له‌ ئاكامی دوو ته‌قینه‌وه‌دا له‌ نزیك باره‌گای بالیۆزخانه‌ی كۆماری ئیسلامی ئێران له‌ به‌یروتی پایته‌ختی لوبنان 23 كه‌س كوژران و 146 كه‌سی دیكه‌ بریندار بوون یه‌كێك له‌و بریندارانه‌ ئیبراهیم ئه‌نسارییه‌ كه‌ راوێژكاری رۆشنبیرییه‌ له‌ بالیۆزخانه‌ی ئێران له‌ لوبنان .

ئه‌م دوو ته‌قینه‌وه‌یه‌ بالیۆزخانه‌ی ئێرانی له‌ ناوچه‌ی جه‌ناح كرده‌ ئامانج كه‌ به‌ گه‌وره‌ترین مۆڵگه‌ی حزبوللای لوبنانی داده‌نرێـت . به‌پێی سه‌رچاوه‌كانی هه‌واڵ ئه‌م دوو ته‌قینه‌وه‌یه‌ زیانێكی گه‌وره‌ی به‌ بالیۆزخانه‌كه‌ و شه‌ش باڵه‌خانه‌ی ده‌وروبه‌ری گه‌یاندووه‌ و ئۆتۆمبێله‌كانی فریاكه‌وتنیش به‌ خێرایی گه‌یشتوونه‌ته‌ شوێنی رووداوه‌كه‌ .

له‌لایه‌ن خۆیه‌وه‌ نه‌جیب میقاتی سه‌رۆكی حكومه‌تی رایی كردنی كاره‌كان داوای له‌ ده‌سته‌ی كارگێری كاره‌ساته‌كان كرد كه‌ كۆبوونه‌وه‌یه‌كی به‌په‌له‌ ئه‌نجام بده‌ن بۆ به‌دواداچوون و لێكۆڵینه‌وه‌ له‌ هۆكاره‌كانی ئه‌م دوو ته‌قینه‌وه‌یه‌ .