لە كۆنفرانسێكی رۆژنامەوانی هاوبەشدا لەگەڵ وەزیری دەرەوی رووسیا، كە لە مۆسكۆی پایتەختی رووسیا سازكرا، وەلید موعەلیم وەزیری دەرەوی سووریا رایگەیاند، كە وڵاتەكەی لە پێناو بەرگریكردن لە هاونیشتیمانییەكانی هاوكاری و هەماهەنگی لەگەڵ رووسیادا دەكات.

موعەلیم دووپاتیكردەوە، هاوكارییەكانی سووریا لەگەڵ رووسیا بەردەوامە بۆ پێشنیازكردنی چارەسەری دیبلۆماسی كێشەی سووریا و رێگەگرتن لە هێرشی سەربازی بۆ سەر وڵاتەكەی.

لای خۆشیەوە سێرگی لاڤرۆڤ، وەزیری دەرەوەی رووسیا ئامادەیی تەواوی وڵاتەكەی بۆ هاوكاریكردنی سووریا نیشاندا و رایگەیاند \"بەردەوامین لەسەر گفتوگۆ و پەیوەندیكردن بە زۆربەی سەركردەكانی وڵاتە جیاوازەكان بۆ تا‌ووتوێكردنی كێشەكە\"".

لاڤرۆڤ ئەوەشی راگەیاند، كە لە ئەنجامی كۆبوونەوەكانیاندا گەیشتوونەتە ئەو دەرئەنجامەی كە هێشتا رێگای دیبلۆماسی لەبەردەمیاندایە بۆ رێگەگرتن لە سیناریۆی جەنگ.

لاڤرۆڤ و موعەلیم هاوڕابوون لەسەر ئەوەی \""حكومەتی سووریا بە هەموو شێوەیەك ئامادەیە پێشوازی لەهەر دانیشتنێكی دیبلۆماسی بكات و ئامادەشە بە بێ هیچ مەرجێكی پێشوەخت بەشداری كۆنگرەی دووەمی جنێف بكات\"".

هەر لەو كۆنفڕانسە رۆژنامەوانییەدا موعەلیم هۆشداری دایە ئەمریكا \""ئەگەر شەڕ هەڵبگیرسێت، جگە لەوەی قوربانیانی یەكەمی جەنگ ژن و منداڵ دەبن دواتر شەڕی نێوخۆشی لێدەكەوێتەوە\"". موعەلیم گوتیشی \""پێویستە ئەمریكییەكان ئەوەیان بیر نەچێت كە لە عێراق روویدا، ئێمە داوا لە گەلی ئەمریكا دەكەین هۆشیار بن و رێگە لەم هێرشانە بگرن\"".

لەلایەكی دیكەشەوە رووسیا و سووریا داوایان لە تیمی نەتەوە یەكگرتووەكان كردووە لە كاتێكی نزیكدا سەردانی سووریا بكەنەوە بۆ تەواوكردنی كارەكانیان. سەبارەت بە بەكارهێنانی چەكی كیمیاییش لە سووریا موعەلیم هێزە چەكدارەكانی سوپای ئازادی سووریای تۆمەتباركرد و گووتی \""بەڵگەی ئاشكرا هەیە دەریدەخەن كە ئەو چەكدارانە لە چەند شوێنێكی جیاواز ئەو چەكانەیان بەكارهێناوە\"".




رووداو "