په‌روێز موشه‌ڕه‌ف، سه‌رۆككۆماری‌ پێشووتری‌ پاكستان، له‌لایه‌ن دادگای‌ وڵاته‌كه‌یه‌وه‌ به‌ كوشتنی‌ بینه‌زیر بوتۆ، سه‌رۆكوه‌زیرانی‌ پێشووی‌ پاكستان، تۆمه‌تبار كرا.

ئه‌مڕۆ له‌ دانیشتنێكی‌ دادگای‌ پاكستاندا، سه‌رۆككۆماری‌ پێشووی‌ پاكستان، په‌روێز موشه‌ڕه‌ف، به‌ ئاماده‌كاری‌ و پیلانگێڕی‌ و كوشتنی‌ بینه‌زیر بوتۆ، سه‌رۆكوه‌زیرانی‌ پێشووی‌ وڵاته‌كه‌ی‌ تۆمه‌تبار كرا.

بینه‌زیر بوتۆ له‌ رۆژی‌ 27ی‌ كانوونی‌ یه‌كه‌می‌ ساڵی‌ 2007، له‌ میانه‌ی‌ كۆبوونه‌وه‌یه‌كی‌ به‌رینی‌ لایه‌نگره‌كانی‌، له‌ هێرشێكی‌ تیرۆریستی‌ و خۆكوژیدا، كوژرا.

موشه‌ڕه‌ف له‌ كۆبوونه‌وه‌ی‌ ئه‌مڕۆی‌ دادگادا هیچ وه‌ڵامێكی‌ به‌ ئاشكرای‌ نه‌بووه‌ و كۆبوونه‌وه‌ی‌ داهاتووی‌ دادگا سه‌باره‌ت به‌م تۆمه‌تانه‌، رۆژی‌ 27ی‌ ئاب، به‌ڕێوه‌ ده‌چێت.

په‌روێز موشه‌ڕه‌ف، ساڵی‌ 1999 و به‌ كوده‌تایه‌كی‌ سه‌ربازی‌، ده‌سه‌ڵاتی‌ پاكستانی‌ گرته‌ ده‌ست و له‌ ساڵی‌ 2008 ناچار كرا واز له‌ ده‌سه‌ڵات بهێنێت و بۆ ماوه‌ی‌ 4 ساڵ‌ له‌ تاراوگه‌ ژیا.