ئه‌ردۆگان: هیچ لێبوردنێكی گشتی بۆ چه‌كدارانی په‌كه‌كه نییه
ئاژانسه‌كانی توركیا بڵاویان كرده‌وه، ئه‌ردۆگان رایگه‌یاند، ئه‌و به‌ڵێنه‌ی پارتی كرێكارانی كوردستان دابووی، بۆ ئه‌وه‌ی خاكی توركیا به جێبێڵێت، جێبه‌جێی نه‌كردوه، ته‌نیا 20% ی چه‌كداران له توركیا چوونه‌ته‌وه ده‌ره‌وه، ئه‌وانیش زۆربه‌یان ژن و منداڵن.
ئه‌ردۆگان وتیشی: یه‌كێك له داواكاری كورده‌كان ئه‌وه‌یه زمانی كوردی له قوتابخانه گشتی و تایبه‌تییه‌كان بخوێنرێت، له ئیستادا ئه‌و داوایه له به‌رنامه‌ی كارمان دا نییه.
روونیكرده‌وه، به‌هیچ شێوه‌یه‌ك لێبوردنی گشتی بۆ چه‌كدارانی پارتی كرێكارانی كوردستان و عه‌بدوڵا ئۆجه‌لان له به‌رنامه‌ی كارمان دانییه.
به‌پێی ئه‌و رێككه‌وتنه‌ی له نێوان حكومه‌تی توركیا و عه‌بدوڵا ئۆجه‌لان به‌ڕێوه‌چوو، پارتی كرێكاران له نه‌ورۆزی ئه‌مساڵه‌وه شه‌ڕیان راگرت و بڕیار بوو له ماوه‌یه‌كی دیاریكراو خاكی توركیا به‌جێبێڵن له‌به‌رامبه‌ردا حكومه‌ت پابه‌ندی خۆی ده‌ربڕی تا مانگی ئه‌یلول چاكسازی بكات و مافه‌كانی كورد دابین بكات.
