ئه‌مڕۆ سه‌رۆكی پێشووی تیمی چاودێرانی نێونه‌ته‌وه‌یی بۆ سوریا پێی وایه‌, روخانی ده‌سه‌ڵاتی به‌شار ئه‌سه‌د ته‌نیا مه‌سه‌له‌ی كاته‌, به‌ڵام به‌روخانیشی ئه‌و ململانێیه‌ی 16 مانگه‌ به‌رده‌وامی هه‌یه‌, كۆتایی پێنایه‌ت.
له‌ لێدوانێكی دا بۆ ئاژانسی رۆیته‌رز جه‌نه‌رال رۆبه‌رت مۆد رایگه‌یاند: روخانی ده‌سه‌ڵات له‌سوریا مه‌سه‌له‌ی كاته‌, بۆیه‌ پێش ئه‌وه‌ی برۆخێت هێزی سه‌ربازی قورس به‌كاردێنێت و توندوتیژی له‌راده‌به‌ده‌ر به‌رامبه‌ر هاوڵاتیانی سڤیل به‌كاردێنێت.

مۆد وتیشی: پێده‌چێت بۆ ماوه‌یه‌كی كاتی ئه‌سه‌د پارێزراوبێت له‌به‌ر ئه‌وه‌ی توانایه‌كی سه‌ربازی هه‌یه‌ و زۆر له‌ توانای هێزه‌كانی ئۆپۆزسیۆن زیاتره‌, ده‌توانێت خۆی پێ بپارێزێت, به‌ڵام له‌ كۆتاییدا روخانی چه‌ند مانگ یان ساڵێك ده‌خایه‌نێت.

ئاماژه‌یدا: ئه‌و كاته‌ی پێكهاته‌ی گه‌وره‌ی سه‌ربازی ریزه‌كانی سوپای سوریای به‌جێهێشت و چووه‌ ناو هێزه‌كانی ئۆپۆزسیۆن, هه‌نگاوه‌كان خێراتر ده‌بن, له‌وانه‌یه‌ چه‌ند مانگ و ساڵ بخایه‌نێت.

جه‌نه‌رال مۆد دوای كۆتاییهاتنی ئه‌ركه‌كه‌ی له‌سوریا كه‌ 90 رۆژی خایاند, ئه‌و وڵاته‌ی به‌جێهێشت, له‌ 20 ته‌مموز بۆ ماوه‌ی 30 رۆژ كاره‌كه‌ی درێژكرایه‌وه‌ و له‌شوێنی ئه‌و جه‌نه‌رال بابه‌كر جای ئه‌و ئه‌ركه‌ی گرته‌ ئه‌ستۆ.