له‌گه‌ڵ به‌رده‌وامی زیادبونی بارگرژی له‌سوریا شه‌وی رابردوو ده‌یڤيد كامیرۆن سه‌رۆك وه‌زیرانی به‌ریتانیا له‌كامب دیڤید له‌ ئه‌مریكا به‌سه‌رانی گروپی هه‌شتی راگه‌یاند ده‌بێت كاری زیاتر بكرێت بۆ رێگه‌گرتن له‌ به‌شار ئه‌سه‌د كه‌ ده‌ستبه‌رداری چه‌وساندته‌وه‌ی گه‌له‌كه‌ی بێت.
كامیرۆن وتیشی: به‌ریتانیا له‌ئاماده‌باشیدایه‌ بۆ به‌شداریكردنی شاره‌زایانی سه‌ربازی بۆ به‌رفراوانكردنی ئه‌ركی چاودێریی نێوده‌وڵه‌تی له‌ سوریاو ده‌بێت رژێمی سوریا بخرێته‌ ژێر گوشاری زیاتره‌وه‌.
سه‌رۆك وه‌زیرانی به‌ریتانیا راشیگه‌یاند: رژێمی ئه‌سه‌د هه‌رگیز پابه‌ند نه‌بووه‌ به‌ئاگربڕه‌كه‌وه‌و به‌بڕگه‌كانی پلانه‌ ئاشتییه‌كه‌ی كۆفی ئه‌نان نێردراوی تایبه‌تی نه‌ته‌وه‌ یه‌كگرتووه‌كان و ده‌بێت فشاری زیاتر بخرێته‌ سه‌ر ئه‌و رژێمه‌و ئاماژه‌ی رونی ئاڕاسته‌ بكرێت كه‌ زلهێزه‌كانی جیهان ده‌توانن رێبكه‌ون له‌سه‌ر رێوشوێنێك كه‌ جموجوڵه‌كانی جڵه‌وبكه‌ن، ره‌وانه‌كردنی هێزی چاودێری زیاتر ئه‌ركی چاودێران ئاسانتر ده‌كات و بۆ ئه‌وه‌ی بتوانن زۆرترین ژماره‌ی چاودێر له‌ شارو ناوچه‌كانی سوریا هه‌بێت و رۆڵێكی كاریگه‌ریان ده‌بێت له‌ڕێگه‌گرتن له‌ جموجۆڵ و ده‌ستدرێژییه‌كانی رژێمی ئه‌سه‌د بۆ سه‌ر گه‌لی سوریا.