وه‌زیرى ده‌ره‌وه‌ى توركیا داوا له‌ حكومه‌تى سوریا ده‌كات ده‌ستبه‌جێ و به‌بێ هیچ مه‌رجێك، توندوتیژیه‌كان دژى خۆپیشانده‌ران بوه‌ستێنێت، و پشتگیرى حكومه‌ته‌كه‌یشی بۆ داخوازیه‌كانى خۆپیشانده‌رانى سورى دوپات كرده‌وه‌.

ئه‌مرِۆ سێ شه‌ممه‌\"ئه‌حمه‌د داود ئۆغلۆ\"" وه‌زیرى ده‌ره‌وه‌ى سوریا له‌ كۆنفرانسێكى رِۆژنامه‌وانیدا كه‌له‌قاهیره‌ ئه‌نجامیدا رِایگه‌یاند: كۆتا داوامان بۆ ده‌سه‌ڵاتدارانى سوریا ئه‌وه‌یه‌ كه‌ توندوتیژى دژى هاوڵاتیانى به‌بێ هیچ مه‌رجێك رِابگرێت.

وه‌زیرى ده‌ره‌وه‌ى توركیا هۆشداریشیدایه‌ حكومه‌تى سوریا له‌سه‌ر به‌رده‌وامبونى له‌ كوشتن و ده‌ستگیركردنى خۆپیشانده‌ران و وتی: توركیا مۆڵه‌تى دو هه‌فته‌ى داوه‌ته‌ حكومه‌تى سوریا بۆ كشانه‌وه‌ى سوپا له‌ شاره‌كان و ئه‌نجامدانى چاكسازى به‌په‌له‌.

ئۆغلۆ وتیشی: هه‌ڵوێستى توركیا به‌رامبه‌ر خۆپیشاندانه‌كانى سوریا نه‌گۆرِاوه‌ و پشتگیرى هاوڵاتیان ده‌كه‌ین كه‌ داواى بنیاتنانى ده‌وڵه‌تێكى دیموكراتى ده‌كه‌ن.

وه‌زیرى ده‌ره‌وه‌ى توركیا داواشی له‌ خۆپیشانده‌رانى سوری كرد به‌رده‌وامبن له‌ خۆپیشاندانه‌كانیان به‌شێوه‌یه‌كى ئاشتى بۆ جێبه‌جێ كردنى داواكاریه‌كانیان.

سه‌رچاوه‌/ ئه‌لجه‌زیره‌"